Drew Nacino

Aminado ang National Vaccination Operations Center (NVOC) na malabong makamit ang target na 90M Filipino na fully vaccinated laban sa COVID-19 hanggang June 30.

Ayon kay NVOC Chairperson at Health Undersecretary Myrna Cabotaje, mahirap maabot ang target na populasyon sa pagtatapos ng administrasyon ni Pangulong Rodrigo Duterte.

Sa katunayan ay nakatutok sila sa kanilang naunang layunin na 77M Filipino na fully vaccinated o 900k vaccine jabs kada araw.

Karamihan anya ng mga Pinoy ay hindi pa rin kumbinsidong magpabakuna habang ang iba ay nasa mga liblib na lugar.

Hanggang nitong Lunes, Abril a -18, umabot na sa mahigit 67M ang fully vaccinated individuals habang nasa 12.7M na ang tinurukan ng booster.

Samantala, umaasa naman si Cabotaje makakapag-full-blast na sila ng vaccination activities sa buong Abril hanggang Hunyo.

Nabunyag sa pagdinig ng House Committee on Ways and Means na ipinupuslit na rin papasok ng bansa ang cooking oil o mantika.

Inihayag ni Albay Rep. Joey Salceda, Chairman ng Komite na aabot na sa P300-B ang halaga ng mantikang ini-smuggle sa bansa.

Ayon kay Salceda, posibleng may mga kasabwat sa Bureau of Customs kaya naipupuslit ang nasabing produkto at napakabagal ng proseso upang maparusahan ang mga nasa likod ng smuggling.

Inihalimbawa ng mambabatas na sa kanilang lalawigan sa Albay lamang ay bumabaha na ng palm oil mula Malaysia at nakalulusot ito sa pitong entry point, kabilang ang Subic.

Nilinaw naman ni Department of Agriculture – Bureau of Animal Industry Director Reildrin Morales na ang nasabing halaga ng smuggled mantika sa bansa ay mula pa noong 2016 hanggang 2021.

Samantala, tiniyak ni Customs Commissioner Rey Leonardo Guerrero na iniimbestigahan na nila ang nasabing issue at nagsasagawa na rin ng audit sa mga kumpanyang sangkot.

Itinuturing ng palasyo na “good news” ang napaulat na pagdagsa ng mga turista sa iba’t ibang destinasyon noong Semana Santa.

Ayon kay Acting Presidential Spokesman Martin Andanar, malinaw na nakabangon na ang bansa mula sa epekto ng COVID-19 pandemic.

Patunay din ito ang pagtaas ng “confidence level” ng publiko na lumabas para magbakasyon kahit hindi pa tuluyang nawawala ang banta ng pandemya.

Dahil dito, maka-rerekober na rin anya ang ekonomiya ng mga lugar na naka-asa sa turismo.

Gayunman, inihayag ni Andanar na dapat manatiling mapagmatyag at maingat ang publiko at tumalima sa minimum public health standards.

Kabilang sa mga dinumog noong Mahal na Araw ang Isla ng Boracay sa Malay, Aklan kung saan umabot sa 22,519 ang bilang ng turista noong april 15 o lampas sa tourist limit na 19,215 carrying capacity.

Iimbestigahan na ng Commission on Elections ang mga shooting incident sa Bukidnon at Lanao del Sur upang matukoy kung kapwa may kaugnayan ang mga ito sa Eleksyon 2022.

Ito ang inihayag ni Comelec Chairman Saidamen Pangarungan matapos masugatan ang walo katao, kabilang ang isang bata, sa rido ng dalawang pamilya sa Malabang, Lanao del Sur.

Lima naman ang nasaktan matapos pagbabarilin ang grupo nina presidential candidate at Labor Leader Leody De Guzman habang kasama ang ilang indigenous persons sa Quezon, Bukidnon.

Kinondena rin ni Pangarungan ang mga nabanggit na insidente habang mag-a-alok na ang Comelec ng karagdagang security detail sa lahat ng presidential at vice-presidential candidates.

Isang sanggol na edad isa’t kalahating taon ang nailigtas ng mga pulis sa Imus, Cavite matapos ibenta ng nanay sa halagang P2,500.

Nagpasaklolo ang 21-anyos na ina sa mga otoridad ilang araw matapos ang transaksyon.

Ayon kay Imus Police Chief of Investigation, LT. Reynald Afable, nakonsensya umano ang nanay ng sanggol sa ginawa nito sa anak na si angelique at dahil sa problema ay napilitan itong ibenta.

Natunton naman sa social media ang suspek na si Jane Mapa na bumili sa sanggol pero hindi ito nakipag-ugnayan sa mga otoridad kaya’t nagpanggap ang mga pulis na ina ni Angelique at nasagip ito at naaresto si Mapa.

Nahaharap si Mapa mga kasong paglabag sa Child Abuse Law at Anti-Trafficking in Persons Act.

Sinimulan na ng Commission on Elections na i-deploy sa mga Local Government Unit ang mga balotang gagamitin sa May 9, elections.

Mula sa isang warehouse sa Pasig City, ikinarga na sa mga container van ang nasa 65K balota ng Comelec upang ihatid sa iba’t ibang lungsod at bayan.

Kaninang hatinggabi naman umalis ang pitong container van na isasakay sa mga barko patungo sa mga lokal na pamahalaan ng BARMM at Zamboanga Peninsula.

Ito ang unang batch ng mga balota na ipadadala sa iba’t-ibang lugar sa bansa na tatagal hanggang Mayo a–5.

Didiretso sa mga Treasurer’s Office ng mga LGU ang mga balota upang doon itago bago dalhin sa mga presinto sa mismong araw ng halalan.

Tiniyak naman ng poll body ang seguridad ng mga balota at kasama nila ang pulisya at militar sa loading at sealing ng mga nasabing election material.

Halos 300k katao ang dumalo sa grand rally nina Partido Federal ng Pilipinas presidential bet, dating senador Ferdinand “Bongbong” Marcos Jr. at running mate niyang si Lakas-CMD vice presidential candidate, Davao City Mayor Sara Duterte-Carpio sa Cebu.

Inorganisa ang aktibidad para sa UniTeam ng One Cebu Party sa pangunguna nina Governor Gwen Garcia; Lakas-CMD President at House Majority Leader Martin Romualdez at Tingog Party-list Rep. Yedda Romualdez.

Ito na sa ngayon ang pinaka-malaking crowd para sa UniTeam na isinagawa sa number one vote-rich province, halos tatlong linggo bago ang Halalan.

Binigyang-diin ni Garcia na ang Mega rally ay isang matibay na indikasyon ng suporta ng mga cebuano kina Marcos at Duterte-Carpio.

Isinagawa ang naturang aktibidad sa 30-ektaryang lote sa Cebu City, kagabi kung saan kabilang sa mga nag-perform para sa uniteam sina Andrew E. at Toni Gonzaga.

Nagpasalamat naman si BBM sa mga Cebuano lalo sa mga City official at iba pang alkalde sa lalawigan sa pag-organisa sa pinaka-malaking rally ng UniTeam.

Dalawampung araw bago ang May 9 elections, inihayag ni Pangulong Rodrigo Duterte na kanyang igigiit ang “Alunan Doctrine” upang maiwasan ang karahasan.

Sa kanyang Talk to the People, sinabi ni Pangulong Duterte na sa ilalim ng polisiya ay lilimitahan ang bilang ng mga bodyguard ng mga politiko.

Binalaan din ng Pangulo ang mga kandidatong lalabag sa naturang polisiya, lalo ang mga walang permit sa pagdadala ng armas.