DWIZ 882

Hindi dumalo sa Day 22 ng impeachment trial ni Vice President Sara Duterte si dating Department of Education o DepEd Special Disbursing Officer Edward Fajarda.

Ayon kay House Prosecutor Joel Chua, nagpadala kagabi ng liham sa prosecution si Fajarda tungkol sa kaniyang medical condition.

Batay sa liham ni Fajarda, iminungkahi ng kaniyang doctor na palawigin ang kaniyang pagpapahinga matapos ma-stroke.

Dahil dito, hiniling ng prosecution sa Senate Impeachment Court na magkaroon ng stipulation sa defense team upang hindi na kailanganin pa ang testimonya ni Fajarda at hindi na ito sumailalim bilang witness stand.

Agad namang pumayag ang depensa, maging si Senate Presiding Officer Chiz Escudero.

Kabilang sa naging stipulation ang pagtatalaga sa posisyon ni Fajarda sa ilalim ng pamumuno noon ni VP Sara sa DepEd.

Maging ang pag-encash ni Fajarda at pag-turn over ng confidential funds kay Col. Dennis Nolasco na nasa dalawang tig-P37.5 million.

Sa ngayon, sumentro na ang prosecution sa pagharap ng ikalawang testigo ngayong linggo na si PSA Assistant National Statistician Marizza Grande para patunayan na walang record ng kasal, kapanganakan at kamatayan ang mga pangalang lumabas sa acknowledgement receipts na tumanggap ng rewards sa ilalim ng confidential funds ng OVP at DepEd. | Sa panulat ni Geli Mendez

Nasabat ng Land Transportation Office (LTO)ang dalawang SUV matapos maaktuhang gumagamit umano ng pekeng Armed Forces of the Philippines (AFP) at LTO plates, blinker at “wang-wang.”

Sa operasyon, natuklasang nakatago sa loob ng mga sasakyan ang kanilang mga orihinal na plaka habang nakakabit at ginagamit sa kalsada ang mga hindi awtorisadong plaka.

Nakumpiska rin ang pekeng conduction sticker, blinker at “wang-wang,” gayundin ang ilang sticker na may pangalan o nagpapahiwatig ng koneksyon sa isang miyembro ng Kongreso.

Pansamantalang nasa kustodiya ng LTO ang dalawang sasakyan habang isinasagawa ang beripikasyon at imbestigasyon sa mga posibleng paglabag.

Giit ni LTO Assistant Secretary Markus V. Lacanilao, walang sinuman ang dapat gumamit ng pekeng plaka o pagkakakilanlan para makaiwas sa batas-trapiko o makahingi ng espesyal na pagtrato.

“Hindi porke may kakilala ka sa gobyerno ay pwede ka nang gumamit ng pekeng plaka o pagkakakilanlan upang makaiwas sa batas-trapiko o magkaroon ng espesyal na pagtrato sa lansangan, maling-mali po iyon,” ani Lacanilao.

Naniniwala si House Prosecutor Terry Ridon na hindi makabubuti sa kaso ni dating Pangulong Rodrigo Duterte ang mga pahayag ni Vice President Sara Duterte na wala siyang tiwala sa mga law enforcement agencies at justice system ng bansa.

Ayon kay Congressman Ridon, taliwas ang pahayag ng bise presidente sa panawagan ng kanilang kampo na litisin sa Pilipinas ang dating pangulo.

Anya, dapat ding mag-ingat ang mga Duterte, partikular na ang bise presidente, sa kanilang mga pahayag dahil posible itong makaapekto sa kaso ng dating pangulo. | Sa panulat ni Reianne Antiquina

Umalma si Davao City 1st District Representative Paolo “Pulong” Duterte sa umano’y paggamit ni Presidential Communications Office (PCO) Undersecretary and Palace Press Officer Atty. Claire Castro ng National Tax Allotment (NTA) bilang sagot sa usapin ng congressional district allocation para sa mga distrito ng Davao City.

Sa inilabas niyang pahayag, iginiit ni Pulong na magkaiba ang NTA at congressional district allocation.

“Ang NTA ay automatic appropriation para sa mga LGU. Alam naman nating lahat iyan. Hindi ko sinabi na walang NTA ang Davao City. In fact, kung may NTA ang Davao City, edi salamat. Automatic nga eh,” ayon kay Duterte.

Hinamon din niya ang kabilang panig na ilabas ang General Appropriations Act (GAA) at mga rekord ng Department of Budget and Management (DBM) upang ipakita umano ang appropriated congressional district budget para sa bawat congressional district ng Davao City mula 2022 hanggang 2026.

Giit ni Pulong, kung walang maipakitang dokumento tungkol sa congressional district allocation, nananatili umano ang kaniyang punto.

Sa huling bahagi ng kanyang pahayag, ibinalik naman ni Pulong ang usapin sa flood control projects.

Kinuwestiyon niya kung bakit tila hindi umano binibigyang-pansin ang sinasabi niyang “grave threat” sa buhay ng mga Pilipino dahil sa umano’y palpak at kinurakot na flood control projects.

“Dahil ba mismong amo mo ang tatamaan?” dagdag pa niya.

Muli rin niyang binigyang-diin ang pahayag ni Vice President Sara Duterte na “di puwedeng walang managot.”

