Drew Nacino

Wala pang tinatalakay sa Department of Education (DepEd) hinggil sa planong gawing mandatory ang Reserve Officers Training Corps (ROTC) Mandatory.

Tugon ito ng kampo ni presumptive vice president Inday Sara Duterte-Carpio sa pahayag ni Atty. Bruce Rivera na talagang prayoridad ng alkalde ng Davao City na ibalik ang Mandatory ROTC.

Matapos italaga ni presumptive president Ferdinand “Bongbong” Marcos Junior na susunod na DepEd secretary.

Ayon kay Liloan, Cebu Mayor Christina Frasco, tagapagsalita ni Duterte-Carpio, bagaman umaasa si Mayor Inday na magampanan ang tungkulin bilang susunod na DepEd secretary, nirerespeto naman nito ang transition process.

Dapat anyang hintayin na lamang muna ang opisyal na proklamasyon bago talakayin ang naturang issue.

Magugunitang itinalaga ni presumptive president Ferdinand “Bongbong” Marcos Junior si Duterte-Carpio bilang susunod na kalihim ng DepEd sa sandaling opisyal nang umupo ang bagong administrasyon.

Isandaang porsyento nang nag-match ang mga manual-audited copies ng election returns at electronically-transmitted results mula sa COMELEC transparency server.

Ito ang kinumpirma ng poll watchdog Parish Pastoral Council For Responsible Voting (PPCRV).

Ayon kay PPCRV Spokesperson, Atty. Vann Dela Cruz, ang 100% match ay katumbas ng manually-encoded 16,820 o 15% ng kabuuang total election returns (ERs).

Karamahan sa ERs ay mula sa Metro Manila at ilang bahagi ng Luzon, gaya ng pangasinan, Laguna, Bulacan, Cavite, Ilocos Norte, Sorsogon at Rizal; ilan mula Misamis Oriental at wala pa ang mula sa Visayas.

Inaasahang madaragdagan ang ERs na mano-manong i-o-audit ng PPCRV sa gitna ng patuloy na pagdating ng mga ito.

Hanggang kahapon, aabot na sa 24,640 copies ng election returns o 22.86% ng total na ang natanggap ng poll watchdog.

Kahit tapos na ang halalan, mananatili ang mga tauhan ng Philippine National Police at Armed Forces of the Philippines sa kani-kanilang deployment sa 14 na Barangay Sa Lanao Del Sur.

Ito’y ang mga lugar kung saan nagdeklara ang COMELEC ng ‘failure of election’ dahil sa mga naitalang karahasan, pagbabanta at pananakot noong May 9 elections.

Ayon kay PNP Spokesperson, Col. Jean Fajardo, hindi muna nila ipinu-pull-out ang mga pulis na itinalaga bilang mga Special Board of Election Inspectors upang matiyak na mapapanatiling mapayapa ang eleksyon.

Sa Mayo 15, inaasahang magsasagawa ng special elections ang COMELEC sa 14 na barangay sa mga bayan ng Tubaran, Binidayan at Butig.

Posibleng maibaba sa 20 hanggang 30 pesos ang retail price ng bigas na kabilang sa mga ipinangako ni presumptive president Ferdinand “Bongbong” Marcos Junior noong kampanya.

Ayon kay Socio-Economic Planning Secretary Karl Kendrick Chua, Director-General ng National Economic and Development Authority (NEDA), kung “targeted and efficient” ang suporta ng gobyerno sa mga magsasaka ay posible ang nais na mangyari ni Marcos.

Ang pagpapababa anya ng retail price ng bigas sa antas na ipinangako ni BBM ay maaaring matupad sa ilalim ng Liberalized Trade Regime, sa ilalim ng Rice Tariffication Law.

Gayunman, aminado si Chua na posibleng magkaroon naman ng problema kung ang suporta para sa mga lokal na magsasaka ay magmumula sa anyo ng subsidiya na hindi nakatali sa output.

Umaasa naman ang NEDA Chief na hindi babaguhin ng susunod na administrasyon ang Rice Tariffication Law na aniya’y “best model” na mayroon ang bansa upang matulungan ang mga magsasaka at mga consumer.

Pinigil muna ng COMELEC ang pagbabayad sa Smartmatic dahil sa daming aberya sa mga vote counting machines sa katatapos lamang na May 9 National at Local Elections.

Sa press conference sa Philippine International Convention Center, inihayag ni COMELEC Acting Spokesman, Atty. John Rex Laudiangco na iniimbestigahan na ang mga alegasyon at nanawagan na hayaan muna ng publiko na matapos ang proseso.

Ayon kay Laudiangco, kailangang hintayin muna ang resulta ng imbestigasyon at ipag-utos ng En Banc kung maba-blacklist ng poll body ang Smartmatic.

Mayroon anyang panuntunan kung paano madidiskuwalipika ang isang contractor sa ilalim ng  Government Procurement Act na dapat sundin.

Unanang sinabi ni COMELEC Commissioner George Garcia na hindi na nila gagamitin ang mga VCM ng Smartmatic sa 2025 Midterm Elections dahil sa pagiging luma na nito at samu’t saring aberyang inabot noong Lunes.

Siyam na party-list groups ang nakakuha ng pwesto sa Kamara batay sa partial at official tally ng Commission on Elections (COMELEC) na nagsisilbing National Board of Canvassers (NBOC).

Kabilang sa mga party-list group na pumasok sa mababang kapulungan ng kongreso ang mga nakakuha ng hindi bababa sa 2% ng mga botong kailangan para sa proklamasyon ay ang ACT-CIS, Ako Bicol;

1-Rider Party-List,4Ps, Ang Probinsyano, Sagip, Cibac, Ako Bisaya at Probinsyano Ako.

Alinsunod sa batas, dapat makakuha ng hindi bababa sa 2% ng kabuuang mga boto ang isang party-list group para magkaroon ng kahit isang pwesto sa Kamara.

Ang mga lalampas naman ng 2% threshold ay mabibigyan ng karagdagang puwesto na katumbas ng kabuuang boto subalit hindi maaaring lumampas sa tatlo kada mananalong party-list group.