Drew Nacino

Nilinaw ng Department of Labor and Employment (DOLE) na nananatiling suspendido ang deployment ng mga Overseas Filipino Worker (OFW) sa Saudi Arabia.

Taliwas ito sa mga kumakalat na advisory lalo sa social media na tinanggal na ng DOLE ang deployment ban.

Iginiit ni DOLE-Information and Publication Service Director Rolly Francia na walang katotohanan ang kumakalat na impormasyon.

Ito’y makaraang kumpirmahin ni POEA Administrator Bernard Olalia na hindi ito lumagda o naglabas ng  naturang advisory.

Nakikipag-ugnayan na anya ang DOLE sa mga law enforcement agency upang mapanagot ang sinumang nagpapakalat ng maling impormasyon na naka-aapekto na sa mga manggagawang Pinoy sa ibayong dagat.

Posibleng umabot sa 4,000 kada araw ang panibagong COVID-19 cases sa bansa pagpasok ng eleksyon sa Mayo 9.

Ito, ayon sa grupong OCTA, ay batay sa scenario ng humihinang immunity at kung papasok ang mga bagong variant.

Inihayag ni OCTA Fellow, Dr. Guido David na posibleng sumampa sa 1,000 ang bagong COVID-19 cases sa Metro Manila sa nasabing panahon.

Base anya sa karanasan ng Pilipinas, nagaganap ang COVID surge tuwing ikatlong buwan dahil sa mga bagong variant na maaaring pumasok sa bansa.

Dahil dito, binigyang-diin ni Vaccine Expert Panel Chairperson, Dr. Nina Gloriani ang kahalagahan ng pagpapabakuna at pagpapaturok ng booster bilang karagdagang proteksyon kontra COVID-19.

Hindi pa matiyak ng Palasyo kung ilalabas ni Pangulong Rodrigo Duterte ang listahan ng narco-politicians bago ang May 9 Elections.

Tugon ito ni Acting Presidential Spokesperson at Communications Secretary Martin Andanar sa tanong ng mga mamamahayag kung may posibilidad na isapubliko ng pangulo ang naturang listahan.

Magugunitang may inilabas din na drug list si Pangulong Duterte Noong 2019 Midterm Elections at bago pa ang nasabing halalan ay isa-isang pinangalanan ang ilang politikong sangkot umano sa illegal drug trade.

Layunin nitong tulungan ang publiko na pumili ng tamang kandidato.

Bagaman aminado si Andanar na walang katiyakan kung isasapubliko, nagpahayag naman anya ng suporta ang punong ehekutibo sa mga kandidato na sumusuporta sa kanyang mga programa at polisiya.

Marso 31 nang ihayag ni Pangulong Duterte na umaasa siya na ang susunod na presidente ay magiging masigasig din na harapin ang problema sa iligal na droga.

Dapat magpatupad ng mobility restrictions sa mga indibidwal na hindi pa nagpapa-booster dose kontra COVID-19.

Mungkahi ito ni Presidential Adviser for Entrepreneurship Joey Concepcion sa gitna ng bumabang vaccination rate at nagbabadyang expiration ng 27 million vaccine doses sa Hulyo.

Ayon kay Concepcion, bagaman hindi maaaring pilitin ang mga tao na magpabakuna, maaari namang ipagpatuloy ang mga dati ng hakbang at kabilang na ang paghihigpit sa mga hindi pa nagpa-booster.

Ipinanukala rin ng opisyal ang pagbibigay ng insentibo sa mga nakapagpa-booster na.

Samantala, kinatigan ni Philippine College of Physician President, Dr. Maricar Limpin ang hirit ni Concepcion at sinabing ang insentibo at restriksyon ang pinakamagandang paraan upang mahikayat ang publiko na magpaturok ng booster.

Dapat nang maghanda ang Pilipinas sa posibilidad ng panibagong COVID-19 surge sa susunod na dalawang buwan, lalo kapag natapos na ang May 9 Elections.

