Drew Nacino

Isinasapinal na ng gobyerno ang covid-19 vaccine donation ng Pilipinas sa Myanmar.

Ito’y makaraan ang pulong ng Department of Health sa Myanmar National Red Cross at concerned government agencies noong Martes.

Kinumpirma ng DOH Na pawang Russian-made na Sputnik V covid vaccines ang i-do-donate ng gobyerno.

Bago ipagkaloob ang mga bakuna, kailangan muna ng basbas mula sa Commission on Audit at Department of Budget and Management.

Gayunman, hindi idinetalye ng kagawaran kung gaano karaming bakuna ang ibibigay ng Pilipinas sa Myanmar.

Sumadsad na sa 4,692 ang aktibong kaso ng covid-19 sa bansa, hanggang kahapon mula sa 5,145 noong Martes.

Sa datos noong May 4, nakapagtala ang Department of Health ng karagdagang 159 Covid-19 cases kumpara sa 134 new cases noong May 3.

Nasa 16,889 individuals naman ang sumailalim sa test noong Martes.

Sa ngayon aabot na sa 3,686,375 na ang Covid-19 cases sa bansa, kabilang ang 3,621,244 recoveries at 60,439 deaths.

Bumaba sa 3.71 million Filipino ang unemployed noong 2021, na nagresulta sa unemployment rate na 7.8%.

Kumpara ito sa 4.5 million unemployed noong isang taon na pinaka-mataas naman sa nakalipas na 15 taon dahil sa napakahabang Covid-19 lockdowns.

Gayunman, nananatiling mataas ang unemployment kaysa sa 2.3 million noong 2019 o pre-pandemic level, batay sa preliminary 2021 annual labor market statistics ng Philippine Statistics Authority.

Ayon sa PSA aabot sa 47.7 million o 63.3% ng mga pinoy sa labor force population ang nakibahagi sa jobs market o nagtrabaho.

Bumaba naman ito sa 61.3% noong isang taon bunsod ng kaliwa’t kanang Covid-19 lockdown at pagsasara ng maraming negosyo.

Pawang taga-Northern Mindanao, lalo sa Bukidnon ang pinaka-aktibo sa job market habang ang Central Luzon ang may pinaka-mababang labor force participation noong 2021.

Noon namang 2020, tanging 43.9 million o 59.5% ng 73.7 million Filipino sa labor force population ang nagtatrabaho o aktibong naghanap ng trabaho sa gitna ng Covid-19 restrictions.

Nanawagan si Pangulong Rodrigo Duterte sa mga Filipino na ipagdasal na huwag mauwi sa nuclear war ang digmaan sa pagitan ng Russia at Ukraine.

Sa kanyang talumpati sa inagurasyon ng bagong Dr. Jose Fabella Memorial Hospital sa Sta. Cruz, Maynila, nagbanta si Pangulong Duterte na tiyak na mauubos ang lahat sakaling sumiklab ang nuclear war.

Hangga’t nasa Pilipinas anya ang mga sundalong Amerikano ay maaaring maipit ang bansa sa digmaan, lalo’t kaalyado ng Russia ang China.

Isa umanong recruiter ng teroristang grupong Islamic State ang inaresto sa bayan ng Tungawan, Zamboanga Sibugay.

Kinilala ang suspek na si Abdul Salikala, trenta’y dos anyos, na nasakote ng pinagsanib na pwersa ng pulisya at militar sa barangay Libertad, dakong alas kwatro y medya ng hapon noong Martes.

Ayon kay Police Regional Office 9 Director, Brig. Gen. Franco Simborio, member din si Salikala ng hassan criminal gang at may standing warrant of arrest sa kasong murder na inisyu noong 2011.

Na-monitor anya nila ang suspek na nag-re-recruit ng mga miyembro ng local-ISIS sa bayan ng Siocon, Zamboanga del Norte.

Natiktikan din si Salikala na nagpupuslit ng mga mataas na kalibre ng baril sa Alicia, Zamboanga Sibugay patungo sa mga barangay Latabon at Malambuhangin sa Siocon, Zamboanga del Norte.

