Karagdagang 690 COVID-19 cases ang naitala ng Department of Health (DOH) ngayong unang linggo ng Abril.
Sa datos ng DOH, sumadsad pa sa 35,967 ang aktibong kaso kahapon kumpara sa 37,115 noong Sabado.
Umakyat sa 3,679,629 ang kabuuang bilang habang 3,584,319 ang recoveries at sumampa na rin sa 59,343 ang death toll.
Pinaka-maraming naitalang kaso sa Metro Manila sa nakalipas na dalawang linggo na 1,573; Region 4-A, 588, at Region 6, 442.
Maagang dumagsa sa Golden Mosque sa Quiapo, Maynila ang mga Pilipinong muslim kasabay ng pagsisimula ng Ramadan kahapon.
Madaling araw pa lamang nang magdatingan sa Golden Mosque ang mga Pinoy-muslim upang magdasal.
Ito rin ang simula ng isang buwang pag-aayuno o fasting kasabay ng tradisyong pagdarasal nang limang beses sa loob ng isang araw o salat.
Ang ramadan ang ika-siyam at pinakabanal na buwan sa Islamic Calendar.
Samantala, ito ang kauna-unahang pagkakataon na nakapasok muli sa Golden Mosque para sa ramadan ang mga muslim matapos hindi payagan noong 2020 at 2021 dahil sa COVID-19 pandemic.
Pabor ang mga presidential candidate sa pagpasa ng batas kontra mga “political butterfly” o balimbing sa pulitika.
Sa ikalawang bugso ng Pilipinas Debates 2022: The Turning Point, ang papalit-palit ng partido ang nagpapahina sa Political Party System sa bansa.
Kinatigan din ni Labor Leader Ka Leody De Guzman ang pahayag ni Robredo.
Samantala, kinuwestyon nina Dr. Jose Montemayor, Manila City Mayor Isko Moreno at negosyanteng si Faisal Mangondato kung dapat na bang baguhin o buwagin ang sistema ng paghahalal ng Party-list representatives.
Para naman kay Dating Defense Secretary Norberto Gonzales, dapat maging malinaw ang depinisyon salitang “party” o partido.
Isa ang patay habang 59 ang sugatan sa panibagong pagsabog sa Kabul, Afghanistan.
Naganap ang pagsabog malapit sa isang Money Exchange Hub.
Ayon sa Taliban Interior Ministry, isang magnanakaw ang naghagis ng granada sa naturang lugar.
Gayunman, wala pang grupong umaako sa nabanggit na insidente.
Handa na ang Department of Labor and Employment (DOLE) at Philippine General Hospital (PGH) sa pagbubukas ng kauna-unahang ospital para sa mga Overseas Filipino Worker (OFW).
Inanunsyo ng DOLE na nakipagpulong na sila sa PGH doctors at sa mga opisyal ng Overseas Workers Welfare Administration (OWWA) bilang preparasyon sa pagpapasinaya sa OFW hospital.
Papasinayaan ang nasabing pagamutan sa San Fernando, Pampanga, sa Labor day, Mayo a – uno.
Tinalakay sa pulong ang operation plans ng ospital at sumailalim sa orientation ang mga bagong tauhan na kinabibilangan ng mga doktor at nurse.
Una nang inihayag ni Labor Secretary Silvestre Bello III na ang konstruksyon ng nasabing gusali ay pagkilala sa mga tinaguriang modern-day heroes ng bansa.
Pinaghahandaan na ang muling pagbubukas ng turismo sa Batanes Islands.
Binigyang-diin ni Batanes Governor Marilou Cayco ang pagbalangkas ng mga polisiya at guidelines para sa mga daragsang turista kasabay ng pagsasa-ayos sa mga tourist site maging ang tuloy-tuloy na training at inisyatibo sa lahat ng tourism stakeholders.
Tiniyak din ni Cayco na tutugunan ng probinsiya ang pangangailangan ng lahat ng naapektuhang manggagawa sa sektor ng turismo at mga negosyo gaya ng pansamantalang trabaho at iba pang kabuhayan.
Tatalima din anya ang lalawigan sa guidelines at health protocols ng Department of Tourism.
Samantala, inihayag ng gobernador na prayoridad pa rin ng pamahalaan ang buhay at kalusugan ng mga tao kaya mahigpit na ipinatutupad ang minimum health protocols lalo’t nananatiling banta ang COVID-19.
Muling tiniyak ng National Water Resources Board (NWRB) na hindi sila magbabawas ng supply ng tubig para sa mga residente sa Metro Manila ngayong buwan.
Ayon kay NWRB Executive Director Sevillo David Jr, walang magiging pagbabago sa alokasyon para sa Metro Manila na nasa 48 cubic meters per second na mula sa Angat Dam.
Gayunman, iba anya ito sa nabawasang supply para sa mga irigasyon na bumaba sa 5 cubic meters.
Hanggang kahapon, bahagyang tumaas sa 190.82 meters ang lebel ng tubig sa Angat Dam kumpara sa 190.72 meters noong Sabado.
Pinayagan na ng pamunuan ng Quiapo Church ang pagbabalik ng tradisyunal na pahalik sa Poong Itim na Nazareno.
Ayon kay Fr. Douglas Badong, Parochial Vicar ng Minor Basilica of the Black Nazarene, regular ang sanitation sa mga pasilidad ng simbahan lalo sa poon.
Marso taong 2020 nang ipatigil ang pahalik dahil sa COVID-19 pandemic.
Ipinagbabawal naman halikan o ilapit ang ilong sa imahe, maging ang pagpahid ng panyo upang maiwasan ang posibleng hawaan ng sakit.
Samantala, nanawagan ang simbahan sa mga deboto na patuloy na sumunod sa health protocols, upang magtuloy-tuloy na ang tradisyunal na ‘pahalik’ sa Black Nazarene.
Hinikayat ng Department of Health ang mga COVID-19 vaccination site sa bansa na ipagpatuloy ang kanilang operasyon kahit Semana Santa.
Ayon kay Health Undersecretary Myrna Cabotaje, maglalabas sila ng memorandum sa iba’t ibang DOH hospitals upang himukin ang mga ito na ituloy ang bakunahan sa Mahal na Araw.
Gayunman, nilinaw ni Cabotaje, na chairperson din ng National Vaccination Operations Center, naka-depende rin ito sa mga local government unit.
Samantala, umapela si Health Undersecretary Maria Rosario Vergeire sa mga lider ng simbahan na iwasan muna ang mga aktibidad na maaaring makapagpataas ng banta ng hawaan ng COVID-19.
Ito ang panawagan ni Vergeire matapos payagan muli ang tradisyunal na “pahalik” para sa mga deboto ng poong Itim na Nazareno sa Quaipo Church.
Naitala kahapon ang pinaka-mainit na temperatura sa Metro Manila ngayong taon.
Ayon sa PAGASA, umabot sa 36 degrees celsius ang temperatura sa Science Garden, Quezon City, pasado ala una ng hapon.
Katumbas ito ng 39 degrees celsius heat index o init factor.
Sumampa naman sa 36.5 degrees celsius sa San Jose, Occidental Mindoro, na pinaka-mataas na temperatura sa bansa sa ngayon.
Una nang ibinabala ng PAGASA na titindi pa ang init ng panahon sa mga susunod na araw lalo’t noon lamang Marso 16 opisyal na nagsimula ang tag-init.