DWIZ 882

Nanatiling mataas ang bilang ng mga tinatamaan ng COVID-19 sa hanay ng Philippine National Police (PNP) mula nang pumutok Omicron variant sa bansa.

Batay sa datos ng PNP Health Service, pumalo na sa 46,049 ang kabuuaang kaso ng virus sa hanay ng PNP matapos itong madagdagan ng 331 bagong kaso.

Mula sa nasabing bilang, aabot sa 3,796 ang kabuuang bilang ng mga aktibong kaso sa hanay ng Pulisya.

Gayunman, sa pambihirang pagkakataon ay mas mataas ang naitalang bilang ng mga gumaling ngayong araw na nasa 550 kumpara sa mga naitalang bagong kaso.

Ito ang dahilan kaya’t umakyat na sa 42,128 ang kanilang total recoveries habang wala namang naitalang bagong nasawi kaya’t nakapako sa 125 ang kanilang death toll.   —ulat mula kay Jaymark Dagala (Patrol 9)

Inihiyag ni House Speaker Lord Allan Velasco, na suspendido muna ngayong buong linggo ang sesyon sa plenaryo ng Kamara at ipagpapatuloy na lamang sa Lunes, January 24, bunsod ng patuloy na pagsipa ng kaso ng COVID-19 sa National Capital Region.

Ito’y upang mapigilan aniya ang pagkalat pa ng virus na siyang tumama rin sa higit pitumpung  empleyado at miyembro ng Kongreso.

Ani, Velasco, umaasa siyang mas bubuti na ang sitwasyon sa Lunes upang matapos na ang ilang mga nakabinbin na panukalang batas bago mag-adjourn para sa election period.

Matatandaang, kahapon ay na-aprubahan na sa ikatlo at huling pagbasa ang kabuuang labing siyam na nakabinbing panukalang batas.  —ulat mula kay Tina Nolasco (Patrol 11)

Balik normal na muli ang operasyon ng Light Rail Transit o LRT Line 1 na biyaheng Recto sa Maynila hanggang Antipolo sa Rizal.

Ito’y makaraang magpatupad ng provisional operations ang naturang mass transit mula Pureza hanggang Antipolo at pabalik.

Ayon sa pamunuan ng Light Rail Transit Authority o LRTA, bunsod ng nangyaring sunog sa carriageway sa pagitan ng Pureza at Legarda stations’.

Sa kasalukuyan ay mayruong 8 tren na binubuo ng 32 bagon ang bumibiyahe ngayon in full operations at may headway itong 10 minuto.  —ulat mula kay Jaymark Dagala (Patrol 9)

Hanggang sa makakaya ng PhilHealth, dapat nitong lawakan ang tulong para sa mga may mental at behavioral condition.

Ito ang inihayag ni Senator Bong Go, Chairman ng Senate Committee on Health,  makaraang igiit  sa PhilHealth na bumuo sa lalong madaling panahon ng komprehensibong Mental health package.

Gawin anyang bahagi ng health package ang konsultasyon at iba pang outpatient services.

Hinikayat din ng Senador ang Department of Health na gawing accessible sa mas maraming Filipino ang mga gamot para sa mental health na lubhang mataas ang presyo.

Mahalaga anyang makarating sa mga malalayo at liblib na lugar ang katulad na serbisyo ng National Center for Mental Health sa Mandaluyong City.

Ang panawagan ay kasunod ng pahayag ng mga eksperto na dumami at patuloy pang tumataas ang nagkakaroon ng depresyon at Mental health problem sa gitna ng pandemya.

Nahihirapan naman daw ang mga Mental health patients na ma-admit sa mga government at private na psychiatric  facilities dahil sa dami ng requirements bukod sa malaki ang bayarin.  —ulat mula kay Cely Ortega Bueno (Patrol 19)

Mahigit 100 commuters na hindi bakunado ang pinababa sa mga Public Utility Vehicle sa unang araw ng implementasyon ‘No vaccination, no ride’ policy ng Department of Transportation sa Metro Manila.

Nagpakalat ang pamahalaan sa tulong ng PNP-HPG at I-ACT, ng mga tauhan sa mga pangunahing lansangan sa National Capital Region para mag-inspeksiyon kung sino ang mga lumalabag sa polisiya.

May ilan ding mga driver na sinita at pinatigil sa pamamasada matapos matuklasang hindi bakunado o kung hindi naman mayroon pa lamang isang dose ng vaccine.

Samantala, exempted naman ang mga mayroong medical conditions na may balidong rason, mga unvaccinated na bibili ng essential goods o services at mga patungo sa vaccination sites.   —sa panulat ni Mara Valle

Tumatanggap na ng aplikasyon ang Food and Drug Administration (FDA) para sa mga covid self-test kits, ngunit nagkalat na ang bentahan nito sa Shopee at Facebook marketplace.

Binebenta sa ang COVID-19 rapid test kit sa Shopee sa halagang 859 pesos kada limang piraso, habang 1, 589 naman ang sampung piraso ng kits na may tatak na Green Spring.

Sa Facebook marketplace naman ay makakabili ng antigen nasal test kit sa halagang 310 pesos kada piraso at 330 pesos naman kada piraso sa oral test kit.

Batid na dahil sa muling pagdami ng kaso ng COVID-19 sa bansa, marami na nang nagkakasakit at nagte-test na sa sarili.—sa panulat ni Mara Valle