DWIZ 882

Naniniwala si Dean Gary Dionisio ng De La Salle School of Diplomacy and Governance na hindi dapat nagkaroon ng confidential funds sa Department of Education.

Matatandaang sa pagdinig ng Kamara noong 2024, sinabi ng mga opisyal ng Armed Forces of the Philippines na militar at mga lokal na pamahalaan ang nagpondo sa Youth Leadership Summits at wala silang natanggap na confidential funds mula sa DepEd, ngunit kalaunan ay ginamit ng DepEd ang kanilang mga sertipikasyon bilang tugon sa findings ng Commission on Audit.

Ayon kay Dean Dionisio, hindi kasama sa mandato ng DepEd ang pagsasagawa ng intelligence at confidential activities.—sa panulat ni Reianne Antiquina

Pinag-aaralan na ng pamahalaan ang pagbuo ng police quick reaction forces na tutugon sa mga insidente ng karahasan sa mga paaralan sa buong bansa.

Ayon kay Interior Secretary Jonvic Remulla at Philippine National Police Chief General Jose Melencio Nartatez Junior, pinag-iisipan na nila ang pagtatalaga ng specialized police teams na maaaring i-deploy agad sakaling magkaroon ng pamamaril o anumang karahasan sa loob ng mga eskwelahan at iba pang institusyong pang-edukasyon.

Dagdag pa ni General Nartatez, suportado niya ang panukala ni Senador Bam Aquino na naglalayong magtatag ng tuloy-tuloy at koordinadong pamamaraan upang maprotektahan ang mga estudyante laban sa mga banta at emergency sa loob ng mga paaralan.

Samantala, tiniyak din ng Police Chief na handa silang makipagtulungan sa Department of Education upang matiyak ang kaligtasan ng mga estudyante, guro, at iba pang school personnel.—sa panulat ni Reianne Antiquina

Iginiit ni Senador Rodante Marcoleta na “improbable” o malayong mangyari na nakipagsabwatan siya at si dating Congressman Mike Defensor kay retired Marine Master Sergeant Orly Guteza para idawit si dating House Speaker Martin Romualdez sa maanomalyang flood-control projects.

Ito’y matapos bawiin ni Guteza ang kanyang naunang testimonya noong Agosto a-disi nwebe, at ibinunyag na sina Senador Marcoleta at Defensor ang nagturo sa kanya kung ano ang sasabihin laban kay Romualdez.

Ayon kay Senador Marcoleta, mas detalyado ang naunang testimonya ni Guteza sa Senate Blue Ribbon Committee noong September 2025 kumpara sa kanyang recantation, na aniya’y pangkalahatang pagtanggi lamang at “walang evidentiary value.”

Sa halip, sinabi ng senador na mas kapani-paniwala na ang umano’y mga banta sa buhay o kalayaan ng asawa at mga anak ni Guteza ang nag-udyok sa kanyang pagpirma sa bagong testimonya.

Sa kanyang social media post, nanawagan si Senador Marcoleta na ipagpatuloy ang paghahanap ng pananagutan at pagbawi sa mga pondong umano’y ninakaw sa bayan.

Matatandaang nakakulong sa Quezon City Jail ang senador mula noong Hulyo kaugnay ng kasong plunder na may kaugnayan sa hindi pagdedeklara sa kanyang SAL-N ng 75 million pesos campaign donations na natanggap niya noong 2025 elections.—sa panulat ni Jordan Gutierrez

Wala pang pinag-uusapan sa Malacañang kaugnay sa pagbibigay ng fuel subsidy para sa mga pribadong motorista o mga kabilang sa middle-income class.

Ito ang paglilinaw ng Palasyo matapos itanong kung isasama na rin ang middle class sa naturang programa.

Kasunod na rin ito ng pahayag ng administrasyon na tututukan ang pangangailangan ng middle-income Filipinos sa natitirang termino ni Pangulong Ferdinand Marcos Jr.

Ayon kay Palace Press Officer Usec. Claire Castro, pinag-aaralan ng gobyerno ang mga programa para matulungan ang mga Pilipinong apektado ng mataas na presyo ng langis at pangunahing bilihin dahil sa digmaan sa Gitnang Silangan.

Kabilang sa mga unang panukala ang income tax exemption, pero hindi kasama sa kasalukuyang talakayan ang fuel subsidy para sa middle class.

Sa ngayon, itinaas na sa dose pesos kada litro ang fuel subsidy na ibinibigay sa mga driver ng jeep at U.V. Express.—sa panulat ni Jordan Gutierrez

Nilinaw ni House Prosecution at Bicol Saro Party-list Rep. Terry Ridon na walang aatras sa mga public at private prosecutor sa impeachment trial ni Vice President Sara Duterte.

