Iginiit ni Pangulong Rodrigo Duterte na hindi siya mag-e-endorso ng sinumang presidential candidate sa May 9 elections.
Ipinaliwanag ni Pangulong Duterte na ayaw niyang isipin ng mga tao na ginagamit niya ang pondo ng gobyerno upang i -kampanya ang kanyang kandidato.
Ayon sa Punong Ehekutibo, wala siyang pinapanigan sa sinumang presidential candidate upang maiwasan ang mga pagdududa.
Ibinasura ni Pangulong Rodrigo Duterte ang mga hirit na alisin na ang COVID-19 Alert level o ilagay sa Alert level 0 ang malaking bahagi ng bansa bilang transition sa “New normal”.
Sa kanyang Talk to the People, iginiit ni Pangulong Duterte na mayroon pa ring banta ng COVID-19 bukod pa sa mga nadiskubreng bagong variant nito.
Mananatili anya ang Alert level 1 hangga’t hindi bumababa sa single digit ang bilang ng nagkakasakit.
Puspusan na ang gobyerno sa paglalatag ng mga hakbang upang tugunan ang epekto ng inflation na dala ng giyera sa pagitan ng Russia at Ukraine.
Ito ang tiniyak ng National Economic and Development Authority (NEDA) makaraang i-ulat ng Philippine Statistics Authority (PSA) na bumilis ang inflation ng 4% noong Marso kumpara sa 3% noong Pebrero.
Ayon kay Socioeconomic Planning Secretary Karl Kendrick Chua, simula pa noong Marso a – 17 ay nagpapanukala na ang Economic Development Cluster ng mga interventions upang mapangasiwaan ang epekto ng inflation sa ekonomiya at mga mamamayan.
Ang mataas na Inflation rates para sa Food at Non-food commodity groups ay resulta ng ‘mas mabilis na inflation’ noong Marso.
Nakatakda nang magdeklara ng State of Calamity ang local government ng San Jose, Occidental Mindoro sa gitna ng hinaing na pagkalugi ng mga magsasaka dahil sa bagsak-presyong sibuyas.
Labing-pitong (17) barangay ang apektado ng pagbulusok ng presyo ng lokal na sibuyas na mabibili na lang sa anim na piso kada kilo.
Isinisi naman ni San Jose Mayor Romulo Festin sa importasyon ng sibuyas ang hindi na mabili-biling pananim ng mga lokal na magsasaka sa lalawigan.
Bukod sa bagsak-presyo, naapektuhan din ang mga pananim ng pesteng harabas dahilan upang umabot na sa P72-M ang halaga ng pinsala.
Samantala, nilinaw ni Agriculture Assistant Secretary Noel Reyes na walang pinipirmahang Importation Permit ang D.A. at maaaring smuggled ang mga imported na sibuyas na dumaragsa sa mga pamilihan.
Isang panibagong sub-type ng COVID-19 ang nadiskubre sa China.
Bagaman wala pang pangalan, kakaiba umano ang virus sa lahat ng kasalukuyang COVID-19 variant sa China pero tila nagmula ito sa BA.1.1 na Omicron.
Isinumite na ng China ang virus sa Global Initiative on Sharing All Influenza Data upang pag-aralan ng mga siyentista at eksperto at makapaglatag ng mga hakbang para mapigilan ang pagkalat nito.
Natuklasan ng mga eksperto sa China na dala-dala ang virus ng isang pasyenteng may mild COVID-19 sa Dalian City at kasama ito sa 13K nagpositibo sa sakit.
Hindi pa matiyak kung ilan na ang tinamaan ng bagong sub-type kasabay ng patuloy na paglobo muli ng kaso ng COVID-19 sa China, kabilang na ang mga pinakamalalaking lungsod tulad ng Beijing at Shanghai.
Itinakda na sa Biyernes, Abril a – 8 ng Regional Tripartite Wages and Productivity Board sa National Capital Region ang pagtalakay sa mga petisyong umento sa minimum wage ng mga manggagawa.
Ayon kay NCR Wage Board Chairperson Sarah Buena Mirasol, isasagawa nila ang konsultasyon sa hanay ng mga manggagawa habang itinakda sa Abril a – 19 ang konsultasyon sa panig ng mga employer.
Gaganapin naman ang public hearing sa Mayo a – 5.
