DWIZ 882

Walang magiging epekto sa impeachment trial ni Vice President Sara Duterte ang arrest warrant na inilabas laban sa kaniya kaugnay ng kasong grave threats, ayon kay public interest lawyer Atty. Howard Calleja.

Paliwanag ni Calleja, walang immunity from suit ang vice president sa ilalim ng 1987 Constitution. Aniya, presidential immunity lamang ang malinaw na nakasaad sa Konstitusyon.

Dagdag niya, magkaiba ang impeachment at criminal case dahil magkahiwalay ang kanilang proseso at mga parusa. Dahil dito, maaaring maharap sa kasong kriminal at mabigyan ng arrest warrant ang isang vice president habang nasa puwesto. Ngunit, maaari pa rin siyang magpiyansa habang hindi pa final ang desisyon at habang maaari pang iakyat ang kaso sa Supreme Court.

Para kay public interest lawyer Atty. Howard Calleja, hindi na dapat isama sa bilang ng mga bobotong senador ang mga nagtatago, nakakulong, suspendido, o hindi makadalo sa impeachment trial ni Vice President Sara Duterte.

Aniya, nasa 20 na lamang ang mga aktibong senador na nakikibahagi sa paglilitis, kaya hindi aniya makatarungang isama sa computation ng threshold ang mga hindi naman nakadalo o nakalahok sa mga pagdinig.

Kahit aniya hindi bumoto ang isang absent na senador, maaari pa rin itong makaapekto sa kinakailangang boto para sa conviction dahil kasama pa rin siya sa kabuuang bilang ng mga miyembro.

Dagdag pa ni Calleja, hindi dapat magkaroon ng sitwasyon kung saan ang isang hindi dumalo sa paglilitis ay nakaaapekto sa resulta ng botohan, dahil maaari itong maging hindi makatarungan sa usapin ng accountability at justice system.

Para kay kay Project NOAH (Nationwide Operational Assessment of Hazards) Executive Director Prof. Mahar Lagmay, kailangan nang i-review ang mga flood management master plan at isaalang-alang ang epekto ng climate change, partikular ang posibilidad ng mas matitinding pag-ulan at pagbaha.

Aniya, dapat isama sa computer modeling ang hugis ng lupain, datos ng mga nakaraang pag-ulan at projection ng mas matitinding pag-ulan dulot ng climate change.

Sa ganitong paraan, makikita muna kung aling mga lugar ang mapoprotektahan, alin ang posibleng bahain, at kung gaano kaepektibo ang isang proyekto bago gumastos ng bilyun-bilyong piso.

Dagdag pa ni Lagmay, makatutulong ang siyensya at teknolohiya upang matukoy kung alin sa mga proyekto ang dapat ituloy at kung alin ang maaaring hindi maging epektibo.

Matatandaang nagbigay ng direktiba si Pangulong Ferdinand “Bongbong” Marcos Jr. na palakasin ang flood resiliency sa bansa at utos ni Department Of Public Works And Highways (DPWH) Secretary Vince Dizon na i-update ang mga flood management master plan.

Samantala, naglaan ang Department of Budget and Management (DBM) ng ₱1 bilyon para sa paggamit ng artificial intelligence sa flood forecasting at disaster prevention sa pamamagitan ng Project NOAH.

Kinuwestiyon ni Senador Christopher “Bong” Go ang timing ng paglabas ng warrant of arrest laban kay Vice President Sara Duterte kaugnay sa kasong grave threats.

Ayon kay Senador Go, ikinagulat niya kung bakit ngayon lamang inilabas ang warrant habang gumugulong ang impeachment trial ng bise presidente sa Senado.

Gayunman, kumpiyansa ang senador sa kakayahan ng pangalawang pangulo na harapin ang mga nararanasang legal at political challenges.

Matatandaang inilabas ng Quezon City Regional Trial Court Branch 98 ang warrant matapos makitaang may probable cause upang litisin ang bise presidente sa tatlong bilang ng grave threats kaugnay sa pagbabanta umano sa buhay nina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.

