Drew Nacino

Halos lahat ng Filipino ay naniniwalang dapat magbigay ang gobyerno ng libreng gamot sa mga pasyente.

Batay ito sa resulta ng survey ng Social Weather Stations (SWS) noong Disyembre na kinomisyon ng Pharmaceutical and Healthcare Association of the Philippines (PHAP).

Lumabas sa survey na 96% ng respondents ang pabor na magkaloob ng libreng gamot ang pamahalaan.

Karamihan ng mga respondent ay kumbinsidong ang pinaka-mabisang paraan upang mabigyan ng gamot ang mga may malubhang karamdaman ay sa pamamagitan ng Philhealth subsidy o public hospitals at iba pang health facilities.

Samantala, napag-alaman ng PHAP sa survey na ang pagbili ng mga gamot ang pinaka-mabigat na health care expense, na sinundan ng pagbabayad ng doctor’s fees, laboratory fees at hospital room kung ma-oospital.

Idinepensa ni Pangulong Rodrigo Duterte ang walang tigil na pangungutang ng gobyerno kasabay ng paglobong outstanding debt ng bansa sa mahigit 12 trillion pesos.

Aminado si Pangulong Duterte na kailangan ng pamahalaan ng malaking halaga ng pera upang pondohan ang mga big ticket project.

Inihalintulad din ng punong ehekutibo ang bansa sa isang bahay at negosyo na kailangan ng expansion upang patuloy na umunlad.

Wala anyang gobyerno sa mundona hindi nangungutang lalo’t kung kulang ang mga buwis upang pondohan ang pangangailangan ng mga mamamayan maging ng mga malalaking proyekto.

Idinagdag pa ni Pangulong Duterte na hindi masamang humiram ng pera lalo’t para naman ito sa kapakanan ng nakararami habang kanyang hinikayat ang mga local government unit na mangutang din.

Nanawagan si COMELEC Commissioner Geroge Garcia sa kongreso na lumikha ng batas na mag-oobliga sa mga kandidato na dumalo sa mga debate tuwing panahon ng eleksyon.

Ayon kay Garcia, nakapaloob din dapat sa lilikhaing batas ang mga parusa laban sa mga kandidatong tatangging lumahok sa mga katulad na aktibidad.

Aminado ang poll official na hindi sila maaaring magpataw ng parusa dahil tiyak na kukuwestyunin ito ng mga kandidato lalo’t wala namang batas na nag-oobliga sa mga ito na dumalo sa mga debate.

Sa Linggo, Abril 3 ang ikalawang sigwada ng inorganisang presidential debate ng COMELEC na mapakikinggan at mapanonood sa mga telebisyon, radyo at social media, kabilang na sa DWIZ 882 at CNN Philippines.

Kasabay ng patuloy na pagbaba ng lebel ng tubig sa ilang water reservoir, sinimulan na ang cloud seeding sa Angat Dam, sa Bulacan.

Kinumpirma ni National Water Resources Board Executive Director Sevillo David na magkatuwang ang Manila Waterworks and Sewerage System (MWSS) at PAGASA sa Cloud-Seeding Operations.

Ang naturang Water Reservoir ang pangunahing pinagkukunan ng tubig ng Metro Manila, irrigation water sa Bustos Dam sa Bulacan at ilang bahagi ng pampanga at power generation sa Luzon Grid.

Batay sa monitoring ng PAGASA hanggang kahapon, bumaba na sa 190.94 meters ang lebel ng tubig sa Angat o 10 metro na lamang ang agwat mula sa critical level na 180 meters.

Ibinunyag ni Pangulong Rodrigo Duterte na nais makipag-usap sa kanya ni Chinese President Xi Jinping.

Sa kanyang talumpati sa Lapu-Lapu City, Cebu, inihayag ni Pangulong Duterte na nakatakda silang mag-usap ni Xi sa susunod na Biyernes, Abril a–8.

Gayunman, hindi idinetalye ng punong ehekutibo kung sa telopono o face-to-face meeting ang magaganap sa pagitan nila ng presidente ng Tsina.

Wala ring ibinigay si Pangulong Duterte na detalye kung ano ang tatalakayin nila ni Xi.

Agosto taong 2019 pa ang huling biyahe ni Duterte sa China kung saan kanyang binuksan ang issue ng pagkapanalo ng Pilipinas sa Arbitral Tribunal noong 2016 hinggil sa maritime claims nito sa South China Sea.

Pero maka-ilang ulit binaliwala ng China ang nasabing tagumpay ng Pilipinas sa Arbitral Tribunal sa The Hague, Netherlands.

Aminado ang Commission on Elections (COMELEC) na magiging mahirap ang pag-usig sa mga insidente ng vote buying na napapaulat sa social media.

Ito, ayon kay COMELEC Commissioner George Garcia, ay kung walang mga taong nagbibigay ng kanilang testimonya.

Bagaman sapat anya ang mga social media post upang magsagawa ng imbestigasyon ang Anti-Vote Buying Task Force, hindi naman uusad ang kaso kung walang testimonya mula sa mga taong kumuha ng video.

Inihalimbawa ni Garcia ang mga naunang kaso kaugnay sa vote buying na hindi umusad dahil umatras ang mga complainant habang itinuring na walang kredibilidad ang ilang ebidensya.

Ipinaliwanag ng poll official na para maberipika ang isang video, dapat itong ipadala sa investigation team o COMELEC field personnel upang maging sarili nilang documentary evidence.

Una nang nagtatag ang poll body ng Task Force kontra Vote Buying na pangungunahan ng national Bureau of Investigation habang ang Department of Justice (DOJ) ang magsisilbing taga-usig sa kaso.

Exempted sa election-related spending ban ng Commission on Elections (COMELEC) ang COVID-19 immunization program ng pamahalaan.

Alinsunod ito sa hiling ng Department of Health (DOH) na pinagbigyan naman ng COMELEC.

Ayon kay COMELEC Commissioner George Garcia, pinagbigyan din ng poll body ang petisyong inihain ng Department of Trade and Industry (DTI).

Nasa 20 pa anyang mga petisyon ang kanilang tatalakayin sa susunod na lingo.

Sa ilalim ng COMELEC Resolution 10747, kailangan ang isang certificate of exemption upang patuloy na maipatupad ang programa at proyekto para sa kapakanan ng mga pilipino habang pinaiiral ang public spending ban mula March 25 hanggang may 8, 2022.

Magugunitang pinayagan ng COMELEC na ma-exempt sa spending ban ang COVID-19 initiatives ng Office of the Vice President.