DWIZ 882

Sinampolan ng mga tauhan ng Inter-Agency Council for Traffic ang limang pasaherong hindi pa bakunado sa Commonwealth Avenue sa Quezon City.

Dinala sa opisina ng task force disiplina ang mga nahuling violator bago inihatid sa vaccination site upang maturukan ng COVID vaccine.

Samantala, sinampolan din ng mga nagpapatupad ng batas ang isang jeepney driver na naka-isang dose pa lamang ng COVID-19 sa Caloocan City.

Ayon sa mga tauhan ng Philippine National Police-Highway Patrol Group (PNP-HPG), kinilala ang naturang driver na si Victor Alcantara na nakakaisa palang sa pagtuturok ng vaccine dose.

Base sa Department Order No. 2022-001 na inilabas ng Department of Transportation (DOTR), tanging mga fully vaccinated lang ang papayagang makasasakay sa pampublikong sasakyan sa ilalim ng alert level 3 o higit pa.—sa panulat ni Angelica Doctolero

Pinapurihan ng kampo ni 2022 presidential aspirant at dating senador Ferdinand “Bongbong” Marcos Jr. ang pasya ng Comelec na ibasura ang isa sa mga Disqualification Case laban sa kanya.

Ayon kay Atty. Vic Rodriguez, tagapagsalita ni Marcos, ang kathang-isip sa pagsusulat at paghahangad ng mga petitioner ng anumang hindi nakasaad sa batas ang naging batayan ng COMELEC 2^nd division upang ibasura ang  hiling na kanselahin ang Certificate of Candidacy ng dating senador.

Masyado anyang mababaw ang petisyon upang baluktutin ang mga pangunahing prinsipyo ng saligang batas.

Nagpasalamat naman ang kampo ng dating Ilocos Norte Governor sa Commission on Elections sa pagpapanatili sa batas at karapatan ng bawat tunay na kandidato tulad ni Marcos na tumakbo sa anumang public position nang walang diskriminasyon.

Samantala, hinimok ni Rodriguez ang lahat, maging ang kanilang mga kalaban na makipagkapit-bisig para sa pagkakaisa upang matiyak ang isang malinis, patas at  mapagkakatiwalaang halalan bilang kontribusyon sa pagtataguyod ng bansa para sa kinabukasan ng bawat Filipino.

Hindi muna pinapayagang lumabas ng kanilang bahay ang mga residenteng hindi bakunado sa Makati City maliban nalang kung may mahalagang bibilhin tulad ng pagkain, gamot at iba pang medical supplies.

Sa ilalim ng City Ordinance No. 2022-005, pagbabawalang makapasok ang mga unvaccinated individuals sa mga indoor at outdoor dining restaurants at iba pang establisimiyento ng mga kainan maging ang mga leisure o social trips patungo sa mga malls, hotels, events, at venues.

Bawal din ang pagbiyahe o pagsakay ng mga hindi bakunadong residente sa mga pampublikong transportasyon.

Hihingan naman ang mga onsite workers ng RT-PCR COVID-19 testing kada ikalawang linggo na sila mismo ang gagastos sa naturang test bago payagang makapasok sa trabaho.

Ang mga lalabag sa nasabing ordinansa sa unang pagkakataon ay pagmumultahin ng P3,000; P4,000 sa ikalawang paglabag habang P5,000 o pagkakakulong ng hindi lalampas sa anim na buwan.

Samantala, ipapatawag naman ang mga magulang ng mga menor de edad na mahuhuling lalabag sa unang pagkakataon at padadaluhin sa seminar; pagmumultahin naman ng halagang P4,000 multa at P5,000 naman o pagkakulong ng hindi lalampas ng anim na buwan sa ikalawang paglabag sa naturang ordinansa habang at pagkakulong naman ng hindi lalampas ng anim na buwan sa ikatlong paglabag.pero depende pa rin sa desisyon ng korte.—sa panulat ni Angelica Doctolero

Umabot na sa 688 ang kabuuang bilang ng mga biktima ng human trafficking na nailigtas ng Bureau of Immigration (BI) sa nakalipas na taon.

Ayon sa mga tauhan ng Travel Control and Enforcement Unit (TCEU) ng BI, umaabot naman sa 13, 680 ang bilang ng Overseas Filipino Workers (OFWs) ang hindi pinayagang makaalis dahil sa improper documentation kung saan 491 dito ay pinaniniwalaang biktima ng human trafficking.

Sa pahayag ni Immigration Commissioner Jaime Morente, nai-turn over na sa Inter-Agency Council Against Traffikcing ang mga biktimang OFWs upang matulungan at isailalim sa imbestigasyon.

Samantala, nai-turned over naman sa Philippine Overseas Employment Administration (POEA) ang nasa 197 minors na may hawak ng kuwestiyonableng overseas work permits at job contracts.

Sinabi pa ni morente na nasa 326 na minors ang na-intercept ng mga tauhan ng BI  sa NAIA kung saan 18 dito ang nag-assume ng identities ng ibang tao habang 34 naman ang nabisto ng forensic laboratory na may hawak ng pekeng dokumento.—sa panulat ni Angelica Doctolero

Aarangkada na ngayong araw, Martes, January 18, hanggang January 24, 2022 ang ikatlong linggong taas-singil sa presyo ng produktong petrolyo.

Papalo sa halos P1 hanggang mahigit P2 ang dagdag singil sa presyo ng gasolina, diesel at kerosene.

Ayon sa kumpaniyang Chevron Philippines Inc. Caltex, Flying V, Petron Corp., Pilipinas Shell Petroleum Corp., at Seaoil Philippines Inc., maglalaro sa P0.90 centavos ang dagdag presyo sa kada litro ng gasolina; P0.80 centavos sa diesel; habang P2.30 centavos naman ang singil sa presyo sa kada litro ng kerosene.

Ang Cleanfuel, Petro Gazz, Ptt Philippines Corp., at Unioil Petroleum Philippines Inc., naman ay magpapatupad ng kaparehong pagbabago sa presyo pero hindi kasama dito ang kerosene.

Ipatutupad ang taas-singil sa presyo ng gasolina mamayang alas-sais ng umaga maliban sa Cleanfuel na magpapatupad mamayang alas-kuwatro ng hapon habang ang Caltex naman ay magpapatupad ng alas-dose ng tanghali sa parehong araw.

Nabatid na patuloy na naghihigpit ang supply kasabay ng pagtaas ng demand ng langis dahil sa banta ng COVID-19 at panibagong Omicron variant sa bansa..—sa panulat ni Angelica Doctolero