Itinakda naman ang 120-thousand pesos na piyansa para sa bawat kaso. | Sa panulat ni Reianne Antiquina

Pinalagan ni Batangas First District Representative Leandro Leviste ang National Bureau of Investigation matapos ihayag ng ahensya na magsasampa ito ng reklamong qualified human trafficking laban sa kanya at anim na iba pa kaugnay ng umano’y “honey trap” plot laban kay Executive Secretary Ralph Recto.

Sa isang social media post, tinawag ng kongresista na “National Bureau of Imbento” ang NBI dahil sa pag-iimbento umano ng pekeng balita gamit ang buwis ng bayan.

Una nang sinabi ni NBI Director Melvin Matibag na kumpleto na ang kanilang imbestigasyon at ihahain na sa Department of Justice ang qualified human trafficking complaint laban kina Leviste, dating Negros Oriental Rep. Jacinto “Jing” Paras at lima pang indibidwal.

Nag-ugat ito sa alegasyon ng isang talent manager na itinago sa pangalang “Ken” na may planong gumamit umano ng ilang babae upang gumawa ng pekeng salaysay laban kay Executive Secretary Recto. | Sa panulat ni Reianne Antiquina

Umabot sa 52.8 billion pesos ang National Tax Allotment (NTA) na natanggap ng Davao City at mga barangay nito mula 2022 hanggang 2026.

Ayon kay Palace Press Officer Claire Castro, kabilang dito ang 41.63 billion na NTA para sa Davao City government at 11.17 billion para sa mga barangay ng lungsod.

Ginawa ni Castro ang pahayag matapos igiit ni Davao City First District Representative Paolo Duterte na “zero budget” ang kanilang lungsod sa loob ng apat na taon.

Bukod sa NTA, sinabi ni Castro na nakatanggap din ang Davao ng iba pang pondo sa ilalim ng General Appropriations Act sa parehong panahon.

Kabilang anya rito ang mga pondo para sa National Wealth, incremental collections mula sa VAT, Local Government Support Fund, at iba pang programa, na kabuuang umabot sa 314.48 million pesos.

Kung pagsasamahin ang NTA at iba pang GAA releases, nasa 53.11 billion pesos ang kabuuang pondong nakatalang natanggap ng Davao City at mga barangay nito mula 2022 hanggang 2026.

Dagdag pa ng Palace official, hindi pa kasama rito ang mga indibidwal na programa at proyekto ng iba’t ibang national government agencies sa lungsod, kabilang ang DSWD, DPWH, DOTR at Department of Agriculture. | Sa panulat ni Anjo Riñon

Mahalaga ang political will sa pagpapatupad ng mga kinakailangang hakbang upang matugunan ang problema sa pagbaha at epekto ng climate change sa bansa.

Ayon kay Palace Press Officer Claire Castro, mahalaga rin ang pakikipagtulungan ng publiko sa mga hakbang na isasagawa ng pamahalaan upang maging epektibo ang mga anti-flood measures.

Ipatutupad anya ng gobyerno ang mga kinakailangang aksyon, kabilang ang pagtanggal sa mga sagabal at bara sa mga daluyan ng tubig na nakaaapekto sa maayos na pag-agos ng tubig.

Binigyang-diin ni Castro na kailangan ang katatagan at determinasyon sa pagpapatupad ng mga hakbang upang makamit ang layuning mabawasan ang pagbaha sa iba’t ibang bahagi ng bansa.

Kasabay nito, hinikayat ang mga mamamayan na makiisa sa mga programa ng pamahalaan, partikular sa pagpapanatili ng kalinisan sa mga estero, kanal at iba pang daluyan ng tubig.

Giit pa ng Palace official, hindi na maaaring ipagpaliban ang mga kinakailangang hakbang dahil patuloy na lumalala ang epekto ng pagbaha, na pinalalala rin ng climate change.

Naglaan ang Philippine Red Cross (PRC) ng paunang US$100,000 o humigit-kumulang ₱6.2 milyon bilang humanitarian assistance para sa mga komunidad na matinding naapektuhan ng pagbaha at landslide sa Nepal.

Inihayag ni PRC Chairman Richard J. Gordon ang commitment sa pulong kasama ang Nepal Red Cross Society (NRCS) at iba pang National Societies, kung saan ipinaabot ng PRC ang pakikiramay at pakikiisa sa mga apektadong Nepalese.

