DWIZ 882

 Nasawi ang dalawa habang tatlo naman ang sugatan matapos na bumaliktad at mahulog ang isang Asian Utility Vehicle (AUV) sa Buguias, Benguet.

Kinilala ang mga nasawi na sina Marceline Dada-An Calimodag, 51 anyos at Tyler Soriano Bitayan, 58 anyos, habang ang mga nasugatan naman ay kinilalang sina Maricel Dada-An Calimodag, 25 anyos, Tony Lipawen Calimodag, 71 at Helen Lipawen Calimodag, 53 anyos.

Ayon sa Cordillera Police, bumabagtas sa matarik na lugar ang Toyota FX sakay ang mga biktima nang magkulang sa kalkula ang driver at mahagip ang isang mataas na bahagi ng kalsada sanhi upang bumaligtad ang kanilang sasakyan at tuluy-tuloy na nahulog sa 40 metro na lalim na bangin.

Dagdag pa ng otoridad, lahat ng mga biktima ay isinugod agad sa ospital matapos maiahon ng rescuers ang mga biktima mula sa bangin pero hindi umabot nang buhay sina Calimodag at Bitayan.—sa panulat ni Mara Valle

Nananawagan si Kapatiran party at tropang Leni-Kiko senatorial candidate, Atty. Alex Lacson, na dapat ay tingnan ng senado ang umano’y 48-56 million pesos na kinikita kada araw ni Dennis Uy at kanyang Udenna Corporation mula sa Malampaya gas field.

Ayon kay Lacson, nag-iimbestiga aniya mga ito sa pagbenta ng Chevron ng 45% participating interest ng contractor’s portion ng malampaya kay Dennis Uy at Udenna Corporation nito sa halagang 565 million dollars noong Marso, 2020.

Dagdag ng senatorial bet na dahil natural na yaman ng bansa ang malampaya gas field ay marapat lamang na taong bayan ang makinabang dito at hindi dumiretso sa bulsa ng mga indibidwal na negosyante at mga dayuhang mangangalakal.

Dapat umanong mapunta ang pera sa gobyerno upang magamit ang pondo para sa bagyong Odette victims, mga nangangailangan ng ayuda dahil sa covid, at para sa proteksyon ng mga health workers.

Nabatid na si Alex Lacson ay matagal nang kumakatawan sa kampanya sa mabuting pamamahala ng administrasyon upang makatulong sa pagkamit ng kanilang mga layunin sa pag-unlad at mga programa sa pagbabago.

Samantala, ang naturang alegasyon ni lacson ay base sa ulat sa Commission on Audit (COA) na nakakuha ang Chevron ng average na 20.47 billion pesos kada taon mula 2018 hanggang 2020.

Umabot na sa 345 ang bilang ng mga pasyenteng nagpositibo sa COVID-19 sa Philippine General Hospital (PGH).

Ayon sa pamunuan ng ospital, maraming mga health workers ang tinatamaan ngayon ng COVID-19 kung saan, karamihan sa mga kaso ay nakakaranas ng mild symptoms.

Sinabi ni PGH Spokesperson Dr. Jonas del Rosario, puno na ng mga pasyente ang kanilang ospital kung saan, ito na ang pinaka mataas na bilang ng mga na-admit simula ng magsimula ang pandemiya.

Sa ngayon, 65% ng mga tinamaan ng COVID-19 sa nasabing ospital ay nasa mild cases; 25 percent ang nasa severe cases habang 10% naman ang nasa critical cases.—sa panulat ni Angelica Doctolero

Nagkasa ng operasyon ang Quezon City government kaugnay sa pagpapatupad ng “No Vaccination, No Ride” policy na ipinatutupad ng Department of Transportation (DOTR).

Ayon sa pamahalaang lokal ng Quezon City, lilimitahan ang galaw ng mga unvaccinated individuals maliban nalang kung lalabas para sa trabaho, pagkuha ng pagkain, o medical services, dine-in at iba pang leisure activities.

Kailangan ding sumailalim sa covid-19 testing kada dalawang linggo sa sarili nilang gastos ang mga hindi bakunadong residente.

Ang mga lalabag sa naturang panukala ay pagmumultahin ng P500 sa first offense, P1,000 sa second offense at P3,000 sa mga susunod na paglabag habang ang mga establisimyento naman na lalabag sa kautusan ng pamahalaang lokal ay mahaharap din sa kaukulang parusa.—sa panulat ni Angelica Doctolero

Kumpiyansa ang Bangko Sentral ng Pilipinas (BSP) na maaabot ang pito hanggang siyam na porsyentong growth rate ng bansa sa gitna ng lumalalang bilang ng kaso ng COVID-19.

Ayon kay BSP Governor Benjamin Diokno, kayang mapagtagumpayan ng bansa ang mga hamon na kinakaharap ngayong pandemiya.

Tiniyak din ni Diokno na may sapat na cash buffers para sa external shocks at manageable bad debt levels maging ang bumabagal na inflation at sumisiglang bank lending dahil  nananatiling matatag ang banking system sa Pilipinas.—sa panulat ni Angelica Doctolero

Naglaan ng dalawang bilyong pisong halaga ng pondo ang gobyerno para palawigin ang bike lane network sa buong bansa.

Ayon kay Eldon Joshua Dionisio, Executive Assistant at Planner ng Active Transport Team ng DOTR, prayoridad ng pamahalaan ang paggawa ng mas ligtas na mga kalsada para sa mga siklista.

Sinabi ni Dionisio na kabilang din sa mga programa ngayong taon ang replacement at maintenance ng mga sirang bollard at pagkukumpuni sa mga kalsada maging ang pag-upgrade sa mga bike lane sa kasalukuyan.

Bukod pa diyan, maglalagay din ng end of trip facilities tulad ng bike rack, bike repair at bike sheds ang ahensya.

Dagdag pa ni Dionisio na nakatakda ring bumili ang ahensya ng bike counting technology kung saan, isasabay ang pagpapalawig sa bike lane network partikular sa Metro Manila, Metro Cebu at Metro Davao.

Sa ngayon, target ding ikasa ng DOTR ang bike share system para makatulong sa kasalukuyang transport system sa Metro Manila.—sa panulat ni Angelica Doctolero

Hinoldap ang isang babaeng online seller habang nagla-live selling sa Caloocan City.

Base sa video na ipinost ng seller, makikitang abala ito sa pagbebenta ng kaniyang mga halaman nang lumapit sa kaniyang likuran ang isang lalaking naka-helmet suot ang itim na jacket at facemask saka tinutukan ng baril ang biktima.

Ayon sa biktima, itinulak siya ng suspek at pinagbantaan saka kinuha ang cellphone na kaniyang ginagamit sa paghahanap buhay saka ito tumakas sa hindi malamang direksiyon sakay ng isang motorsiklo.

Pinaghahanap na ngayon ng Caloocan City Police ang lalaking suspek sa pangho-holdap.

Samantala, nagpaalala naman sa mga residente ang Caloocan City Police na magdoble ingat sa paggamit ng gadgets upang maiwasan ang insidente lalo na ngayong panahon ng pandemiya.—sa panulat ni Angelica Doctolero