Drew Nacino

Nilinaw ng Department of Labor and Employment na sa Hunyo pa magiging fully operational ang bago at kauna-unahang Overseas Filipino Workers Hospital sa San Fernando City, Pampanga.

Ayon kay Labor Secretary Silvestre Bello III, tanging mga ordinaryong gamutan at outpatient services muna ang maibibigay ng ospital habang hindi pa naililipat dito ang ibang medical equipment.

Kabilang anya sa mga ilalagay ang nasa P200-M na halaga ng aparato para sa dialysis, MRI, CT scan at iba pang state of the art medical equipment.

Ang 1.5 hectares na lupain na pinagtayuan ng pagamutan na nagkakahalaga ng P400-M ay donasyon ng provincial government ng Pampanga.

Aabot naman sa P600-M ang gastos sa konstruksyon na donasyon ng Bloomberry Cultural Foundation para sa pagsasakatuparan ng ospital habang ang mga medical equipment ay pinondohan ng Philippine Amusement and Gaming Corporation.

Idinagdag pa ni Bello na pangangasiwaan ng UP-Philippine General Hospital ang operasyon ng OFW Hospital at naglaan din ng P250-M budget para sa operasyon nito mula sa General Appropriations Act 2022.

Umabot sa 1,399 na bagong kaso ng COVID-19 ang naitala sa bansa mula Abril a – 25 hanggang noong linggo, Mayo a – 1.

Gayunman, nilinaw ng Department of Health na ang nasabing bilang ay 5% na mababa kumpara sa kasong naitala noong mga nakalipas na linggo.

Batay sa weekly case bulletin ng DOH, nasa 200 ang daily case average sa bansa noong nakaraang linggo.

Kumpara ito sa 209 na average na naitala mula April – 18 hanggang 24 na mayroong 1,465 new COVID-19 infections.

Nasa 723 severe at critical covid-19 cases naman ang kasalukuyang nagpapagaling sa mga ospital.

Samantala, mayroong naitalang additional 40 deaths noong Abril 18 hanggang May 1.

Nanganganib masipa sa mayoralty race sa Malabon City si dating Vice Mayor Jeannie Sandoval makaraang sampahan ng isang malakas ng kaso ng disqualification sa Commission on Elections.

Ito’y matapos makunan ng larawan si Sandoval kasama ang asawang si congressional candidate Ricky Sandoval, na gumamit ng isang DOH mini-bus sa kanilang pangangampanya na malinaw na paglabag sa Omnibus Election Code, partikular sa Article 22 section 261.

Ginamit ang DOH bus para sa isang campaign activity sa barangay Catmon noong April 20, 2022 at batay sa witness na si Dianne Bautista, residente ng lungsod, ay namigay ang kandidato ng P1-K sa mga botante kapalit ng pagboto sa kanya.

Ginawa rin umano ni Sandoval ang naturang aktibidad sa Navotas City kung saan natalo ang asawa nito bilang mayoralty bet noong 2007 elections.

Alinsunod sa Article 22, Section 261 ng Omnibus Election Code, bawal gamitin ang anumang sasakyan ng gobyerno para sa pangangampanya ng isang kandidato at pamimili ng boto na maaaring magresulta sa disqualifcation.

Magugunitang inilampaso ng kasalukuyang alkalde ng lungsod na si Lenlen Oreta sa 2019 elections ang dating bise alkalde.

Makakalaban ni Sandoval sa May 9 elections si Enzo Oreta, na nakababatang kapatid ng incumbent mayor.

Kasabay ng pagtatapos ng buwan ng Ramadan o Eid’l Fitr, nagtipon-tipon ang mga muslim leaders at community members sa Blue Masjid, Islamic and Cultural Center o Blue Mosque sa Taguig City, kagabi.

Ayon kay Blue Mosque Adminsitrator, Hadji Amer Bacarat, kabilang sa kanilang panalangin ang mapayapang eleksyon sa Mayo a – nwebe.

Kumpiyansa anya sila na magiging mapayapa at walang dayaan ang halalan lalo’t Muslim ang kasalukuyang Chairman ng Commission on Elections (COMELEC) na si Saidamen Pangarungan.

Ganito rin ang naging pagsalubong sa Eid’l Fitr ng Muslim community sa Golden Mosque sa Quiapo, Maynila.

Samantala, nagdiriwang din ang mga residente ng Marawi City, Lanao Del Sur sa kabila ng epekto ng digmaan sa kanilang buhay, halos limang taon na ang nakalilipas.

Inihayag ni Bangsamoro Transition Authority Parliament Member Zia Alonto-Adiong na ang pagdiriwang ng Eid’l Fitr ay hudyat ng panibagong pag-asa para sa mga taga-Marawi, lalo’t nilagdaan na ni Pangulong Rodrigo Duterte ang Marawi Compensation Law.