Drew Nacino

Hindi pa rin nabuwag si presidential candidate ferdinand “Bongbong” Marcos Jr. bilang numero uno sa presidential race batay sa survey ng independent monitoring group na OCTA Research.

 Sa resulta ng “Tugon ng Masa Survey” noong April 22 hanggang 25, nakapagtala si Marcos ng 58% preference votes mula 2,400 respondents.

 Kumpara ito sa 57% preference votes na nakuha ni BBM Sa survey ng OCTA noong April 2 hanggang 6.

 Pinakamataas na preference votes ay nakuha ng dating senador sa Visayas regions na may 62%; Balanced Luzon, 59 percent; Mindanao, 56% at National Capital Region (NCR), 46%.

 Pumapangalawa pa rin si Vice President Leni Robredo na mayroong 25% preference votes kumpara sa 22% na naitala sa nakaraang survey.

 Bagaman bumaba ng isang porsyento ang rating, pangatlo pa rin si Manila City Mayor Francisco “Isko Moreno” Domagoso, 8%; Senator Manny Pacquiao, 5 percent at Senator Panfilo Lacson, 2%.

 Nakakuha naman ng 1% si Faisal Mangondato habang kapwa zero point 2% kina dating Defense Secretary Norberto Gonzales at Labor Leader Leody De Guzman.

Tiniyak ng Malakanyang na gagamitin ng gobyerno nang tama, epektibo at episyente ang mga inutang ng Pilipinas mula sa loob at labas ng bansa.

 Ito’y matapos ang ulat ng Bureau of Treasury na lumobo na sa record-high 12.68 trillion pesos ang utang ng bansa sa pagtatapos ng Marso 2022.

 Ayon kay acting presidential spokesman at PCOO Sec. Martin Andanar, nakalaan ang perang inutang sa nagpapatuloy na COVID-19 response.

 Gagamitin din anya ito upang makarekober at mapasigla muli ang ekonomiya ng bansa.

Pinakakasuhan na ng Makati City Prosecutor’s Office sa korte ang tinaguriang Poblacion Girl na si Gwyneth Anne Chua matapos ang paglabag nito sa COVID-19 quarantine protocols noong Disyembre.

 Nakitaan ng prosekusyon ng probable cause para kasuhan si Chua ng paglabag sa Republic Act 11332 o ang “Mandatory Reporting of Notifiable Diseases and Health Events of Public Health Concern Act”.

 Bukod kay Poblacion Girl, kinasuhan din ang guwardya ng Berjaya Hotel sa makati matapos tulungang makatakas sa quarantine facility ang Pinay balikbayan.

 Bagaman kinasuhan ang iba pang empleyado ng hotel maging ang mga magulang at boyfriend ni Chua, binasura ito dahil sa kawalan ng sapat na dahilan at ebidensya.

 Disyembre a–23 noong isang taon, nakitang naki-party si Chua sa Poblacion, makati na dalawang araw pa lamang sa kanyang mandatory quarantine sa hotel matapos na dumating mula sa US.

 Matapos nito ay nag-positibo si Poblacion Girl sa COVID-19 at nakapanghawa ng 15 nakasama sa party sa kasagsagan ng pagkalat noon ng Omicron variant. - sa ulat ni Bert Mozo (Patrol 3)

Isasagawa na ngayong araw ang retirement honors ni Philippine National Police Chief, Gen. Dionardo Carlos.

Ito, ayon sa PNP-Public Information Office, ay upang magbigay-daan sa preparasyon para sa eleksyon sa Lunes, Mayo a–nwebe.

Ang naturang seremonya ay maaga ng dalawang araw bago ang ika-56 na kaarawan ni Carlos sa Mayo a-otso.

Gagawin ang aktibidad sa Multi-Purpose Center sa Camp Crame na dadaluhan ng matataas na opisyal.

Itinalaga na bilang Officer-In-Charge ng Philippine National Police si Lt. Gen. Vicente Danao Jr., kapalit ni Gen. Dionardo Carlos.

 Mag-reretiro sa Mayo a – otso si Carlos kasabay ng kanyang ika-56 na kaarawan o mandatory retirement age.

 Kinumpirma ni acting Presidential Spokesman at Presidential Communications Secretary Martin Andanar na epektibo ang appointment kay Danao, simula Mayo a – otso o bisperas ng halalan.

 Si Danao, na number 4 man sa PNP bilang hepe ng PNP Directorial staff at nag-take over bilang Deputy Chief of Operations, ang Commander ng PNP Security Task Force for National and Local Elections 2022.

 Kumpiyansa anya ang palasyo na ipagpapatuloy ni Danao ang mga hakbang sa pagbabagong-anyo ng PNP upang maging mas epektibo at propesyunal na organisasyon na may mandatong paglingkuran at protektahan ang mga mamamayan.

 Si Danao ang magiging ika-27 pinuno ng pambansang pulisya at ika-walong PNP Chief na itinalaga ng kanyang kapwa Davaoeño na si Pangulong Rodrigo Duterte.

 Apat na miyembro ng pamilya ang patay habang isa ang sugatan sa sunog sa Maypajo, Caloocan City, kahapon.

 Kinilala ang mga nasawi na sina Teresita Arevalo, senior citizen, anak na si Ricardo, Cecilia at Margaret Flores, pawang residente ng Kalabawan Compound, Namie Street, Barangay 37 habang naisugod sa ospital si Danny Tambungi.

 Ayon kay Caloocan City Fire Director, Supt. Roberto Samillano Jr., tinangka umanong iligtas ni Ricardo ang kanyang ina sa nasusunog nilang bahay pero kapwa umano sila nakuryente at na-trap sa loob.

 Mag-a-ala-una ng hapon nang sumiklab ang apoy sa bahay ng mga biktima na gawa sa light materials pero agad napigilan makaraang maagapan ng mga bumbero at idineklarang fire out, ala una kwarenta ng hapon.

 Apat na bahay naman ang nadamay at 15 pamilya ang naapektuhan habang inaalam pa ang halaga ng pinsala o naabong mga ari-arian at sanhi ng sunog.

32 hinihinalang miyembro ng mga private armed group sa Laguna ang arestado ilang araw bago ang halalan sa Lunes.

Ayon kay COMELEC Commissioner George Garcia, i-aanunsyo nila sa mga darating na araw kung may kinalaman sa eleksyon ang mga aktibidad ng mga nasakote o kung may kaugnayan sa sinumang lokal na kandidato sa lalawigan.

Pinuri naman ni Garcia ang mga otoridad na naka-aresto sa mga hinihinalang private armed group member.

Sa ngayon, umabot na sa isandaan at limang bayan at 15 lungsod ang isinailalim sa red category.

Naka-full alert na ang Philippine National Police bilang bahagi ng security preparations para sa May 9 elections.

Ayon kay PNP Spokesperson, Col. Jean Fajardo, idineklara ang full alert status simula ala sais kahapon ng umaga.

Nangangahulugan ito na dapat mag-duty ang lahat ng pulis kaugnay sa paghahanda sa halalan.

Inihayag naman ni AFP Chief of Staff, Gen. Andres Centino na idedeklara ng militar ang red alert status simula bukas.

Ito’y upang matiyak na handa ang lahat ng sundalo  para sa eleksyon sa lunes.

Kasado na rin anya ang lahat ng preparasyon at plano ng militar at nakapaglagay na rin sila ng monitoring command centers.