Tuloy pa rin umano ang operasyon ng sabong express ng gambling tycoon na si Rodolfo “Bong” Pineda sa kabila ng utos ni Pangulong Rodrigo Duterte na itigil na ang e-sabong sa bansa.

Ayon sa isang source, hanggang sa social media nitong Miyerkoles ay may ads pa kaugnay sa schedule ng sabong express na nag-uumpisa alas otso y medya ng umaga.

Ang sabong e-express ni Pineda ay nag-o-operate umano sa buong Central Luzon.

Una nang inatasan ng Pangulo si DILG Secretary Eduardo Año na magsagawa muna ng survey kaugnay sa social impact ng online sabong.

Matapos nito ay inirekomenda ni Año sa punong ehekutibo ang pagpapahinto sa operasyon ng online talpakan sa bansa.

Nagsagawa naman ng “switch a candle” prayer rally ang mga taga-suporta ni Mayor Francisco “Isko Moreno” Domagoso sa liwasang Bonifacio sa Maynila at Danao City, Cebu.

Ito’y bilang pagpapakita ng kanilang hindi matibag na  suporta para sa Aksyon Demokratiko presidential candidate kasabay ng panalangin para sa matagumpay, malinis, tapat at mapayapang halalan.

Umabot sa 20,000 katao ang lumahok sa naturang aktibidad sa tapat ng central post office sa Maynila.

Sa Danao City, nasa 80,000 naman ang dumalo  sa aktibidad sa pangunguna ng asawa ni Yorme na si Dynee Domagoso, mga anak na sina Patrick, Joaquin at Frances.

Samantala, nagpasalamat ang alkalde sa lahat ng volunteer groups, organizations at lahat ng kanyang supporter sa kanilang solidong suporta sa gitna ng kaliwa’t kanang disinformation campaigns laban sa kanya.

Opisyal na ring inendorso ng United Church of Christ of the Philippines o U.C.C.P., na pinaka-malaking protestant denomination sa bansa, ang kandidatura nina Vice President Leni Robredo at Senador Kiko Pangilinan sa May 9 elections.

Ayon sa Council of Bishops ng U.C.C.P., ang pag-endorso nila sa tambalan nina Robredo at Pangilinan ay resulta ng “collective discernment” matapos ang masusi at taimtim nilang pag-aaral sa lahat ng kasalukuyang opsyon.

Ang endorsement ay nilagdaan ni U.C.C.P. General Secretary Melzar Labuntog, 6 na iba pang obispo at 14 na dating obispo mula sa iba’t-ibang panig ng bansa.

Binigyang-diin ng U.C.C.P. na pinili nila sina Robredo at Pangilinan dahil sila ang pinaka-malapit na sumasalamin sa kahulugan ng salita ng Diyos at bilang manipestasyon ng paghahari ng Panginoon.

Inendorso rin ng nabanggit na simbahan ang senatorial candidacy nina Senators Leila De Lima, Risa Hontiveros, dating vice president Jejomar Binay, dating Ifugao Rep. Teddy Baguilat, dating Bayan Muna Rep. Neri Colmenares;

Human rights lawyer Chel Diokno, Atty. Alex Lacson, labor leaders Luke Espiritu, Sonny Matula at Elmer Labog.

5 araw bago ang halalan, inendorso na ng mahigit 1,200 pari, obispo at mga Diyakono ang kandidatura sa pagka-pangulo ni Vice President Leni Robredo at kanyang running mate na si Senator Francis “Kiko” Pangilinan.

Pina-aalalahan ng Clergy for the Moral Choice (CMC) ang mga Filipino sa kanilang sagradong tungkulin na bumoto at iboto lamang ang karapat-dapat na mga pinuno ng bansa at piliin ang tunay na servant-leaders na may puso katulad ng isang mabuting pastol.

Ayon kay Bishop Tony Tobias, kung gusto nating umangat ang bansa ay pumili ng maayos na leader, sa halip na mga “lesser evil”.

Inilabas ng mga paring katoliko ang kanilang endorsement, isang araw matapos ang pag-endorso ng religious group na Iglesia ni Cristo sa tandem naman nina Ferdinand “Bongbong” Marcos Jr. at Davao City Mayor Sara Duterte – Carpio.