Drew Nacino

Pinaalalahanan ni Acting Environment Secretary Jim Sampulna ang mga kandidato at kanilang mga taga-suporta na isaalang-alang ang kapaligiran habang nangangampanya para sa May 2022 elections.

Ito, anya, ay upang maprotektahan o mapangalagaan ang kapaligiran.

Inihayag ito ni Sampulna matapos makatanggap ng ulat na gumagamit ng paputok at nagpapalipad ng lobo sa Political rallies ang ilang kandidato.

Ang pagpapalipad ng lobo dahil sa oras na mawalan ng hangin ay posibleng bumagsak ito sa karagatan at magsilbing marine litter o basura.

Binubuo ang marine litter ng iba’t ibang materyales at karamihan dito ay mga plastic, tulad ng lobo, bag, sachet, wrapper, bote at iba pa.

Nakikita na sa bansa ang mga senyales ng transition ng COVID-19 Pandemic patungo sa Endemic stage dahil sa mas mabuting sitwasyon sa Healthcare Utilization Rate at bumababang bilang ng cases.

Ayon sa Infectious Disease Expert na si Dr. Edsel Salvana, miyembro ng government Vaccine Expert Panel,   unti-unti ang proseso at hindi madali ang transisyon sa Endemic stage.

Gayunman, base anya sa mababang healthcare utilization rate at bagong kaso ng COVID-19 na na i-uulat, maaaring patungo na ang bansa sa nasabing estado.

Ipinaliwanag ni Salvana na sa bawat araw na bumababa ang cases, isa naman itong hakbang patungo sa Endemicity.

Nag-rally ang mga guro na miyembro ng Alliance of Concerned Teachers sa Commission on Elections sa Intramuros, Maynila.

Ito’y upang isulong ang pagtanggal sa 20% tax sa honorarium para sa Board of Elections Inspectors sa Halalan 2022.

Ayon kay ACT Secretary-General Raymond Basilio, hindi pa rin natutugunan ng Comelec ang ilan sa apela ng nasa 300-K gurong magsisilbi sa eleksyon.

Dapat anyang tiyakin ng poll body na may sapat na budget ang mga guro upang masigurong maayos ang 2022 National at Local elections sa Mayo a – 9.

Isinusulong ng ACT-Philippines na dapat matanggap ng mga teacher na kabilang sa Board of Election Inspectors ang buong honoraria at allowances.

Opisyal nang binuo ng Commission on Elections ang Task Force na hahabol sa mga nagpapakalat ng mga maling balita at impormasyon na posibleng maka-apekto sa eleksyon.

Ayon kay Comelec Commissioner George Garcia, tinawag itong Task Force Kontra Fake News na huhuli sa mga indibidwal at grupo sa sisira sa kredibilidad ng electoral process.

Una nang bumuo ang Comelec ng Task Force para bantayan naman ang mga insidente ng vote-buying.

Si Commissioner Aimee Ferolino ang itinalagang In-charge sa grupong ito na pinangalanang Task Force kontra Bigay.

Ipinanukala ni Labor Secretary Silvestre “Bebot” Bello III ang pagbibigay ng P5-K wage subsidy sa tinatayang 1-M minimum wage earner sa small enterprises.

Ayon kay Bello, isinumite na niya ang proposal kay Pangulong Rodrigo Duterte subalit hindi pa ito inaaprubahan.

Kinumpirma naman ni Director Rolly Francia ng Information and Publication Service ng DOLE na ang proposal ay para sa mga manggagawang pinaka-naapektuhan ng COVID-19 pandemic at pagtaas ng inflation rate dulot ng Oil price hike at basic services.

Sa ilalim ng panukala ng kalihim, ibibigay ang P5,000 sa mga manggagawang nasa Interim period habang tinatalakay na rin ang hirit na minimum wage hike ng iba’t ibang regional wage boards.

Maglalatag pa anya ng mechanics pero pawang ang mga kumpanya ang magsusumite ng application habang magiging first-come, first-served basis ang approval gaya sa COVID-19 Adjustment Measure Program (CAMP).

Ang CAMP ang cash assistance program ng DOLE para sa mga minimum wage worker na labis na naapektuhan ng pandemya.

Nakararanas ng mahina hanggang sa malakas na pag-ulan ang ilang bahagi ng bansa dahil sa Low Pressure Area sa Mindanao at shear line, simula kahapon.

Ayon sa PAGASA, kabilang sa mga inuulan ang Metro Manila, Central Luzon, CALABARZON, MIMAROPA at Bicol dahil sa shear line.

Kalat-kalat na pag-ulan at thunderstorms naman ang nararanasan sa ilang bahagi ng Visayas at Mindanao dulot ng L.P.A.

Dahil dito, binalaan ng Weather Bureau ang mga residente sa mga nasabing lugar sa posibleng flash floods o landslides, lalo kung may kalakasan ang pag-ulan.

Naitala ng Department of Health kahapon ang pinaka-mababang daily COVID-19 infections ngayong taon.

Sa datos ng DOH umabot lamang sa 225 ang panibagong kaso ng COVID-19 kumpara sa naunang lowest daily tally na 246 noong March 29.

Sumadsad naman sa 33,629 ang active cases dahilan upang lumobo sa 3, 679, 983 ang kabuuang kaso sa bansa.

Nangunguna sa mga rehiyong may pinaka-mataas na COVID-19 cases sa nakalipas na dalawang linggo ang National Capital Region, 1,514; CALABARZON, 569 at Western Visayas, 394.

Samantala, umakyat na sa 3, 586, 984 ang nakarekober habang sumampa na sa 59,370 ang death toll.

Muling isinulong ni Pangulong Rodrigo Duterte ang House-to-House Anti-COVID-19 Vaccination program, partikular sa mga liblib at malalayong lugar.

Tugon ito ng pangulo sa pahayag ni Presidential Adviser for Entrepreneurship Joey Concepcion na mag-e-expire na sa Hulyo ang nasa 27-m doses ng COVID-19 vaccines.

Sa kanyang Talk to the People kahapon, nilinaw din ni Pangulong Duterte na sapat ang supply ng bakuna taliwas sa mga unang balita na sobra-sobra ang mga ito.

Samantala, nanawagan naman ang Punong Ehekutibo sa  New People’s Army iwasang saktan ang mga Healthcare worker na magsasagawa ng house-to-house vaccination sa mga malayong lugar.