Posibleng pagbigyan ang hirit na dagdag-sahod ng mga manggagawa bago matapos ang termino ni Pangulong Rodrigo Duterte.
Ito ang ibinunyag ni Labor Secretary Silvestre Bello III matapos ang pagdiriwang ng Labor Day kahapon.
Ayon kay Bello, minamadali na ang pagre-review sa mga petisyong humihiling na itaas ang minimum wage ng sa ilang rehiyon, kabilang sa Metro Manila.
Patay ang isang babae matapos barilin ng kanyang pinsan sa bayan ng Banate, Iloilo.
Kinilala ang biktimang si Joyce Ferrer, 26 anyos habang tinutugis pa ang suspek na si Mel Ferrer, 42 anyos, kapwa residente ng Barangay Merced.
Ayon kay Master Sergeant Joelito Babayo III ng Banate Municipal Police, dakong alas otso ng umaga noong Sabado naganap ang krimen sa labas ng bahay ng biktima at suspek.
Batay sa imbestigasyon, gabi ng Biyernes nang magkaroon ng pagtatalo ang dalawa dahil umano sa tsismis sa kanilang lugar hanggang kinabukasan ay nagkasalubong ang mag-pinsan.
Muling sumiklab ang argumento sa pagitan ng dalawa hanggang sa bumunot na ng kalibre 45 si Mel at binaril ang pinsan nang malapitan sa dibdib.
Nagpapatuloy ang imbestigasyon ng pulisya sa naturang krimen.
Idineklara ng Malakanyang bilang regular holiday ang Mayo a – tres bilang pagdiriwang ng Eid‘l Fitr.
Inanunsyo ito ni Executive Secretary Salvador Medialdea bilang tugon sa hiling ng National Commission on Muslim Filipinos kay Pangulong Rodrigo Duterte na ideklarang holiday ang nasabing petsa.
Una nang inihayag ng Grand Mufti ng Bangsamoro Darul-Ifta na magsisimula ang pagdiriwang mamayang gabi o sa sandaling sumulpot ang crescent moon at magtatapos kinabukasan din ng gabi.
Ang Eid’l Fitr ay pagtatapos ng banal na pag-a-ayuno sa buwan ng Ramadan at pagsisimula naman ng Shawwal, ang ika-sampung buwan sa Islamic Lunar Calendar.
Umapela si Pangulong Rodrigo Duterte sa mga public transport group ng kaunti pang tiis sa gitna ng walang puknat na oil price hike na pinalala ng digmaan sa pagitan ng Russia at Ukraine.
Sa kanyang talumpati sa groundbreaking ceremony ng Pampanga Provincial Hospital sa Clark, Pampanga, inihayag ni Pangulong Duterte na dapat maunawaan ng mga public transport group ang kahalagahan ng langis.
Sa ayaw at gusto anya natin ay walang magagawa sa ngayon ang gobyerno sa patuloy na price increase.
Nagbabala naman ang punong ehekutibo na maaaring mas matinding problema sa supply at presyo ng langis ang kaharapin ng susunod na administrasyon.
Hindi na kailangang magdala ang mga botante ng mga vaccination card o swab test para makaboto sa May 9 elections.
Tugon ito ni COMELEC Commissioner George Garcia sa pangamba ng ilang netizen na maaaring itaboy ang mga botante kung hindi bitbit ang mga nasabing dokumento.
Ayon kay Garcia, walang katotohanan ang mga kumakalat na impormasyon lalo sa social media dahil maaari namang makaboto kahit walang dalang vaccination card at hindi nagpabakuna para sa COVID-19.
Hangga’t nasa voters list anya ang pangalan ng mga botante ay papayagan silang makapasok sa mga polling precinct.
Nilinaw din ni Garcia na hindi na kailangan ang negatibong COVID-19 tests pero ang mga COVID-19 positive o hinihinalang may sakit ay dapat i-quarantine.
Isinara sa mga motorista ang ilang bahagi ng Edsa Northbound sa Quezon City kasabay ng “Duterte Legacy Caravan” kaugnay ng pagdiriwang ng Labor Day, kahapon.
