Drew Nacino

Iginiit ni Pangulong Rodrigo Duterte na hindi niya aalisin ang polisiya sa mandatory use ng face masks.

Sa kanyang Talk to the People, inihayag ni Pangulong Duterte na hanggang sa matapos ang kanyang termino ay dapat pa ring magsuot ng facemask ang publiko lalo’t may banta ng mga bagong variant ng COVID-19.

Hinimok din ng Punong Ehekutibo ang publiko na panatilihin ang mahigpit na health protocols, bunsod ng biglang pagtaas ng COVID-19 cases na maaaring dulot ng pagka-kampante ng ibang bansa sa pagluluwag ng restrictions.

Niyanig ng lindol ang Batanes Islands, kagabi.

Alas-9:47 nang tamaan ng magnitude 5.2 ang nasabing lugar.

Natunton ng Phivolcs ang sentro ng pagyanig, 107 kilometers, Northwest ng bayan ng Itbayat.

Tectonic ang origin ng lindol at may lalim na 24 kilometers.

Wala namang naitalang intensities at pinsala habang inaasahan ang mga aftershock.

Umabot sa 1,906 additional COVID-19 cases ang naitala ng Department of Health simula Abril 4 hanggang 10.

Sa mga bagong kaso, wala sa mga ito ang may malubha o kritikal na karamdaman.

Noong Lunes, mayroong 707 na malubha at kritikal na pasyente na naka-admit sa mga ospital dahil sa COVID-19.

Nasa 272 naman ang daily average cases na mababa ng 29% kumpara sa mga kasong naitala noong March 28 hanggang April 3.

Samantala, karagdagang 428 na ang nadagdag sa listahan ng mga pumanaw.

Pinayagan nang makabalik sa kanilang mga bahay ang mga residente ng Batangas na lumikas noong Marso dahil sa muling pagsabog ng Taal Volcano.

Ito, ayon kay NDRRMC spokesman Mark Timbal, ay kasunod ng payo ng Disaster Risk Reduction and Management Council ng Calabarzon sa mga lokal na pamahalaan.

Magugunitang ibinaba na sa Alert level 2 ang status ng Bulkang Taal.

Marami anya sa mga lumikas ang bumalik na sa kanilang mga bahay habang isinara na rin ang ibang evacuation center.

Hanggang noong Marso 31 ay aabot sa mahigit 7,200 indibidwal ang naapektuhan ng muling pag-a-alburoto ng bulkan.

Itinanggi ng Philippine Consulate General’s Office (PCGO) sa United Arab Emirates ang mga ulat na mayroon ng mga pre-shaded ballot sa unang araw pa lamang ng overseas absentee voting.

Nag-ugat ito sa kumakalat na social media post na isang botante ang nabigyan ng pre-shaded ballot noong linggo ng palaspas, na unang araw ng overseas voting.

Ayon sa PCGO, wala namang iniulat na iregularidad ang mga poll watcher mula sa limang magkaka-ibang political party na nakatalaga sa mga polling place.

Ipinunto ng konsulada na kung mayroon mang ganitong mga insidente ay recorded at opisyal itong isususmite sa Commission on Elections upang umaksyon.

Inabisuhan naman ng konsulada ang mga botanteng Filipino sa Dubai na maging mapagmatyag laban sa mga maling impormasyon at iwasang magpakalat ng disinformation sa social media.

Hawak na ng awtoridad ang suspek sa pananaksak at pagpatay sa isang 23 anyos na ina at sa kanyang anak na batang babae at pamangkin sa Cainta, Rizal.

Kinilala ang suspek na si Vergel Navalta, alyas Mark De Guzman, isang construction worker na naaresto sa Tarlac.

Ayon sa Cainta Municipal Police, kalalaya lang sa kulungan ni Navalta at may standing arrest warrant para sa kasong pagnanakaw sa Pangasinan.

Nagkaroon na rin umano noon ng kasong panghahalay sa Cavite ang suspek na nakapiit na sa Cainta police station.

Abril 6 nang matagpuang patay ang mga biktimang sina Angelica Antonio Manaloto, 24 taon gulang, anak na si Nica, apat na taon at pamangking si Renz Orly Manaloto Trinidad, 7 years old sa kanilang bahay sa barangay San Juan.

Base sa inisyal na imbestigasyon ng pulisya, pagnanakaw ang nakikitang motibo sa karumal-dumal na krimen.

Hindi kumbinsido ang ilang public transport advocate at bus operator sa pahayag ng Land Transportation Franchising and Regulatory Board na walang terminal fee sa North Luzon Express Terminal (NLET) sa Bocaue, Bulacan.

Ito’y matapos ang naunang pahayag sa DWIZ ni LTFRB Executive director Tina Cassion na inalis na ang terminal fee sa NLET sa gitna ng pagdagsa ng mga biyahero sa iba’t ibang bus terminal ngayong Semana Santa.

Ayon kay transport advocate at dating senador Nikki Coseteng, dapat linawin ng LTFRB ang memorandum na inilabas ng pamunuan ng NLET as of January 12, 2021 na nagsasaad na mayroong bayad ang loading at unloading ng mga pasahero na tila panlilinlang sa mga bus operator.

Inihayag naman ni Narvacan, Ilocos Sur mayor Luis “Chavit” Singson, operator ng isa sa pinaka-malaking bus liner sa Luzon na sa katunayan ay walang pasaherong nais bumaba o sumakay sa NLET.

Gumagastos pa anya ng karagdagang pamasahe ang mga mananakay tuwing bababa at sasakay sa nasabing terminal kaya’t karamihan sa kanila ay ipinupuslit na lamang papasok at palabas ng Metro Manila.

Aminado si Singson na hindi naman siya tutol sa hakbang ng gobyerno na ayusin ang transportation system, subalit hindi ito nakatutulong lalo na sa taumbayan.

Ipinagtataka naman ng alkalde kung bakit inilagay ang NLET sa Bulacan gayong ang Parañaque ay nasa loob ng Metro Manila.

Samantala, muli namang umapela ang dating Ilocos Sur governor sa outgoing national government, lalo kay Pangulong Rodrigo Duterte at transportation secretary Arthur Tugade na maawa sa mga mananakay.