Ito ang inihayag ni Acting World Health Organization Representative to the Philippines, Dr. Rajendra Yadav matapos ang nakitang bahagyang pagtaas ng COVID-19 cases sa bansa.

Ayon kay Yadav, bilang preparasyon upang maiwasan ang posible muling pagtaas ng COVID-19 cases ay dapat magsuot ang lahat ng facemask at magpa-booster shots.

Binigyang-diin ng WHO official ang kahalagahan ng patuloy na recalibration ng COVID-19 response habang inirerekomenda rin nila ang house-to-house vaccination, para sa mga hindi pa nababakunahan.

Mula anya ngayong Abril hanggang Mayo ay magsasabay ang Semana Santa at Ramadan ng mga Filipino bukod pa sa mga election-related activity simula Pebrero 8 kaya’t asahan pa ang dagsa ng mga tao.

Una nang inihayag ng Infectious Disease Expert na si Dr. Rontgene Solante na ang mga siksikang campaign activities at humihinang immunity ng mga tao na wala pang booster ang mga maaaring maging dahilan ng panibagong COVID-19 surge.

 Tinatayang 20 milyong pisong halaga ng shabu ang nasabat ng mga otoridad sa Cabanatuan City, Nueva Ecijia.

 Ayon kay Nueva Ecija Police Provincial, Director Col. Jess Mendez, dalawang babaeng suspek mula sa Cavite ang inaresto sa buy-bust operation sa isang subdivision sa Barangay Sumacab Este.

 Limang beses na umurong ang mga suspek sa transaksyon bago sila nasakote.

 Nasa tatlong kilo ang bigat ng nasabat na droga na pawang high-grade at maaaring i-deliver sa ibang mga probinsya.

Nananatiling pinaka-mayaman sa bansa ang real estate magnate at dating senate president na si Manny Villar.

Batay sa 2022 Forbes’ World’s Billionaires list, lumundag sa $8.3-B ang net worth ni Villar kumpara sa $6.7-B noong 2021.

Dahil dito, umakyat sa 263rd richest person in the world ang dating senador mula sa 352^nd spot noong isang taon.

Sumunod si Ports Tycoon Enrique Razon Jr, na mayroong $6.7-B; Henry Sy Jr. ng SM Group at Andrew Tan ng Megaworld na kapwa may $2.8-B; magkakapatid na Sy; Ramon Ang ng San Miguel Corporation;

Lance Gokongwei ng JG Summit; Tony Tan Caktiong ng Jollibee; Betty Ang ng Monde Nissin; Lucio Tan ng Philippine Airlines;

Pinaka-bagong nadagdag sa listahan ang genomal brothers mula sa apparel maker na Page Industries at Maria Grace at Dennis Anthony Uy ng Converge ICT Solutions.

Samantala, pinaka-mayaman pa rin sa buong mundo si Elon Musk na may networth na $219-B.

Nasa P380-K ang tinangay ng isang lalaki mula sa isang E-sabong outlet Sa Rosario, Cavite.

Kinilala ni Rosario Municipal Police Chief, Col. Ruther Saquilayan ang suspek na si Christian Rodriguez, 40- anyos na isang contractor.

Ayon kay Saquilayan, tatlong beses umanong natalo si Rodriguez at inabot ng P200-K ang itinaya nito kaya’t hinoldap na ang nasabing outlet.

Noon anyang Huwebes ay isinangla pa ni Rodriguez ang kanyang motorsiklo sa supervisor ng betting station at nang hindi payagan ay naglabas ng baril ang suspek at tinutukan ang teller.

Bukod sa panghoholdap, inireklamo rin ang suspek ng mga nagpapagawa sa kanya ng bahay dahil iniiwan nitong naka-tengga ang mga proyekto bukod sa pag-dispalko ng mga advance mula sa mga customer.

Pinaghahanap na ng mga otoridad si Rodriguez na kasalukuyang nahaharap sa kasong Robbery.