Drew Nacino

Kasabay ng pagsisimula ng Semana Santa, pina-alalahanan ni Tagbilaran Bishop Alberto Uy ang mga mananampalataya na iwasang tumanggap ng pera mula sa mga kumakandidato sa 2022 elections.

 Sa kanyang Palm Sunday mass sa St. Joseph Cathedral, sa Tagbilaran City, Bohol, binigyang-diin ni Uy na ang mahal na araw ay magandang panahon upang tuparin ang pangako sa huwag tumanggap ng “gracia” mula sa mga kandidato.

 Kung hindi anya babaguhin ng mga mamamayan ang kinagawian tulad ng pagtangkilik sa vote-buying tuwing halalan, hindi magbabago ang sistema na pinag-uugatan ng korapsyon.

 Ayon kay Bishop Uy, sa tuwing nagmamadali tayong manghusga o bumoto nang hindi nananalangin at nagninilay ay mistula na rin tayong mga hudyo na pinili ang magnanakaw na si Barabbas at ipinaubaya si Kristo sa krus.

 Iginiit ng obispo na tuwing ipinagpapalit natin ang ating prinsipyo o boto para sa pera ngayong panahon ng eleksyon ay wala tayong ipinagkaiba kay Hudas Iskaryote na ipinagkunulo si Hesus at naging dahilan ng pagkakapako nito sa krus.

 Samantala, hinimok naman ni Uy ang mga mananampalataya na magdasal para sa kaliwanagan ng pag-iisip at magnilay bago pumili ng mga susunod na leader ng bansa.

 Idineklara na ni mayor mike rama ang state of calamity sa Cebu City bunsod ng walang tigil at malakas na pag-ulang dulot ng tropical depression Agaton.

 Inihayag ni Cebu City Disaster Risk Reduction and Management Council Chairman Gerardo Carillo na nagsasagawa na sila ng evacuation sa mga landslide at flash flood area.

 Inabisuhan din ni Carillo ang mga residente na tawagan ang Cebu City Emergency sa cellphone numbers 0932-537-7770, 0947-178-0000 at 0917-839-9896.

 Magugunitang nag-landfall sa Calicoan Island sa Guiuan, Eastern Samar ang bagyo, kahapon.

Isang passenger vessel sa Camotes, Island, Cebu ang lumubog habang nakadaong sa Consuelo Port.

 Kinumpirma ni Capt. Alvin Dagalea, Station Commander ng Philippine Coast Guard-Cebu, na pinaghahampas kahapon ng naglalakihang alon dulot ng bagyong Agaton ang MV Mika Mari 1 ng Jomalia Shipping Lines.

 Ayon kay Dagalea, walang pasahero ang nasabing sasakyang pandagat nang lumubog ito dakong ala una ng hapon at agad naka-alis ang 14 na crew nito.

 Gayunman, namemeligrong magkaroon ng oil spill lalo’t kargado ng nasa 5,430 liters ng diesel at 68 liters ng lube oil ang barko.

Sa Ormoc City, Leyte, isa namang cargo vessel ang lumubog din bunsod ng naglalakihang alon dulot ng bagyo noong sabado.

 Patungo sanang Cebu City ang MV Celsa 2 ng Navigs Shipping Corporation nang maipit sa pananalasa ng bagyong Agaton.

 Hindi naman idinetalye ng mga otoridad kung ilan ang crew nang lumubog na barko.

Lumagpak pa sa 28,380 ang aktibong kaso ng Covid-19 sa bansa.

 Sa datos ng Department of Health (DOH) kahapon, umabot sa 277 ang karagdagang COVID-19 cases dahilan upang sumirit sa 3,681,374 ang kabuuang bilang ng kaso.

 Sumampa na rin sa 3,593,225 ang total recoveries habang lumobo na sa 59,769 ang namatay makaraang madagdagan ng 39 ang death toll.

Samantala, sumadsad na sa 1.6% ang positivity rate sa nakalipas na isang linggo kumpara sa 1.9% simula noong March 28 hanggang April 3.

 Dahil sa patuloy na pagbaba ng daily cases at pagluluwag ng restrictions, umakyat na rin ang ranking ng Pilipinas sa Bloomberg COVID Resilience Index.

