DWIZ 882

Kinumpirma ni Acting Senate President at Senate Pro Tempore Sherwin Gatchalian na mayroong banta sa seguridad ng Senado.

Ito’y matapos nilang matanggap ang impormasyon mula sa mga otoridad ng National Bureau of Investigation.

Gayunman, sinabi ni Acting SP Gatchalian na hindi niya maaaring isiwalat ang detalye ng intelligence information na kanyang natanggap.

Samantala, tiniyak niya na magpapatupad sila ng mas mahigpit na seguridad sa institusyon.

Matatandaang simula nang magpalit ng liderato sa Senado noong May 11, maraming bilang ng otoridad ang naka-deploy sa paligid ng Senado, bunsod ng sunod-sunod na mga rally gaya ng mga supporter ng Duterte administration.—sa panulat ni Reabelle Medina

Posibleng maantala ang impeachment trial laban kay Vice President Sara Duterte na itinakda sa Hulyo 6.

Ibinabala ito ng legal expert na si Atty. Jayvee Gorospe kung hindi pa magkasundo ang mga senador at maipa-plantsa ang hidwaan sa pagitan ng kampo nina Senator Alan Peter Cayetano at Acting Senate President Sherwin Gatchalian.

Kinuwestyon din ni Atty. Gorospe ang balasahan ng mga committee chairmanship sa Senado kasabay ng pagbibigay-diin na nananatiling bahagi ng mataas na kapulungan ang mga senador na may kinahaharap na kaso o pansamantalang hindi nakadalo sa sesyon.

Samantala, iginiit ni Atty. Gorospe na tanging Korte Suprema ang may kapangyarihang makapagbigay ng pinal na desisyon sa isyung kinahaharap ng Senado.—sa panulat ni Reabelle Medina

Inanunsyo ni Interior Secretary Jonvic Remulla na naaresto na si dating Police Lt. Col. Rafael Dumlao III, ang mastermind sa pagpaslang sa koreanong negosyante na si Jee Ick Joo.

Ayon kay Remulla, inaresto si Dumlao sa bahay nito sa Quezon City 05:00 kaninang umaga.

Matatandaang idinawit si Dumlao sa pagkamatay ni Jee noong 2016 sa loob ng Camp Crame matapos siyang dakpin sa Angeles City, Pampanga upang kuhanan siya ng salapi.

Nadiskubre rin ng korte na sinunog ang katawan ng negosyante bago itinapon sa toilet bowl ang mga abo nito.

Dagdag pa ng kalihim, pinatunayan lang ng pagkaka-aresto kay Dumlao na walang nakatataas sa batas, lalo na kung may dating katungkulan ang isang tao.

Nauna nang na-acquit si Dumlao ng isang lokal na korte sa Angeles noong 2023, ngunit binaliktad ito ng Court of Appeals noong 2024 dahil umano sa “Grave Abuse of Discretion.” — mula sa panulat ni Anjo Riñon

Mahigit 95,000 trabaho ang nakaabang sa mga Pilipinong naghahanap ng trabaho sa mga job fair na isasagawa sa buong bansa sa Biyernes, Hunyo 12, bilang bahagi ng pagdiriwang ng ika-128 anibersaryo ng Araw ng Kalayaan.

Ayon sa Department of Labor and Employment, limampu’t limang job fair ang gaganapin sa iba’t ibang bahagi ng bansa simula Hunyo 10, kung saan mahigit 1,000 local at overseas employers naman ang lalahok at mag-aalok ng mga bakanteng posisyon.

Kabilang sa mga industriyang may pinakamaraming bukas na trabaho ang retail, manufacturing, construction, business process outsourcing, at accommodation and food services.

Kabilang naman sa pinaka-hinahanap na posisyon ang sales clerk o store crew, production operator, construction worker, call center agent, at service crew.

Magkakaroon din ng mga serbisyo para sa pagproseso ng mga dokumento at mga skills training program sa mga venue ng job fair upang mas mapadali ang pag-a-apply ng mga naghahanap ng trabaho.

Hinikayat ng DOLE ang mga naghahanap ng trabaho na samantalahin ang pagkakataon upang makahanap ng angkop na hanapbuhay. | Aya Yupangco (Patrol 5)