DWIZ 882

Hindi muna titiketan ng Department of Transportation ang mga lalabag na drayber at operator sa mga unang araw ng pagpapatupad ng “No vaccination, No ride” policy sa NCR.

Ayon kay DOTr Undersecretary Artemio Tuazon Jr., pagsasabihan muna nila ang mga violator at sakaling ulitin ang paglabag ay handa na silang tiketan ang mga ito.

Sinabi rin niya na ang mga lalabag na hindi bakunadong indibidwal ay mayroon ding kaukulang parusa sa ilalim ng ordinansa na ipinatupad ng mga lokal na pamahalaan sa Metro Manila kaugnay sa nasabing polisiya.

Samantala, pinayuhan ni Tuazon ang mga nagbabalak na pekein ang vaccination cards na intindihin na lamang ang kautusan dahil ito ay para sa proteksyon ng lahat sa banta ng COVID-19.—sa panulat ni Airiam Sancho

Kalaboso ang isang miyembro ng Philippine Army habang 12 sibilyan din ang naaresto ng Philippine National Police (PNP) dahil sa paglabag sa umiiral na COMELEC gun ban.

Nakilala ang Army reservist na nahulihan ng baril na si Eduardo Dinopol Jr. na residente ng Bukidnon na naka-assign sa Jolo, Sulu at naharap sa kasong illegal discharge of firearm.

Batay sa datos ng PNP, nagmula ang iba pang mga nahuli sa National Capital Region, Western at Central Visayas, Soccsksargen at Northern Mindanao.

Nakumpiska ng PNP ang may 10 baril, 4 na deadly weapons, 90 bala at 6 na ipinagbabawal na bagay.

Sa kabuuan, umabot na sa 162 ang mga nahuling lumabag sa gun ban mula sa 27,826 na inilatag na checkpoints ng pulisya.

Kinumpirma ng Bureau of Corrections (BuCor) na napatay sa engkuwentro ang 1 sa 3 Persons Deprived of Liberty (PDL) na nakatakas sa New Bilbiid Prisons (NBP) kanina.

Ayon kay BuCor Spokesman Asec. Gabriel Chaclag, dead-on-the-spot ang PDL na kinilalang si Pacifico Villaruz, 40 anyos na nakulong dahil sa mga kasong frustrated at attempted murder.

Nakipagbarilan aniya si Villaruz, kasama ang 2 kapwa pugante nito habang nagsasagawa ng manhunt operations ang pinagsanib na puwersa ng BuCor at Philippine National Police (PNP).

Narekober sa pinangyarihan ng insidente ang isang 9mm pistola na siyang ginamit ni Villaruz sa pakikipagbarilan sa awtoridad gayundin ang mga basyo ng bala.

Sugatan naman ang 2 prison guards na kasama sa manhunt operations matapos ang nangyaring jail break sa maximum security compound ng NBP habang nakatakas ang 2 puganteng kasama ni Villaruz.

Patuloy namang tinutugis ang 2 pang kasama ni Villaruz na sina Arwin Bio Villeza na nahatulan sa kasong murder at Drakilou Yosores na nahatulan naman sa kasong robbery w/ homicide.

Samantala, inihayag naman ng PNP na inalerto na nila ang lahat ng kanilang units para tumulong sa ikadarakip ng 2 nalalabing pugante.

Ayon kay PNP Spokesman P/Col. Roderick Alba, naglabas na sila ng all-points bulletin sa National Capital Region Police Office (NCRPO) gayundin sa mga karatig lalawigan nito.

Dahil sentensyado na ang mga ito ani Alba, hindi na nila kailangan pa ng warrant of arrest para dakipin ang 2 na itinuturing nilang armado at mapanganib.

Nagpaalala ang liderato ng Philippine National Police (PNP) sa lahat ng mga tauhan nito na maging responsable sa paggamit ng kanilang mga baril.

Ito’y kasunod ng nangyaring pamamaril ng isang pulis sa Catanduanes na nagresulta sa pagkamatay ng kaniyang mag-ina at sa huli ay nagpatiwakal din.

Ayon kay PNP Chief P/Gen. Dionardo Carlos, ikinalungkot nila ang nangyari kaya’t magsilbing paalala dapat ito sa lahat ng pulis na palagiang obserbahan ang kanilang gun safety training.

Una rito, umuwi sa kanilang tahanan ang pulis na si Patrolman Jaymar Malasa mula sa isang inuman nang makaalitan nito ang kaniyang asawa na nagresulta sa pamamaril.

Tinamaan ng bala ng baril ang asawa nito at tumagos pa hanggang sa kanilang anak na nagresulta sa agaran nilang kamatayan at sa huli ay kinitil din ng pulis ang kaniyang sariling buhay.

Paalala ng PNP Chief, ang baril ay ginagamit para tuparin ang kanilang mandato na protektahan at paglingkuran ang sambayanan at hindi para ilagay sa kanilang sariling kamay ang batas.