Drew Nacino

Posibleng palawigin ni Pangulong Rodrigo Duterte ang termino ni Philippine National Police Chief, Gen. Dionardo Carlos na nakatakdang magretiro sa bisperas ng May 9 elections.

Ito, ayon sa Department of the Interior and Local Government, ay upang magbigay-daan sa maayos na transition period sa pagitan ng kasalukuyan at susunod na administrasyon.

Gayunman, aminado si DILG Secretary Eduardo Año na hindi pa natutugunan ni Pangulong Duterte ang issue.

Mayroon anyang dalawang opsyon ang punong ehekutibo, una ay maaaring paliwigin ang termino ng PNP Chief hanggang June 30 o magtalaga ng Officer-in-Charge hanggang sa nasabing petsa.

Sa Mayo a – 8 magreretiro si Carlos kasabay ng kanyang ika-56 na taong kaarawan, na mandatory retirement age.

Una nang tiniyak ng Malacañang na mahigpit silang tatalima sa mga kautusan laban sa “midnight appointments” lalo’t ilang linggo na lamang ang nalalabi sa termino ni Pangulong Duterte.

Umaasa si Pangulong Rodrigo Duterte na magtatagumpay ang susunod na administrasyon sa usapang pang-kapayapaan sa mga rebeldeng komunista na limang dekada nang nakikipaglaban sa gobyerno.

Sa kanyang pagbisita sa mga biktima ng bagyong Agaton sa Capiz, inihayag ng pangulo na kung hindi hihinto ang armadong pakikibaka ng mga rebelde ay tiyak na magpapatuloy ang pagdanak ng dugo.

Aminado naman si Pangulong Duterte na totoo ang pahayag ng mga komunista na laganap pa rin ang Piyudalismo sa bansa.

Bagaman noon ay kaibigan ang turing, nagbago anya ang kanyang pakikitungo sa mga komunista nang mahalal bilang pangulo dahil naka-atang sa kanya ang seguridad ng bansa.

Pinasalamatan ng tagapagsalita ni Vice President Leni Robredo na si Atty. Barry Gutierrez ang ilang presidential candidates sa paglilinaw sa kanilang pangakong itutuloy ang pagtakbo sa eleksyon hanggang dulo.

Tugon ito ni Gutierrez sa panawagan nina Senator Ping Lacson, Manila Mayor Isko Moreno at Dating Defense Secretary Norberto Gonzales na umatras na sa presidential race si Robredo.

Lahat anya ng kandidato ay maaaring ituloy ang kani-kanilang kandidatura hanggang huli, gaya ng kanilang opsyon na baliwalain ang surveys, rally attendance, endorsements at iba pang pamantayan ng suporta.

Gayunman, kinuwestyon ni Gutierrez ang isinagawang press conference nina Lacson, Moreno at Gonzales sa mamahaling Manila Peninsula Hotel sa Makati City.

Hindi natinag si Vice President Leni Robredo sa panawagan ng ilang kapwa presidential candidate na umatras na siya sa May 9 elections.

Sa isang Facebook post, nag-share pa si Robredo ng larawan ng kanyang hapunan kasama ang Sumilao Farmers sa Bukidnon sa pagdiriwang ng linggo ng pagkabuhay.

Nagpatutsada ang pangalawang-Pangulo sa tanong ng isa sa kanyang supporter kung magkano ang nawithdraw nito sa A.T.M. sa pagsasabing mahaba pa ang pila.

Kahapon ay nagsagawa ng press conference sina presidential bets, Manila Mayor Isko Moreno, Senator Panfilo Lacson at dating Defense Secretary Norberto Gonzales sa Manila Peninsula Hotel.

Bukod sa panawagang umatras si Robredo, isiniwalat din sa naturang press con na mismong ang bise presidente ang nag-alok kina Moreno at Lacson na mag-withdraw sa presidential race.

Sa gitna ng buhos ng mga biyaherong pumupunta sa mga probinsya ngayong Semana Santa, nagpapatuloy ang Anti-colorum operation ng LTFRB-Law Enforcement Unit sa A. Bonifacio Street sa boundary ng Quezon City.

Target ng LTFRB ang mga provincial bus na tumatangging magbaba at magsakay ng mga pasahero sa North Luzon Express Terminal (NLET) sa Bocaue, Bulacan.

Kabilang sa nasampolan ng ahensya ang isang bus ng Genesis Transport at Bataan Transit.

Dinala ang dalawang bus sa LTFRB Impounding Area sa Magalang, Pampanga.

Sa pag-iikot naman ng DWIZ, naging mabigat ang daloy ng trapiko sa bahagi ng Sergeant Rivera at A. Bonifacio sa Quezon City dakong alas-3 ng hapon at ilan sa mga sanhi nito ang mga provincial bus na umiiwas sa LTFRB.

Ganito rin ang naging sitwasyon sa bahagi ng EDSA-Balintawak, EDSA-Muñoz at bahagi ng Quezon Avenue patungong Skyway.

Muling binanatan ng Sugar Regulatory Administration (SRA) ang mga tumututol sa panukala ng gobyerno na mag-angkat ng 350,000 metric tons ng asukal.

Inihayag ni SRA Administrator Hermenegildo Serafica na hindi man lamang ikinunsidera ng mga detractor ang dalawang bagay sa usapin gaya ng “sugar availability at affordability”.

Dahil sa mga sariling-interes ng mga bumabatikos, napupulitika na anya ang usapin sa sugar importation at hindi man lamang naisip ng mga detractor ang food security ng bansa.

Tinaya ng SRA sa 1.9M metrikong tonelada ang produksyon ng raw sugar sa crop year 2021-2022 kumpara sa aktuwal na raw sugar production na 2.1M metric tons para sa 2020-2021.

Sa gitna naman ng pinaluwag na Alert levels mula sa COVID-19 pandemic, nagbabala si Serafica na maaaring maging limitado ang suplay, kabilang na ang sumirit na record-high na presyo ng asukal.