Inilunsad ang kick-off event ng Duterte Legacy Caravan sa Edsa People Power Monument.
Pansamantalang isinara ang Edsa Northbound mula Ortigas Avenue hanggang Boni Serrano, kabilang ang buong white plains mula Edsa hanggang sa kanto ng Katipunan Avenue at Temple Drive.
Layunin ng Duterte Legacy Caravan, na isang kolaborasyon ng mga ahensya ng gobyerno at mga volunteer mula sa multi-sectoral groups, na iparating sa publiko ang mga nagawang proyekto ng administrasyon.
Nagsimula ang caravan ala-5 ng umaga sa pamamagitan ng “walk-run-bike” event kaakibat ang panawagan para sa mapayapang eleksyon sa Mayo 9.
Wala pang indikasyon na magkakaroon ng lockdown pagkatapos ng May 9 elections dahil sa posibleng pagtaas ng mga kaso ng COVID-19.
Ito ang nilinaw ni Health Secretary Francisco Duque, III sa gitna ng pinangangambahang pagsirit muli ng COVID-19 cases.
Ayon kay Duque, kung kinakailangan ay magkakaroon lamang ng granular lockdowns at hindi malawakang lockdown.
Kinatigan naman ito ni National Vaccination Operations Center Chairperson, Health Undersecretary Myrna Cabotaje sa pagsasabing hindi pa “significant” ang pagtaas ng kaso.
Gayunman, dapat anyang ipagpatuloy ang pag-iingat laban sa COVID-19, kabilang ang pagsunod sa minimum public health protocols.
Una nang ibinabala ng DOH na posibleng sumipa muli ang COVID-19 cases sa kalagitnaan ng mayo o pagtapos ng halalan kung susuway ang publiko sa minimum health protocols.
Umabot na sa 7% ang naitalang pagtaas ng bagong kaso ng COVID-19 sa National Capital Region (NCR) sa nakalipas na linggo.
Ayon kay OCTA Research Group Fellow, Dr. Guido David, umakyat sa 85 ang naitalang bagong kaso sa NCR mula April 24 hanggang 30 kumpara sa 79 noong nakalipas pang linggo.
Sumampa rin sa point 79 mula sa dating point 66 ang reproduction number o ang bilang ng mga taong nahahawaan ng virus ng isang COVID-19 positive person.
Sa kabila nito ay inihayag ni David na nananatiling “low risk” sa COVID-19 ang Metro Manila hanggang nitong April 30 kaya’t wala pang dapat ikabahala ang publiko.
“Very low” risk din ang healthcare utilization rate na nasa 21% at ICU utilization rate na 19% habang nasa 1.4% ang positivity rate sa rehiyon.
Magbabanggan na ang defending NBA Champion Milwaukee Bucks at Boston Celtics sa semi-finals ng Eastern Conference Division.
Ito’y makaraang maungusan na ng Bucks sa kartadang 4-1 sa 1st round ng playoffs ang Chicago Bulls.
Tinalo ng Milwaukee ang Bulls sa score na 116-110 sa kanilang paghaharap sa Game 5, kahapon.
Sasagupain ng defending champions ang Celtics sa game 1 sa homecourt nito sa Boston TD Garden Arena, sa Lunes.
Binatikos ng European Union (EU) ang limang taong pagkakakulong na hatol ng Junta Court ng Myanmar sa pinatalsik na Civilian Leader Aung San Suu Kyi sa isang “politically motivated” trial.
Ayon sa EU, ang nasabing sentensya ay hakbang upang pabagsakin ang Rule of Law sa Myanmar at paglabag sa karapatang-pantao ng mga mamamayan at hadlang sa demokrasya ng nasabing bansa.
Isa rin itong pagtatangka na nais palayasin ng Military Junta ang mga democratically elected leaders ng Myanmar, kabilang si Suu Kyi, mula sa isang proseso ng dayalogo na inihihirit ng Asean.
Kasalukuyang nasa kustodiay ng militar si Suu Kyi nang magsimula ang kudeta noong nakaraang taon na nagpatalsik sa kanyang pamahalaan.