Drew Nacino

Matapos ang paggunita sa Semana Santa at nagpapatuloy na Ramadan at Campaign season, 14 na lugar na nasa ilalim ng Alert level 1 ang nakitaan ng bahagyang pagtaas ng COVID-19 cases.

Ito ang kinumpirma ni Health Secretary Francisco Duque III sa Talk to the People ni Pangulong Rodrigo Duterte.

Ayon kay Duque, nangunguna sa may pinaka-mataas na kaso ng COVID-19 ang Metro Manila simula noong April 12 hanggang 18; CALABARZON at Central Luzon.

Kahapon ay umabot sa 170 additional cases ang naitala ng DOH, ang pinaka-mababang daily tally ngayong taon at simula noong December 21.

Nanindigan si Pangulong Rodrigo Duterte na mananatili siyang neutral ngayong panahon ng eleksyon.

Ito’y upang matiyak na magiging maayos ang halalan sa Mayo a –9.

Ayon kay Pangulong Duterte, hindi niya papayagan ang karahasan ngayong panahon ng halalan.

Dapat anyang tumalima ang mga kandidato at lahat ng mamamayan sa batas upang mapanatiling mapayapa ang pagpili ng mga susunod na leader ng bansa.

Matapos bisitahin ang ilang lugar na nasalanta ng bagyo, iginiit ni Pangulong Rodrigo Duterte na dapat magbayad ang mga industrialized country o mayayamang bansa na nasa likod ng malaking carbon emissions, dahil sa pinsalang idinulot ng climate change.

Sa kanyang Talk to the People kahapon, binigyang-diin ni Pangulong Duterte na kabilang ang Pilipinas sa mga sumasalo sa polusyong idinudulot ng mga mayamang bansa.

Aminado ang Pangulo na noong una ay hindi siya kumbinsido na mayroong climate change hanggang sa naranasan niya mismo ang maraming bagyo sa Davao na noo’y bihirang daanan ng mga bagyo.

Gayunman, hindi tinukoy ng Punong Ehekutibo kung anong mga bansa ang dapat magbayad sa Pilipinas ng danyos perwisyo.

Pina-alalahanan ng MMDA ang mga motorista na nananatiling epektibo ang lumang number coding scheme.

Tugon ito ng ahensya sa tanong ng ilang netizen kung ipinatutupad na ang bagong number coding scheme.

Ayon sa MMDA, patuloy ang ginagawa nilang pag-aaral hinggil sa modification sa number coding at wala pang pinal na desisyon.

Epektibo ang Modified Unified Vehicular Volume Reduction Program o number coding scheme ala-5 ng hapon hanggang alas-8 ng gabi simula Lunes hanggang Biyernes, maliban tuwing Holidays.

Una nang ipinanukala ni MMDA Chairman Romando Artes kay Pangulong Rodrigo Duterte ang dalawang plano upang mabawasan ang mabigat na daloy ng trapiko sa Metro Manila.

Una ay ang Odd-Even Scheme na layuning mabawasan ng 50% ang traffic at isang mas komplikadong sistema na target mabawasan ang traffic ng 40%.

Nilinaw ni Senador Panfilo Lacson na hindi niya ipinanawagan ang pag-atras sa May 9 elections ng kanyang kapwa presidential candidate na si Vice President Leni Robredo.

Hindi pa huli para magpakita ng respeto ang mga kandidato sa election process at higit sa lahat paggalang sa mga botante.

Ito, ayon kay Lacson, ang kanyang panawagan at hindi kabilang sa nanawagang umurong si Robredo sa presidential race.

Mahusay anyang ipakita ang respeto sa mga botante kung bibigyan sila ng maraming pagpipiliang kandidato.

Inihayag naman ni vice presidential candidate at Senate President Tito Sotto III na sila ni Lacson ay lumagda sa isang joint statement kasama ang ibang kandidato upang itaguyod at isulong ang soberanya ng mga botante.

Nakiisa anya sila ni Lacson upang labanan ang anumang pagtatangka na pabagsakin o pahinain ang kagustuhan ng mga botante sa pamamagitan ng paglimita sa maaaring pagpilian pero hindi sila kaisa sa pananaw at panawagang umatras si Robredo. — ulat mula kay Cely Ortega Bueno (Patrol 19)

Sinalubong ng mahabang pila ang mga commuter sa EDSA bus Carousel Station sa unang araw ng balik-trabaho kahapon, matapos ang Semana Santa.

Sa Monumento Station sa Caloocan, umabot sa dalawang kilometro ang haba ng pila ng mga mananakay na naghintay ng libreng sakay sa bus carousel.

Sa kabila nito, nilinaw ng Department of Transportation na mabilis naman ang usad ng pila at nakasakay agad ang mga pasahero.

Nagdagdag din ang DOTr ng nasa 100 bus dahil sa inasahan na nila ang pagdagsa ng mga commuter.

Sabado De Gloria nang magsimulang magbalikan ang mga motorista at bakasyonista sa Metro Manila dahilan upang bumigat ang daloy ng trapiko sa ilang pangunahing kalsada.

Hindi naman natinag si Davao City Mayor Sara Duterte – Carpio sa OCTA vice-presidential survey.

Umani si Duterte – Carpio ng 57% sa isinagawang survey sa 1,200 respondents noong April 2 hanggang 6.

Sinundan ang alkalde ni Senate President Vicente Sotto III, 23%; Senator Francis Pangilinan, 12% ; Dr. Willie Ong, 7%;

House Deputy Speaker Lito Atienza, .7% at Manny Lopez .1%.