Ayon kay Gordon, nauunawaan ng PRC ang bigat ng sakuna dahil nakaranas na rin ang Pilipinas ng mga mapaminsalang kalamidad.

Handa rin ang PRC na magpadala ng mga tauhan at teknikal na eksperto kung kakailanganin ng NRCS at ng International Red Cross and Red Crescent Movement ng karagdagang suporta sa patuloy na rescue at relief operations.

Matinding pinsala ang iniwan ng kalamidad sa mga komunidad na nakapaligid sa Trishuli River corridor, kabilang ang pagkawasak ng mga tahanan at mahahalagang imprastraktura. Tinatayang 10,000 katao pa rin ang nawawala.

Patuloy ang search and rescue operations ng mga Red Cross teams, kasabay ng pamamahagi ng emergency relief at pagtulong sa mga pamilyang naapektuhan at napilitang lumikas.

Bahagi rin ng commitment ng PRC ang matagal nang humanitarian partnership nito sa Nepal.

Noong tumama ang Magnitude 7.8 na lindol sa Nepal noong 2015, nagpadala ang PRC ng 13-member Search and Rescue team upang tumulong sa paghahanap at pagkuha ng mga survivor at mga nasawi.

Nakipagtulungan ang team sa international rescue groups sa ilan sa mga lugar na pinakamatinding tinamaan ng lindol at kalaunan ay tumulong din sa post-earthquake operations, kabilang ang water and sanitation at shelter assistance.

Maaaring idulog sa Supreme Court ng House Prosecution Team ang isyu sa 16-vote threshold na kailangan para ma-convict si Vice President Sara Duterte.

Ito ang sinabi ni House Impeachment Adviser at Spokesperson Robert Ace Barbers, na hindi makatwiran ang 16-votes requirement dahil hindi naman kumpletong nakadadalo sa impeachment trial ang ilang senator-judges.

Kabilang dito sina Senator Jinggoy Estrada at Rodante Marcoleta na nakakulong, habang si Senador Ronald “Bato” Dela Rosa ay hindi makadalo dahil sa warrant of arrest ng International Criminal Court (ICC).

Iginiit ni Barbers na mahalagang ang boboto sa hatol ay nakadinig ng mga testimonya, nakapagsuri ng ebidensya at nakita ang demeanor ng mga testigo.

Pero sa ngayon, hindi pa ito prayoridad ng prosekusyon dahil nakatutok sila sa presentasyon ng mga testigo at ebidensya.

Sinabi ni Barbers na maaari lamang nilang dalhin sa Supreme Court ang isyu kapag sa tingin nila ay maghahatid ng pinsala o may ma-aagrabyado sa pagpapatupad ng numero. | via Geli Mendez (Patrol 30)

Iginiit ni House Impeachment Adviser at Spokesperson Robert Ace Barbers na dapat maipaliwanag at ma-account nang maayos ang bawat pisong confidential funds ni Vice President Sara Duterte.

Aniya, hindi ito usaping politika o personalidad, kundi pananagutan sa pera ng bayan.

Batay sa Article 1 ng impeachment case, natukoy ang misuse, misappropriation at iregular na liquidation sa P612.5 million na confidential funds kung saan, P500 million ay nagastos sa ilalim ng OVP at P112.5 million sa DepEd.

Binigyang-diin Barbers ang kahalagahan na malaman at malinawan ang publiko kung saan napunta ang pondo ng gobyerno at paano ito ginastos ng OVP at DepEd sa ilalim ng pamamahala ni VP Sara.

Ayon kay Barbers, sa loob ng 21 araw ng paglilitis, ilang testimonya ang nagpaiwan ng mahahalagang tanong: Nasaan ang pera, saan ito ginastos, at sino ang dapat managot?

Iginiit din ni Barbers na dapat marinig ng mga senador-judge at ng publiko ang mga ebidensyang inilatag ng prosecution panel.

Malinaw aniya na matibay at mabibigat ang mga inilalatag na ebidensya at inihaharap na mga testigo kaya dapat itong mapakinggan hindi lamang ng senator-judges kundi ng taumbayan.

Sinabi naman ni Manila Rep. Benny Abante na hindi ito usaping politika, kundi usapin ng katotohanan, transparency, at accountability sa pampublikong pondo. | via Geli Mendez (Patrol 30)