Drew Nacino

Nilinaw ng Land Transportation Franchising and Regulatory Board (LTFRB) na walang dapat bayaran ang mga provincial bus na pumapasok at lumalabas ng North Luzon Express Terminal (NLET) sa Bocaue, Bulacan.

Taliwas ito sa pahayag ni Narvacan, Ilocos Sur Mayor Luis “Chavit” Singson, isa sa mga owner ng bus liner na bumibyaheng Norte, na may binabayaran silang 100,000 pesos na per slot ng bus sa NLET.

Ayon kay LTFRB Executive Director Tina Cassion, sa katunayan aytinanggal ang lahat ng fees sa nasabing integrated terminal.

Inaasahan ni Pangulong Rodrigo Duterte na reremedyuhan ng kongreso ang mga na-Veto na probisyon ng Security of Tenure Bill o Anti-Endo Bill.

Ito ang tugon ni Acting Presidential Spokesman Martin Andanar sa puna ni Senate President Vicente Sotto iii na nananatiling nakapako ang pangako ng pangulo na tutuldukan ang “Endo”.

Bagaman kabilang sa mga ipinangako ni Pangulong Duterte sa kanyang presidential campaign na tapusin ang kontraktuwalisasyon, kanya namang ibinasura ang Security Tenure Bill noong 2019.

Ayon kay Andanar, ipinaliwanag naman na noon ng pangulo ang kanyang panig at nais lamang nitong maging patas ang nasabing panukalang batas sa mga employer at empleyado.

Sa ilalim ng Security of Tenure Bill, tatanggalin na ang Labor Subcontracting, lilimitahan ang job contracting sa mga licensed at specialized services at gagawing regular employees ang mga project at seasonal employees.

Mahigit 2,000 pamilya o halos 7,000 katao na ang apektado ng pagbaha sa Davao City bunsod ng malakas na pag-ulang dala ng low pressure area.

Kabilang sa mga nalubog sa malalim na baha ang Jade Valley Subdivision sa Barangay Tigatto maging sa Buhangin, Waan at Matina Crossing.

Ayon sa Davao City Disaster Risk Reduction and Management office, ang abot-leeg na ang lalim ng tubig sa ilang lugar dahil sa pag-apaw ng Davao River.

Sa kabila nito, wala namang naitalang casualty dahil sa baha.

Marso 8 nang huling nakaranas ng flashfloods ang mga nasabing lugar.

Umaasa si Pangulong Rodrigo Duterte na magkakaroon pa ng karagdagang Overseas Filipino Worker (OFW) Center sa bawat malalaking lungsod sa bansa.

Sa kanyang talumpati sa groundbreaking ceremony ng OFW center sa Las Piñas City, binigyang-diin ng pangulo ang kahalagahan ng ambag ng mga OFW sa ekonomiya ng bansa.

Hindi anya dapat pahirapan ang mga migrant worker sa pagkuha ng mga kailangan nilang dokumento upang makapagtrabaho sa ibayong-dagat.

Ito ang dahilan kaya’t nanawagan si Pangulong Duterte kay Migrant Workers Secretary Abdullah “Dabs” Mama-O na dagdagan ang mga one-stop shop para sa mga OFW na dapat matatagpuan sa iba’t ibang ahensya ng gobyerno.

Tatlo katao ang patay matapos pagsasaksakin sa Cainta, Rizal.

Kinilala ang mga biktimang sina Angelica Antonio Manaloto, 24 na taon, anak na si Nica Manaloto Mangi, 4 na taon at pamangking si Renz Orly Manaloto Trinidad, 7 taong gulang.

Ayon kay Rizal Provincial Police Director, Col. Dominic Baccay,  dakong ala 7 ng umaga noong Miyerkules nang madiskubre ang duguang bangkay ng mga biktima sa loob mismo ng kanilang bahay sa Rizal Street, Barangay San Juan.

Batay sa imbestigasyon, dumating ang kapatid ni Angelica na si Erickson Manaloto sa kanilang bahay at kumatok nang ilang beses pero hindi ito pinagbuksan.

Napansin din na bukas ang pintuan sa gilid ng kanilang bahay kaya’t nagtulong-tulong ang mga kapitbahay na buksan ang main gate at dito na tumambad sa kanila ang mga biktima.

Inaalam na ng mga otoridad ang motibo sa pagpaslang at sinisilip na rin kung may CCTV na malapit sa crime scene upang matukoy ang mga salarin.