 Mula sa 53rd spot noong Pebrero, nasa 49th place na ang bansa noong Marso.

Tatlo katao ang nasawi sa Negros Oriental sa gitna ng pagbaha bunsod ng malakas na pag-ulang dala ng bagyong Agaton sa ilang lugar sa Visayas at Mindanao.

 Ayon sa Negros Oriental PDRRMO, pawang residente ng bayan ng basay ang mga biktima na kinabibilangan ng isang apat na taong gulang na nalunod sa Barangay Bongalonan.

 Nilusong naman ng mga rescuer ang hanggang baywang na baha sa Barangay Limbo, sa bayan ng Sultan Kudarat, Maguindanao upang ilikas ang mga residente.

 Tinaya ng Bureau of Fire Protection (BFP) sa 20 indibidwal, na karamiha’y bata ang nailigtas mula sa naturang lugar.

 Samantala, ilang bahagi rin ng bayan ng  Pikit, Cotabato ang nalubog sa baha bunsod ng walang tigil na ulan, simula noong Lunes.

Nakatakdang magpawakala ng tubig ang Magat Dam ngayong araw.

Layunin nitong mapanatili sa ligtas na lebel ang tubig sa dam sa gitna ng banta ng Bagyong Agaton at thunderstorms.

Ayon sa National Irrigation Administration, sisimulan ang pagpapakawala ng tubig mamayang alas 2 ng hapon.

Kasalukuyang nakararanas ng pagbaha at malakas na pag-ulan ang ilang bahagi ng Visayas at Mindanao dahil sa bagyo.

Nanawagan ang Philippine Consulate sa Hong Kong sa mga botanteng Filipino na ikunsidera ang pagboto sa mga susunod na araw.

Ito’y makaraang humaba ang pila para sa Overseas Absentee Votingna nakatawag-pansin sa mga pulis sa gitna ng ikalimang COVID-19 surge sa Hong Kong.

Ayon kay Consul General Raly Tejada, magandang senyales para sa demokrasya ng bansa ang pagpila ng libu-libong Pinoy sa polling station sa Bayanihan Kennedy Town Centre.

Gayunman, ikina-alarma ng Hong Kong Police Force ang pagdagsa ng mga OFW dahil sa health at safety concerns lalo’t napakataas pa rin ng COVID-19 cases sa nabanggit na lugar.

Umapela naman ang Philippine Consulate sa Hong Kong sa mga employer na payagan ang kanilang mga empleyadong Filipino na bumoto ngayong linggo kung saan inaasahang mas kaunti ang mga tao.

Kumpiyansa si Governor Leopoldo Dominico Petilla na mananalo sa Leyte si partido federal ng Pilipinas Standard-Bearer Ferdinand ‘Bongbong’ Marcos, Jr. dahil tiyak na makakakuha ito ng 70 hanggang 80% ng boto mula sa kanyang lalawigan.

 Ibinahagi ni Petilla na ilang linggo na silang nakikipagkita sa mga residente at mga barangay officials sa iba’t-ibang bayan at siyudad upang ipakilala si Marcos.

 Ang iba’t ibang local government officials anya sa Leyte, mula sa first hanggang fifth district ay inendorso na si Marcos sa ginanap na “meet & greet” sa mga incumbent at aspirants para sa iba’t-ibang posisyon sa ilalim ng PDP-Laban kung saan si dating Energy Secretary Jericho Petilla ang gubernatorial candidate.

 Dumalo rin sa pagpupulong ang mga ABC presidents mula sa mga bayan at lungsod.

 Sumang-ayon naman si San Miguel Mayor Chekay Esperas, isang two-term mayor at one-term Councilor, sa sinabi ng Incumbent Governor na kanilang sinusuportahan si Marcos dahil siya ay nanggagaling din sa kanilang probinsya.

 Samantala, nagpahayag din ng suporta sa BBM-SARA UniTeam sina Baybay Mayor Jose Carlos Cari, Congresswoman Lolita Javier, former Cong. Sandy Javier, at Vice Governor Carlo Loreto.