Drew Nacino

Dapat matiyak ang pagtalima sa health protocols laban sa COVID-19 sa mga evacuation center para sa mga nasalanta ng bagyong Agaton.

Ito ang inihayag ni Health Undersecretary Maria Rosario Vergeire matapos ang pinsalang idinulot ng bagyo sa ilang bahagi ng Visayas at Mindanao.

Ayon kay Vergeire, naglabas na sila ng advisories sa mga Local Government Units upang matiyak na hindi nababaliwala ang COVID-19 protocols sa evacuation centers.

Nakapaloob sa advisories ang pagtatalaga ng mga safety officer upang maiwasan ang posibleng pagdami muli ng COVID-19 cases mula sa hanay ng mga evacuee.

Bagaman mababa anya ang bilang ng nagkakasakit, mahalaga pa ring magsuot ng face mask ang lahat ng nasa evacuation center at magkaroon ng physical distancing.

Bukod sa COVID-19, mataas din ang posibilidad na kumalat ang iba pang sakit gaya ng diarrhea sa evacuation center kaya’t nagpadala na ang DOH ng  WASH, o Water, Sanitation and Hygiene Logistics sa mga LGU.

Sinalag naman ng kampo ni presidential aspirant Ferdinand “Bongbong” Marcos Jr. ang bintang ni Vice President Leni Robredo.

Ayon kay Atty. Vic Rodriguez, tagapagsalita ni Marcos, hindi na malilinlang ni Robredo at ng mga dilawan ang mga Pilipino dahil lahat ay gising na sa kanilang mga propaganda at kasinungalingan sa pulitika.

Bilang respeto sa diwa ng Semana Santa, pina-alalahanan ni Rodriguez si Robredo na huwag ibato sa kanila ang mga mapanira at negatibong uri ng pamumulitika, halos isang buwan bago ang halalan.

Sa kabila nito, hindi anya natitinag ang panawagan ni BBM na pagkakaisa na bahagi ng kanyang plataporma.

Inakusahan ni Vice President Leni Robredo ang kampo ng kapwa presidential candidate at dating senador Ferdinand “Bongbong” Marcos, Jr. na nasa likod ng pambabastos sa kanyang anak na si Aika.

Partikular na tinukoy ni Robredo ang pekeng pornographic online content ni aika na kumalat sa social media.

Kanya ring pinuna ang mga Facebook post na nagsasabing nag-so-solicit ng pondo ang Office of the Vice President para sa isang Drug Rehabilitation Center Project.

Aminado ang pangalawang-pangulo na hindi na siya nagugulat dahil ito na talaga ang kalakaran ng kalaban simula nung natalo noong 2016.

Dagdag ni Robredo, anim na taon na siyang inuulan ng fake news pero hindi siya nagpapa-apekto at hindi nabawasan ang kanyang kredibilidad bagkus ay nababawasan ay ang mga napapaniwala ng kalaban.

Kahapon ay nangampanya si VP Leni sa Pangasinan, isa sa mga probinsya na sinasabing bahagi ng umano’y Solid North, na balwarte ng mga Marcos.

Tiniyak ng Department of Agriculture sa publiko na sapat ang food production ng bansa, partikular ng prime agricultural products, tulad ng bigas, gulay, manok at isda.

Ito’y sa kabila ng pagsirit ng presyo ng mga nasabing produkto lalo’t mataas ang demand sa isda at gulay ngayong Semana Santa.

Ayon kay DA Undersecretary Ariel Cayanan, sa katunayan ay mayroong record-breaking harvest productions para sa tatlong buwang buffer stock sa ikalawang quarter o hanggang Hunyo.

Magkakaroon pa anya ng produksyon sa susunod na tatlong buwan para sa ikatlong quarter bilang preparasyon sa tag-ulan.

Sapat din o 150% sufficient ang low-land level vegetables o pinakbet vegetables habang 158% ang sufficiency level ng highland vegetables.

Samantala, umapela si Cayanan na i-exempt sa spending ban ng Comelec ang subsidiya para sa mga magsasaka at mangingisda.

Lumipat na rin sa panig ni Vice President Leni Robredo ang isa sa mga volunteer group na una nang nangampanya para kay presidential candidate at Manila Mayor Francisco “Isko Moreno” Domagoso.

Inanunsyo ng IkawMuna Pilipinas (IM Pilipinas) kahapon ang kanilang desisyon na i-endorso si Robredo at nagpalit na rin sila ng pangalan na “Im Leni” bilang commitment upang ipanalo ang kanilang kandidato.

Ayon kay IM Leni Convenor Tim Orbos, consistent sa ikalawang pwesto sa survey ang pangalawang-pangulo sa mga nakalipas na buwan at unti-unting umaangat kaya’t siya ang kanilang napiling suportahan.

Kailangan anya ni Robredo ng lahat ng tulong at sa halip na magbangayan ay dapat magsanib-pwersa ang kanilang mga grupo.

Ang IM Leni ay isa sa mga unang grupo, na mayroon umanong 200,000 members, ay isa sa mga unang humimok kay Moreno na tumakbo sa pagka-pangulo.