Drew Nacino

Idineklara na ng Department of Agriculture ang outbreak ng Avian Influenza o H5N1 sa bansa.

Ito’y bunsod ng tumataas na bilang ng Avian Flu cases na karamiha’y sa Central Luzon.

Ayon kay Agriculture Secretary William Dar, apektado ng outbreak ang mga itikan at puguan sa Central Luzon dahil sa pagdami ng migratory birds sa bansa.

Nag-issue na si Dar ng memorandum circular upang paigtingin ang containment at ma-control ang outbreak.

Sa ilalim ng kautusan, i-reregulate ang pagpasok at paglabas sa 1 kilometer quarantine area ng mga poultry products, tulad ng manok, itik at pugo sa mga lugar na apektado.

Nakatakda nang simulan ngayong unang bahagi ng taon ang konstruksyon ng tatlong climate-resilient bridges na idinesenyo upang i-decongest ang ilang pangunahing kalsada sa Metro Manila at makalikha ng mas maraming trabaho.

Tinukoy ni Finance Secretary Carlos Dominguez ang Marcos Highway-Saint Mary Avenue Bridge, Homeowner’s Drive-A. Bonifacio Bridge at Kabayani Street-Matandang Balara Bridge na bahagi pa rin ng Build, Build, Build Program ng Duterte administration.

Ayon kay Dominguez, nagkakahalaga ng 8.8 billion pesos ang mga naturang infrastructure project na target tapusin sa taong 2026.

Ang mga nasabing tulay na tatawid sa Marikina River at kabilang sa 12 itatayo sa ilalim ng Metro Manila Bridges Project, ay may kakayahang tumindig sa kabila ng mga malakas na lindol at inaasahang makababawas sa flood risks sa mga naturang lugar.

Nagpasalamat naman ang kalihim sa Asian Development Bank para sa pag-popondo sa konstruksyon ng mga tulay.

Muling binalaan ni National Task Force Against COVID-19 Medical Adviser, Dr. Ted Herbosa ang publiko sa kabila ng patuloy na pagbaba ng Coronavirus cases sa bansa.

Iginiit ni Herbosa na hindi dapat magpaka-kampante ang publiko lalo’t hindi pa nawawala ang banta ng COVID-19 kahit nasa alert level 1 o mas maluwag na restriction.

Hindi anya dapat kalimutan ang pagsusuot ng face mask, surgical mask o N-95 mask at ipagpatuloy ang pagtalima sa minimum public health standards sa gitna  ng tumataas na vaccination coverage.

Pinag-iingat din ni Herbosa ang mga tao sa pagpunta sa mga crowded area dahil malaki ang tsansang kumalat ang virus sa mga ganitong lugar.

Nitong March 23 hanggang 29, nakapagtala ang Pilipinas ng karagdagang 2,651 COVID-19 cases kumpara sa 3,319 additional infections sa nakalipas na linggo.

Kinumpirma ng Partido Federal ng Pilipinas na “final and executory” na ang 1999 ruling ng Supreme Court sa Estate Tax ng pamilya ng kanilang presidential candidate na si dating senador Ferdinand “Bongbong” Marcos, Jr.

Gayunman, nilinaw ni Atty. George Briones, General Counsel ng Partido na 23 billion pesos lamang ang halaga ng Estate Tax sa halip na 203 billion pesos.

Ayon kay Briones, “subject for reconciliation” pa at hindi pa pinal ang ruling sa penalties at surcharges na lumobo sa 180 billion pesos sa nakalipas na ilang taon.

Bagaman walang pangalanang binanggit, magugunitang kinuwestyon ni Pangulong Rodrigo Duterte ang Bureau of Internal Revenue sa hindi pa nasisingil na Estate Tax ng isang indibidwal o pamilya.

Ito’y upang magamit bilang karagdagang pondo para sa mga proyekto ng gobyerno.

Inupakan ni dating Foreign Affairs Secretary Albert Del Rosario ang Chinese Coast Guard sa pagtatangka nitong gitgitin ang isang Philippine Coast Guard (PCG) Vessel sa Bajo De Masinloc o Scarborough Shoal.

Kinundena rin ni Del Rosario ang nasabing aksyon ng China dahil nalagay sa panganib ang buhay ng mga Filipino na lulan ng BRP Malabrigo ng PCG.

Ang nasabi anyang insidente ay malinaw na panghihimasok sa teritoryo ng bansa lalo’t ang Scarborough ay nasa loob ng 200 nautical mile exclusive economic zone ng Pilipinas.

Dahil anya rito ay mayroong “exclusive sovereign rights” ang Pilipinas sa nasabing lugar, bagay na pinagtibay ng Permanent Court of Arbitration sa The Hague, Netherlands noong 2016.

Nanindigan din ang dating kalihim na teritoryo ng Pilipinas ang Scarborough o Panatag Shoal at nasa ilalim ito ng soberanya ng bansa at hindi sa China, kaya’t ang insidente noong March 2 ay isang paglabag sa International Law and Agreements.

Asahang titindi pa ang init ng panahon sa abril.

Ito ang inihayag ng PAGASA matapos maitala ang pinaka-mataas na heat index sa ngayon sa Dagupan City, Pangasinan na 53 degrees celsius noong Marso a-17.

Katumbas ito ng 35 degrees celsius na aktuwal na temperatura at relative humidity na 74%.

Ayon sa PAGASA, ang heat index na mas mataas sa 52 degrees celsius ay ikinukunsidera ng nasa “extreme danger” level.

Kahapon, umabot sa 50 degrees celsius ang heat index sa Dagupan City dakong alas dos ng hapon.

Pinayuhan naman ng State Weather Bureau ang publiko na uminom lagi ng tubig, iwasang lumabas tuwing tanghali hanggang hapon at magsuot din ng komportableng damit.

Ilang pagbabago sa Application for Exemption sa pagbibitbit ng baril ang inanunsyo ng Commission on Elections (COMELEC) ngayong panahon ng eleksyon.

Ayon kay COMELEC Chairman Saidamen Pangarungan, sinang-ayunan ng En Banc na amyendahan ang COMELEC Resolution 10728 na nagtatakda ng mga patakaran sa gun ban na sinimulang ipatupad noong January 9.

Ilan anya sa mga pagbabago ang decentralization ng pagbibigay ng exemption sa regional directors at election officers, habang automatic exemption sa justices, judges at prosecutors, kabilang ang ombudsman.

Binigyan din ng isang linggo ang Committee on the Ban on Firearms and Security Concerns para ayusin at isapinal ang panukalang pag-amyenda at tiyaking lahat ng regional directors at election officers ay may kakayahang tumupad sa trabaho.

Samantala, anumang paglabag sa probisyon ng resolusyon ng COMELEC ay ikukunsiderang election offense at may parusang isa hanggang anim na taong pagkakakulong nang walang posibilidad ng probation.

Mawawala rin ang karapatan sa pagboto at tuluyang madi-diskuwalipika sa paghawak ng anumang posisyon sa gobyerno ang sinumang lalabag o lumabag.