Drew Nacino

Walang umanong epekto sa bilang ng COVID-19 cases sa Baguio City ang pagkaka-diskubre sa Omicron subvariant BA.2.12 sa lungsod.

Ito ang tiniyak ni Baguio City Mayor Benjamin Magalong sa gitna ng posibleng idulot ng nasabing subvariant sa ekonomiya, partikular sa sektor ng turismo sa summer capital.

Bagaman noon pa anyang April 11 nag-positibo ang dayuhan sa Omicron subvariant, hindi naman nagkaroon ng increase ng COVID-19 cases kahit peak tourist season ngayon sa City of Pines.

Kumbinsido naman si Magalong na na-control nila ang sitwasyon.

Samantala, inihayag ni Baguio City Health Officer, Dr. Rowena Galpo nasagawa naman sila ng contact tracing sa lahat ng nakasalumuha ng babaeng taga-Finland na at wala kahit isa sa kanila ang positibo sa COVID-19.

Wala rin anyang nagpakita ng kahit anumang sintomas ng sakit sa mga sumailalim sa test.

Limang hinihinalang carnapper at holdaper ang patay matapos makipagsagupaan sa mga pulis sa Tabuk City, Kalinga.

Ayon kay Kalinga Police Provincial Office-Deputy Provincial Community Affairs, Maj. Garry Gayamos, matapos nilang mamonitor ang mga suspek ay agad silang naglagay ng checkpoint.

Galing umano sa bayan ng tinglayan ang grupo upang kumuha ng mga iligal na droga.

Gayunman, habang nasa checkpoint ang mga pulis sa national highway sa Barangay Bulo, Tabuk City ay may isang kotse na biglang humarurot at pinaputukan ang mga otoridad.

Sa halip anya na huminto para ma-inspeksyon ay tumakbo ang kotse ng mga suspek kaya’t hinabol ng mga pulis hanggang dumiretso sa kanal ang kanilang sasakyan sa Barangay Malalao.

Dito na na-corner ng mga otoridad ang mga suspek na nakipagbarilan sa mga pulis.

Narekober sa limang hinihinalang holdaper at carnaper ang apat na caliber 45 pistol, granada, 23 bricks ng marijuana na may kabuuang halaga na 2.7 million pesos.

Pawang mga miyembro ng notorious na grupo ng mga carnapper at holdaper ang mga napaslang na nag-ooperate sa Region 2, 3 at 4.

Hiniling na ng COMELEC kay Pangulong Rodrigo Duterte na ideklara bilang special non-working holiday ang May 9, 2022 elections.

Ito’y upang matiyak na makikibahagi ang lahat ng botante sa national at local elections ngayong taon.

Ayon kay COMELEC Chairman Saidamen Pangarungan, nilagdaan ng COMELEC En Banc ang Resolution 10784 na humihiling sa pangulo na ideklarang special non-working holiday sa buong bansa ang araw ng halalan.

Noong Miyerkules ay nagsimula ang Local Absentee Voting para sa mga naka-duty sa kanilang trabaho sa Mayo 9.

Kabuuang 84,357 na mga botante ang pinayagang makaboto nang mas maaga na tatagal hanggang ngayong araw.

Matatanggap na ng mga pilipinong mangingisda na kasama sa bangkang sinalpok ng isang chinese vessel sa West Philippine Sea noong 2019 ang matagal nang inaasam na kompensasyon.

Ayon kay Justice Secretary Menardo Guevarra, anim na milyong piso ang matatanggap ng may-ari ng Gem-Ver Fishing Vessel at mga mangingisda bilang danyos sa insidente.

Ito, anya, ang pinal na napagkasunduan bilang damage claims ng Gem-Ver laban sa may-ari ng chinese vessel.

Hunyo 2019 nang i-ulat ni Defense Secretary Delfin Lorenzana na lumubog ang F/B Gem-Ver matapos banggain ng barko ng China sa bahagi ng Recto Bank.

22 mangingisdang crew ng Gem-Ver mula San Jose, Occidental Mindoro ang naiwan na palutang-lutang nang ilang oras sa dagat hanggang mailigtas ng isang barko ng Vietnam.

Walong libong slots ng Transport Network Vehicle Service (TNVS) ang binuksan ng Land Transportation Franchising and Regulatory Board (LTFRB).

Ito’y upang mapataas ang bilang ng mga nag-ooperate na Grab cars sa buong bansa.

Binuksan ang mga bagong slot noong Abril 18 kung saan inaasahang mas maraming TNVS drivers ang sasali sa Grab matapos na makumpleto ang LTFRB-Mandated Onboarding Procedures.

Ayon sa Grab, inaasahan na nila ang karagdagang mga TNVS driver na bibiyahe sa loob ng dalawa hanggang tatlong buwan.

Idinagdag ng Grab na mahalaga ang bagong batch ng TNVS slots sa gitna ng nagpapatuloy na pandemya na nagresulta ng mahabang suspensyon ng ilang ride-hailing at iba pang public transport.