Kinumpirma ng National Bureau of Investigation (NBI) na mayroon na silang impormasyon tungkol sa kinaroroonan ni Senador Ronald “Bato” dela Rosa.

Ayon kay NBI Director Melvin Matibag, nagpapatuloy ang kanilang manhunt operations para sa senador na nagtatago simula pa noong Mayo.

Anya, hinihintay na lamang nila ang tamang pagkakataon para hulihin ang mambabatas.

Matatandaang naglabas ng arrest warrant ang International Criminal Court laban kay Senador dela Rosa kaugnay sa kasong crimes against humanity dahil sa war on drugs campaign ng Duterte administration. | Sa panulat ni Reianne Antiquina

Pinasimple ng Agricultural Credit Policy Council (ACPC) ang proseso ng pagkuha ng emergency loan para sa mga magsasaka at mangingisdang apektado ng pagbaha.

Sa ilalim ng Calamity Loan Component ng Agri-Recover Program, maaaring makahiram ng hanggang 35,000 pesos ang mga kwalipikadong maliliit na magsasaka at mangingisdang nakarehistro sa Registry System for Basic Sectors in Agriculture (RSBSA).

Walang interes at walang kailangang kolateral ang pautang, at maaaring bayaran sa loob ng hanggang tatlong taon.

Ayon sa ACPC, binawasan na rin ang mga dokumentong kailangan para mapabilis ang pagproseso.

Kailangan lamang na nakarehistro ang aplikante sa RSBSA at may valid bank o financial account kung saan ide-deposito ang naaprubahang loan.

Layon ng programa na makapagbigay agad ng puhunan para muling masimulan ng mga apektadong magsasaka at mangingisda ang kanilang produksiyon at pagkakakitaan. | via Jenn Patrolla (Patrol 38)

Hinimok ng Integrated Bar of the Philippines si Ombudsman Jesus Crispin Remulla ng maghain ng pormal na reklamo laban sa umano’y tiwaling miyembro ng hudikatura.

Ito’y matapos hamunin ng Supreme Court si Ombudsman Remulla na magsampa ng reklamo kasama ang mga sumusuportang ebidensya, kasunod ng pahayag nito na dapat magsagawa ng “soul-searching” hudikatura sa gitna ng mga alegasyon tungkol sa korapsyon.

Ayon kay I.B.P. National President Allan Panolong, sinusuportahan nila ang pahayag ng Supreme Court na bagama’t seryosong hinaharap ang mga alegasyon ng korapsyon, kinakailangan itong gawing pormal at suportahan ng sapat na ebidensya.

Binigyang-diin ni Panolong na tutol ang IBP sa anumang uri ng pang-aabuso sa kapangyarihan para sa pansariling pakinabang sa loob ng hudikatura.—sa panulat ni Reianne Antiquina

Isinumite na ng Commission on Audit sa Office of the Ombudsman ang limampung fraud audit reports kaugnay sa flood control projects.

Kinumpirma ito ni COA Chairperson Gamaliel Cordoba sa isinagawang budget hearing ng Senado kahapon.

Binigyang-diin Chairperson Cordoba na tinututukan nila ang pag-audit sa mga flood control projects sa Bulacan na itinuturing umano na “ground zero” ng kontrobersiya.

Samantala, sinabi rin ni Cordoba na nagsisilbi bilang mga saksi ang mga COA auditor sa mga kasong may kaugnayan sa flood control na naihain na sa mga korte, o maging sa mga paunang imbestigasyon ng Ombudsman.—sa panulat ni Reianne Antiquina

Nanguna pa rin ang ischaemic heart diseases sa mga pangunahing sanhi ng pagkamatay ng mga Pilipino sa unang dalawang buwan ng 2026.

Batay ito sa provisional data mula sa Philippine Statistics Authority mula Enero hanggang Pebrero.

Kabilang din sa mga nangungunang sanhi ng pagkamatay ang pneumonia, cerebrovascular diseases o stroke, neoplasms o tumor, at diabetes mellitus.

Ipinaalala ng P.S.A. sa publiko ang kahalagahan ng healthy lifestyle, regular health check-ups, maagang diagnosis at pag-iwas sa sakit.—sa panulat ni Reianne Antiquina

Naghain ng “not guilty plea” si dating Department of Public Works and Highways Secretary Manuel Bonoan para sa kasong graft kaugnay sa umano’y pakikipagsabwatan sa paglalagay ng insertions sa pambansang badyet para sa mga proyekto sa flood control.

Matatandaang pinalaya si Bonoan mula sa kustodiya ng Philippine National Police noong Biyernes, Setyembre a-kwatro, matapos alisin bilang kapwa akusado ni Senador Jinggoy Estrada para sa kasong plunder sa Fifth Division ng Sandiganbayan.

Gayunman, nananatili pa rin siyang kapwa akusado ni Senador Estrada sa kasong graft sa Second Division matapos ibasura ng Sandiganbayan ang motion to exclude.

Samantala, ayon kay Ombudsman Jesus Crispin Remulla, nakatakdang gawing state witness ang dating kalihim upang mabigyang-linaw kung paano isinagawa ang flood control scheme. | Sa panulat ni Reianne Antiquina