Inihayag din ng Regional Wage Board na may nakatakda talagang pagtalakay sa wage increase petitions noong 2020 subalit naudlot dahil sa COVID-19 pandemic.
Sa ilalim ng batas, dapat ay face-to-face ang public hearing sa usapin ng wage increase.
Magugunitang ibinasura ng Wage Board ang apela ng Trade Union Congress of the Philippines na P470 na dagdag-sahod para sa mga manggagawa sa Metro Manila.
Mahigpit na ring binabantayan ng Department of Health at World Health Organization ang dalawa pang klase ng Omicron recombinant na X.D. at X.F., bukod pa sa X.E.
Ang recombinant ay tumutukoy sa kombinasyon ng dalawang magkaibang variant ng virus.
Unang na-detect ang Omicron X.D. sa France na tinawag na variant under monitoring ng W.H.O. habang ang X.F. din ay re-combination ng Delta at Omicron.
Kombinasyon naman ng BA.1 at BA.2 subvariant ng Omicron ang X.E. na batay sa mga pag-aaral ay sampung beses na mas nakahahawa sa BA.2 na unang na-detect sa U.K. at naitala kamakailan sa Thailand.
Aminado si Dr. Maricar Limpin, pangulo ng Philippine College of Physicians, na nakababahala ang posibleng maging epekto ng mga nabanggit na Omicron hybrid ngayong mas maluwag na ang restriksyon na sinabayan pa ng kaliwa’t kanang campaign activities.
Bagaman wala pang nade-detect na X.E. variant sa Pilipinas, nagbabala na ang ilang eksperto sa posibleng pagpasok nito lalo’t bukas na ang borders ng bansa sa lahat ng foreign travelers.
Nagreresulta na sa napakalaking multa ang pagpupumilit ng gobyerno sa mga provincial bus mula Northern Luzon na gamitin ang North Luzon Express Terminal sa Bocaue, Bulacan.
Ito ang inihayag ni dating senador at Public Transportation Advocate Nikki Coseteng sa gitna ng pagtatapos bukas ng dry run ng pagbabalik ng mga provincial bus sa EDSA at inaasahang pagdagsa ng mga biyahero sa Semana Santa.
Ayon kay Coseteng, kailangan munang magbayad ng P100-K kada buwan ang mga bus company sa bawat slot sa naturang pribadong terminal o katumbas ng P1.2-M kada taon at P12-M kung sampung slots.
Bukod pa ito sa babayarang P400 kada papasok upang mag-pickup o magbaba ng mga pasahero na isa anyang kalokohan habang mayroon pang multang P1-M bawat bus kahit may prangkisa kung papasok ng Metro Manila.
Iginiit ng dating mambabatas na mabigat pa rin naman ang daloy ng trapiko sa EDSA kahit walang mga provincial bus at sa katunayan ay mga pribadong sasakyan ang nagdudulot ng matinding traffic sa nabanggit na pangunahing kalsada.
Ipinunto ni Coseteng na kung tutuusin ay nasa 11K ang mga provincial bus sa buong bansa kumpara sa 400K pribadong sasakayan na dumaraan sa EDSA kada araw.
Nilinaw ni Health Secretary Francisco Duque III na nagkaroon ng backlog kaya’t bahagyang tumaas ang kaso ng COVID-19 sa bansa.
Ito ang tugon ni Duque sa gitna ng pangamba ng OCTA Research group sa kapansin-pansing bahagyang pagtaas ng COVID-19 cases.
Sa katunayan anya ay mababa ang positivity rate habang tinututukan pa rin ang Health Care Utilization Rate.
Samantala, pinawi ng kalihim ang pangambang magkaroon muli ng COVID-19 surge sa bansa.
Sa gitna ng maritime dispute at peligrosong aktibidad ng chinese vessels sa West Philippine Sea, hinimok ng China ang Pilipinas na alisin ang mga nakasasagabal sa relasyon ng dalawang bansa.
Ito ang naging panawagan ng Tsina matapos ang pag-uusap nina Foreign Affairs Secretary Teddy Locsin at Chinese State Councilor at Foreign Minister Wang Yi sa Anhui Province, China.
Nagkasundo rin ang dalawa na dapat ilagay sa isang maayos na konteksto sa bilateral relations ang issue sa West Philippine Sea.
Tiniyak naman ni Wang na laging ikinukunsidera ng China ang Pilipinas bilang prayoridad sa foreign diplomacy at isang mabuting kapitbahay at kaibigan.