Drew Nacino

Muling ipinanawagan ni Pangulong Rodrigo Duterte ang pag-amyenda o pagbuwag sa probisyon hinggil sa party-list system sa 1987 Constitution.

Sa kanyang talumpati matapos mag-inspeksyon sa isang evacuation center sa Batangas, iginiit ng pangulo na ginagamit lamang ng mga mayaman at makapangyarihan ang partylist para sa kanilang interes.

Bagaman maganda naman ang pagkakagawa sa saligang batas ng Pilipinas, halos lahat naman anya ng nilalaman nito ay hinango sa American Constitution at idinagdag ang party-list system.

Upang maiwasan ang korapsyon sa gobyerno at pagkabusog ng bulsa ng mga tiwaling opisyal, dapat na anyang baguhin ang Saligang Batas sa pamamagitan ng Constituent Assembly o Constitutional Convention.

Nagpapasaklolo na sa gobyerno ang mga magsasaka sa Occidental Mindoro sa labis na pagkalugi sa mga tanim nilang sibuyas.

Sa ngayon ay nasa P8 hanggang P12 na lang ang farm gate price ng kada kilo ng local na sibuyas.

Ipinaliwanag ng provincial agriculture office ng Occidental Mindoro na sobra ang suplay ng sibuyas hindi lang sa Mindoro at marami rin ang nagtanim sa Northern Luzon.

Punong-puno na rin ng mga imported na sibuyas ang mga storage facility kaya tumigil na ang mga buyer sa pagbili ng lokal na sibuyas.

Umapela naman si Occidental Mindoro governor Eduardo Gadiano sa national government, partikular sa Department of Agriculture na i-regulate o importasyon gayong marami ang lokal na produksyon.

Bukod dito ay hiniling din ni Gadiano sa DA ang pagpapatayo ng karagdagang cold storage facility.

Karagdagang ruta sa Commonwealth Avenue ang muling bubuksan ng Land Transportation Franchising and Regulatory Board sa gitna ng dumaraming pasahero ngayong nasa Alert level 1 ang Metro Manila.

Ayon sa LTFRB, anim na ruta ang binuksan para sa 158 units ng modern Public Utility Jeepney; 76 na ruta para sa mahigit 4,100 traditional jeep;

Isang ruta para sa labinsyam na unit ng modern UV express service at 20 ruta para sa mahigit 2,700 units ng traditional UV express service.

Sa muling pagbubukas ng mga karagdagang ruta, umaasa ang LTFRB na matutugunan ang kakulangan ng public transport sa gitna ng dumaragsang mga commuter.

Humingi na ng paumanhin ang Land Transportation Franchising and Regulatory Board sa pagka-delay ng mga bus na nagdulot ng mahabang pila ng mga pasahero sa Commonwealth Avenue, Quezon City.

Nagpatawag agad ng emergency meeting si LTFRB Chairman Martin Delgra matapos ang napaulat na insidente sa LITEX hanggang Sandiganbayan kahapon ng umaga kaya’t maraming pasahero ang walang nasakyan.

Batay sa imbestigasyon ng board, wala pa sa kalahati ng 510 awtorisadong mga bus ang pinabiyahe ng mga operator sa route 5 o Angat-Quezon Avenue via Commonwealth.

Papanagutin naman ng ahensya ang United Mega Manila Bus Consortium sa aberya.

Sumalang na sa ikalawang bugso ng Pilipinas Presidential Debates ng Comelec ang mga presidentiable.

Unang tinanong sa mga kandidato kung ang korapsyon ay dulot ng kahinaan ng tao o kahinaan ng sistema.

Iginiit ni Labor Leader Leody De Guzman na dapat isulong ang radikal na reporma sa political at electoral system ng bansa laban sa katiwalian.

Para kay Manila City Mayor Isko Moreno, kailangan ng modernong teknolohiya upang malimitahan ang “human interaction sa government transactions”.

Nananawagan naman si dating Defense Secretary Norberto Gonzales ng pagbabago sa sistema ng gobyerno.

Bilang isang dating PNP Chief, naniniwala si Senador Ping Lacson na kailangan ang mahigpit na pagpapatupad ng batas.

Tinalakay din sa ikalawang bugso ng Pili-Pinas Debates 2022: The Turning Point ang mga solusyon sa kinakaharap na problema sa tubig.

 Ayon kay Vice President Leni Robredo, kabilang sa kanyang ipinanukala ang infrastructure program, tulad ng water resource management at bagong source ng tubig, partikular ang mga ilog.

 Hinimok ni Senator Panfilo Lacson na itaas dagdagan ang pondo para sa research at development spending upang maiwasan ang waste water at i-promote ang paggamit sa sustainable water.

 Sa panig ni Manila Mayor Isko Moreno, dapat anyang mag-invest ang mga water company sa imprastraktura upang matiyak na may access sa malinis na inuming tubig ang bawat kabayahan.

 Naniniwala naman si dating Defense Secretary Norberto Gonzales na kailangan ng isang national strategy upang mabatid kung paano pangangasiwaan nang maayos ang water supply ng bansa.

 Samantala, isinulong ni Senator Manny Pacquiao ang paglikha ng Department of Water.

Naniniwala naman si Senador Manny Pacquiao na kailangan ng leadership at political will upang puksain ang katiwalian.

Ayon kay Pacquiao, nais niyang makitang nakakulong ang mga magnanakaw sa gobyerno upang hindi na pamarisan ng iba.

Sa panig ni Vice President Leni Robredo, ang katiwalian anya ay kombinasyon ng kahinaan sa sistema at mga taong nasa gobyerno.

Para kay dating Presidential Spokesman Ernesto Abella, dapat makibahagi ang mga mamamayan sa pamamalakad sa Local Government Unit.

Inihayag naman ni Faisal Mangondato talamak na ang korapsyon sa lahat ng ahensya ng gobyerno.

Samantala, kumbinsido si Dr. Jose Montemayor na kahit anong ganda ng sistema ng gobyerno, hindi pa rin mawawala ang problema kung ang ugali ng mga tao ay tiwali.