DWIZ 882

Nanawagan si House Transportation Committee Vice Chairman at Parañaque 2nd District Representative Brian Yamsuan sa Maritime Industry Authority na magsagawa ng mas mahigpit na pamantayan at maagap na mga hakbang upang maiwasan ang mga trahedya sa karagatan.

Sa ginanap na House Committee on Transportation kaugnay ng paglubog ng M/V Trisha Kerstin 3 sa Basilan noong Enero, na ikinasawi ng mahigit animnapung katao habang labingapat ang nawawala, pinuna ni Yamsuan ang anya’y panandaliang paraan ng pagtugon sa mga aksidente sa maritime sector.

Ayon kay Yamsuan, hindi dapat naghihintay ng sakuna ang mga ahensya bago magpatupad ng mga reporma.

Handa rin anya ang Kamara na tumulong sa MARINA sa pamamagitan ng mga kinakailangang batas, pondo, at iba pang suporta upang mapalakas ang kakayahan nitong mag-regulate at magpatupad ng mga patakaran sa kaligtasan.

Hinimok din ng kongresista ang MARINA na patawan ng mas mabigat na parusa ang mga pabaya nitong third-party surveyors at repasuhin ang mahigit limampung-taong-gulang nitong charter upang matiyak na nakakasabay ito sa mga hamon at pagbabago sa industriya ng transportasyong pandagat.

Planong sampahan ng kasong libel ni House Assistant Majority Leader at Lanao del Sur Representative Zia Alonto Adiong ang mga labingwalong nagpakilalang bagmen na nag-uugnay sa kanyang pangalan sa umano’y pamamahagi ng mga maletang may lamang pera mula kay dating Congressman Zaldy Co.

Ayon kay Adiong, sa una ay binabalewala niya lamang ang mga alegasyon dahil walang katotohanan ang mga ito; pero dahil umabot na ang isyu sa Senado, kanya nang iko-konsidera ang paghahain ng kaso.

Malinaw para kay Adiong na ginagamit umano ang Senado para ilihis ang atensyon ng publiko mula sa impeachment proceedings.

Hindi lang anya pag-atake sa ilang indibidwal ang isyu ngayon, kundi ginagamit na rin ito para bihagin ang Senado at ilihis ang tunay na usapin sa impeachment laban kay Vice President Sara Duterte.

Dagdag pa ni Adiong, naantala ang mga trabaho ng mga mambabatas, partikular ang pagpasa ng mga panukala, tulad ng mga priority measures ng administrasyon sa patuloy na pag-uusisa sa mga alegasyon.

Dismayado si Adiong na nauubos sa mga kontrobersiya ang oras ng Senado, kaya nabalam ang pagpasa sa mga mahahalagang panukala ng mga batas na para naman sa kapakanan ng mga Pilipino.

Nagpahayag ng pagkadismaya si Acting Senate President Sherwin Gatchalian sa hindi pagdalo ng labingwalong dating bodyguard at bagmen ni dating Congressman Zaldy Co sa hearing at consultative meeting ng Senate Blue Ribbon Committee ukol sa flood control scandal.

Ayon kay Gatchalian, ito ang pagkakataon para masabi ng mga tinaguriang “Maleta Boys” ang katotohanan sa likod ng anomalya at korapsyon sa flood control programs.

Hindi anya dapat na mamimili ng lugar kung saan nila ilalahad ang mga alegasyon sa katiwalian sa flood control, at maganda sanang pagkakataon na dumalo sila at pinanindigan ang alegasyon laban sa korapsyon.

Samantala, sinabi ni Senador Erwin Tulfo na nasa opisina ni Senador Robin Padilla si Atty. Levi Baligod at ang mga “Maleta Boys.”

Matatandaang inimbitahan ang mga ito sa organizational meeting ng Blue Ribbon Committee ngayong araw, pero kahit dumating sila sa Senado, sa tanggapan sila ni Padilla nagpunta sa halip na sa session hall kung saan nagpapatuloy ang pagdinig ng Blue Ribbon Committee.

Tinawag ni Senate Blue Ribbon Committee Chairman Erwin Tulfo na “haoshao” ang anya’y public hearing umano nina dating Blue Ribbon Chairperson Pia Cayetano, dating Vice Chairman Rodante Marcoleta, at Senador Alan Peter Cayetano kaugnay ng ginawang pagharap at pagtestigo ng labingwalong nagpakilalang dating bodyguard at bagmen ni dating Congressman Zaldy Co.

Ayon kay Sen. Tulfo, sa naturang “haoshao” o bogus na public hearing, hinayaan ang mga tinaguriang “Maleta Boys” na mag-akusa at pangalanan ang ilang opisyal ng gobyerno at mga mambabatas sa mga umano’y dinalhan ng male-maletang pera mula sa kickback sa flood control projects.

Pero wala anyang basehan, walang dokumento, walang resibo, at walang anumang patunay sa kanilang mga naging paratang.

Hindi rin anya dapat payagan na basta na lang may nagtutungo sa Senado para mag-akusa ng walang anumang basehan at ebidensya.

Suportado ng pito sa bawat sampung Pilipino ang pagsasagawa ng Pilipinas at mga kaalyadong bansa ng joint military exercises sa West Philippine Sea.

Batay ito sa tugon ng Masa Survey na isinagawa ng OCTA Research sa isanlibo dalawangdaang respondents noong Marso19 hanggang 25.

Lumabas sa survey na kinomisyon ng Armed Forces of the Philippines na 71% ng mga adult Filipino ang naniniwalang nakatutulong ang joint military exercises o patrols upang palakasin ang seguridad sa pinag-aagawang karagatan habang 14% ang naniniwalang nagdudulot ito ng peligro.

Pinakamarami ang sumusuporta ay mula sa National Capital Region, 74%, at Mindanao, 73%, habang pinaka-mababa sa Visayas at Balance Luzon, na kapwa 70%.

Hindi sarado si Pangulong Ferdinand Marcos Jr. sa mga mungkahing may layuning maresolba ang nagpapatuloy na sigalot sa Senado.

Ito ang binigyang-diin ni Palace Press Officer Undersecretary Claire Castro kaugnay ng pahayag ni dating Senate President Franklin Drilon na dapat nang manghimasok ng sa nagpapatuloy na sigalot sa Senado..

Gayunman, sinabi ni Castro na ang tanong ay kung magiging epektibo ang ganitong mungkahi kay Senador Alan Peter Cayetano.

Iginiit ni Palace Press Officer Undersecretary Claire Castro na hindi dapat kumilos ang sinumang opisyal na tila siya ang biktima sa isyu ng kaguluhan sa Senado.

Ayon kay Castro, ang tunay na naapektuhan ng nangyari ay ang taumbayan, gayundin ang mga naghahangad ng hustisya kabilang ang mga umano’y biktima ng extrajudicial killings.

Binigyang-diin din niya na ang mga kontrobersiyang naganap sa Senado ay hindi dahil sa pakikialam ng Malacañang, kundi sa mga desisyong inaprubahan ng pamunuan ng Senado noong mga panahong iyon.

Nang tanungin kung si Senador Alan Cayetano ang tinutukoy niya sa pahayag na may mga “nagpapanggap na banal,” sinabi ni Castro na wala siyang direktang pinatutungkulan, ngunit kung may tatamaan sa kanyang sinabi ay wala na umano siyang magagawa.