Drew Nacino

Muling nanawagan si Pangulong Rodrigo Duterte sa publiko na sumunod sa minimum public health standards, lalo sa araw ng halalan sa Mayo 9 upang maiwasan ang panibagong COVID-19 surge.

Ito ang apela ni Pangulong Duterte matapos ang banta ng OCTA Research Group na maaaring sumirit muli sa 5,000 hanggang 10,000 ang daily COVID-19 cases sa oras na pumasok ang mga Omicron sub-variant sa bansa.

Sa kanyang Talk to the People kahapon, binigyang-diin ng pangulo ang kahalagahan ng pagsusuot ng facemask, tamang paghuhugas ng kamay at pagpapanatili ng social distancing.

Mahalaga anyang para sa mga Filipino ang pagsunod sa mga protol at iwasan ang pagiging kampante lalo’t hindi pa tuluyang nawawala ang banta ng pandemya.

Ipinauubaya na ni Pangulong Rodrigo Duterte sa susunod na administrasyon ang anumang pasya hinggil sa Oil Exploration activities sa West Philippine Sea (WPS).

Ito ang inihayag ni Defense Secretary Delfin Lorenzana sa gitna ng territorial dispute sa pagitan ng Pilipinas, China, Vietnam, Malaysia, Taiwan at Brunei sa nasabing karagatan.

Kamakailan ay sinuspinde ng Department of Energy ang lahat ng Oil Exploration activities sa WPS hangga’t hindi naglalabas ng “clearance to proceed” ang Security, Justice, and Peace Coordinating Center (SJPCC) ng gabinete.

Nagtataka si Lorenzana, na chairman ng SJPCC, kung bakit ngayon lamang ipinagpatuloy ang Oil Explorations gayong noong 2020 pa inalis ang moratorium o tumagal pa ng mahigit isang taon.

Kailangan anya ang security clearance dahil tiyak na may mga haharaping problema ang sinumang magsasagawa ng exploration, partikular ang pagtutol ng China.

Nilinaw naman ng kalihim na sarili itong proyekto ng Pilipinas at hindi kasama ang China taliwas sa 2018 Agreement para sa Joint Exploration pero hindi na matitinag ang pasya ni Pangulong Duterte na ipatigil ang paghahanap ng langis.

Dumating na sa Pilipinas ang labi ni Philippine Ambassador to China Jose Santiago “Chito” Sta. Romana, kahapon.

Dakong 5:30 ng hapon nang lumapag ang Philippine Air Force C-295 aircraft dala ang labi ni Sta. Romana sa Villamor Airbase sa Pasay City.

Sinalubong ang yumaong embahador ng arrival honors na sinaksihan ng kanyang naulilang pamilya.

Pinangunahan naman ni Foreign Affairs Secretary Teodoro Locsin Junior ang pagbibigay-pugay kay Sta. Romana.

Iniabot naman ni Locsin ang watawat ng Pilipinas sa kapatid ng embahador na si Flor Marie Sta. Romana-Cruz.

Abril 19 nang sumakabilang-buhay si Sta. Romana, na isa ring beteranong mamamahayag, pero hindi na idinetalye ng Department of Foreign Affairs ang sanhi ng kanyang pagpanaw.

Hindi pa itinuturing na variant of interest o concern ng World Health Organization ang bagong Omicron sub-variant na BA.2.12 na na-detect sa Baguio City.

Sa preliminary data ng Department of Health (DOH), ang mutations ng bagong Omicron sublineages ay mas nakahahawa.

Gayunman, wala pang ebidensyang nagdudulot ng mas maraming sakit o mas malalang epekto ang mga sublineage ng Omicron.

Kahapon kinumpirma ng DOH  na isang 52 anyos na babaeng taga-Finland, ang unang kaso ng BA.2.12 sa bansa.

Dumating sa Pilipinas ang babae noong Abril 2  at hindi sumailalim sa isolation sa quarantine facility dahil asymptomatic at fully vaccinated.

Nagtungo ang naturang dayuhan sa isang unibersidad sa Quezon City at Baguio City upang magsagawa ng seminars at siyam na araw matapos dumating ng bansa ay nakaranas ng mild symptoms, tulad ng headache at sore throat.

Nagsagawa naman ng contact tracing matapos mag-positibo ang babae at siyam na asymptomatic close contacts ang natukoy, kabilang ang dalawa ang na-test pero negatibo sa COVID-19.

Abril 21 nang bumalik ng finland ang babae matapos ang pitong araw na isolation.

Pinangunahan ni Pangulong Rodrigo Duterte ang inagurasyon ng Cebu-Cordova Link Expressway (CCLEX).

Nagpaabot ng pagbati si Pangulong Duterte sa Metro Pacific Tollways Corporation, Cebu-Cordova Link Expressway Corporation at mga local government ng Cebu City at Cordova sa pagtatapos ng konstruksyon ng naturang proyekto.

Ang CCLEX ay 8.5-kilometer toll bridge na nagdurugtong sa Cebu City sa bayan ng Cordova sa Mactan Island at nagkakahalaga ng 30 billion pesos.

Ito na sa ngayon ang pinaka-mahabang tulay sa bansa na ipinatayo upang ma-solusyon ang masikip na daloy ng trapiko sa Metro Cebu.

Inamin ni Pangulong Rodrigo Duterte na nagkamali siya nang ipangakong tatapusin ang problema sa iligal na droga sa loob ng tatlo hanggang anim na buwan ng kanyang termino.

Sa inagurasyon ng Cebu-Cordova Link Expressway Project sa Cordova, Cebu, inihayag ni Pangulong Duterte na napagtanto niyang mahirap sugpuin ang droga simula nang mahalal na presidente noong 2016.

Gayunman, lalo anyang naging mahirap ang giyera kontra droga nang madiskubre niyang may mga matataas na opisyal ng Philippine National Police (PNP) na sangkot sa illegal drugs trade.