Ayon kay Cong. Ridon, mananatili ang labing-isang miyembro ng House Prosecution Panel at lahat ng private prosecutors mula simula hanggang sa pagtatapos ng trial, sa kabila ng mga usap-usapan na may ilan umano na magbibitiw.

Lum itaw ang mga alingawngaw matapos maglabas ng mas mahigpit na guidelines ang Senate Impeachment Court sa Rule 18 o sub judice rule, kung saan ipinagbabawal nito sa mga abogado, respondent, at senator-judges na magkomento sa merito ng kaso.

Iginiit ni Cong. Ridon na patuloy pa ring maglalahad ang mga prosecution ng ebidensya at magpapaliwanag sa publiko tungkol sa proseso, mga testigo, at pagkakasunod-sunod ng trial, alinsunod sa mga limitasyon ng sub judice rule.

Kinumpirma ni Ridon na mas malamang na magdagdag sila ng mga spokesperson para sa prosecution panel na hindi saklaw ng nasabing rule.—sa panulat ni Jordan Gutierrez

Dahil sa malakas at tuloy-tuloy na ulan dulot ng Habagat, nagbabala ang PHIVOLCS sa posibleng pag-agos ng lahar at putik sa Pinatubo at Taal.

Sa Zambales, banta ang lahar mula sa Bundok Pinatubo. Ang mga lumang abo at bato mula noong 1991 eruption ay nahahalo sa tubig-ulan, nagiging parang semento, at umaagos pababa sa mga ilog. Maaaring maapektuhan ang San Marcelino, San Narciso, San Felipe, at Botolan sa Zambales, pati na ang mga kalapit na bayan sa Tarlac at Pampanga.

Samantala, nagbabala ang PHIVOLCS sa muddy streamflow at run-off sa kanlurang bahagi ng Bulkang Taal. Ang natitirang abo nito ay nahahalo sa ulan at nagiging makapal na putik na dumadaloy patungo sa Lawa ng Taal. Delikado ito sa mga bayan ng Agoncillo at Laurel.

Pinayuhan ng PHIVOLCS ang lahat ng residente at lokal na pamahalaan sa mga lugar na ito na manatiling alerto, bantayan ang lagay ng panahon, at maging handa sa posibleng paglikas para sa kanilang kaligtasan. | via Jennifer Go (DWIZ Correspondent)

Inaasahan na ng Bangko Sentral ng Pilipinas na mananatili sa mataas na antas ang inflation rate ng bansa ngayong Agosto, na posibleng umabot sa 5.5% hanggang 6.5%.

Ayon sa Bangko Sentral, maaaring ang nagpanatili sa mataas na inflation ang pagtaas ng presyo ng bigas, gulay, prutas, isda, at domestic fuel, kung saan iniuugnay sa hindi magandang lagay ng panahon.

Matatandaang bumaba ang inflation sa 6.2% noong Hulyo mula 6.8% noong Hunyo, at mas mababa ito sa 7.2% na naitala noong Abril.

Inaasahang ilalabas ng Philippine Statistics Authority ang opisyal na inflation rate para sa Agosto sa susunod na linggo, Setyembre 4.—sa panulat ni Jordan Gutierrez

Inutusan na ng Office of the Ombudsman si Senador Loren Legarda at ang kanyang anak na si Batangas First District Rep. Leandro Leviste na magsumite ng kanilang counter-affidavit sa mga reklamong plunder at graft laban sa kanila.

Ayon kay Assistant Ombudsman Mico Clavano, kaugnay ito ng umano’y pagkabigo ng kumpanya ni Cong. Leviste na magbigay ng solar power ayon sa itinakda ng kanilang congressional franchise.

Marami anyang solar power allocations ang ibinigay sa kumpanya, pero hindi umano natupad ang mga pangako, na nagdulot ng epekto sa presyo ng kuryente.

Kinuwestiyon din ni Asst. Omb. Clavano ang paulit-ulit na pagpapalawig ng medical leave ni Senador Legarda, na sinabing dahil sa malubhang karamdaman.

Iginiit ng Ombudsman na lumalawak ang hinala laban sa mag-ina, lalo na’t nasa labas ng bansa ang mga ito habang iniimbestigahan sa nasabing reklamo.

Nauna nang nagsampa ng reklamo ang Department of Energy laban kay Cong. Leviste at limang opisyal ng Solar Para sa Bayan Corporation dahil sa umano’y paglabag sa Public Service Act.—sa panulat ni Jordan Gutierrez