Drew Nacino

Isang Certificate of Canvass na lamang ang hindi pa naisasama sa kabuuang bilang ng National Board of Canvassers ng Comelec para sa resulta ng eleksyon sa pagka-senador at party-list, kahapon.

Pasado ala-5 ng hapon nang matapos ang pagbibilang sa 172 mula sa kabuuang 173 COCs.

Huling itinala ng poll body sa canvassing ang 14 na COC mula sa Overseas voters, partikular ang huling ballot box mula sa embahada ng Pilipinas sa Oslo, Norway.

Tanging ang mga boto mula sa Lanao del Sur ang kukumpleto sa canvassing.

Magugunitang nakaranas ng karahasan at gulo sa ilang lugar noong May 9, tulad sa mga Bayan ng Butig, Binidayan at Tubaran, Lanao del Sur.

Nakatakda naman sa Mayo a – 24 ang special elections sa 14 na barangay sa mga nasabing lugar.

Isinumite na ng Alliance of Concerned Teachers (ACT) ang inisyal na listahan ng 1, 036 na electoral board members na nagsilbi ng 24- oras noong May 9 elections. 

Ito’y bilang bahagi ng panawagang bigyan ng Overtime pay ang mga poll worker, na karamiha’y guro, na nagsilbi sa nasabing halalan maging noong May 2019 midterm polls.

Ayon kay ACT Secretary General Raymond Basilio, ang nasabing hakbang ay tagumpay ng mga Teacher-Poll workers para sa kanilang laban upang magkaroon ng patas na sahod.

Una nang inihayag ni Comelec commissioner George Garcia na “Aproved in principle” na ang proposal na bigyan ng additional honoraria ang mga poll worker na nag-Overtime noong May 9 elections.

Nito lamang linggo anya ay nasa P20-M budget ang inilaan para sa additional honoraria, base sa accounting at auditing rules.

Nakukulangan ang ilang grupo sa inaprubahang P33 daily minimum wage increase sa Metro Manila sa gitna ng naka-umang na dagdag-presyo sa mga basic commodities.

Ayon kay Associated Labor Union-Trade Union Congress of the Philippines spokesman Alan Tanjusay, kapiranggot lamang ang nasabing dagdag-sahod.

Hindi anya ito mararamdaman at mawawalang-saysay dahil maaaring bukas o sa mga susunod anyang araw ay magpatupad ng malawakang pagtaas ng presyo ng mga basic commodities at services.

Mula sa kasalukuyang P537 per day, itataas sa P570 ang arawang sahod sa Metro Manila matapos aprubahan ng National Wages Productivity Commission ang wage hike.

Tinulungan na ng National Citizens’ Movement for Free Elections (NAMFREL) ang Parish Pastoral Council for Resposible Voting (PPCRV) sa pagre-validate ng mga Election Returns  (ERs).

Inihayag ni Dr. William Yu, Board of Trustee ng PPCRV, na nag-volunteer na ang NAMFREL nang mabatid na mahigit 300 na ang mga ERs na dapat i-revalidate.

Maaga anyang gagawin ng PPCRV ang revalidation hindi kagaya dati na ginagawa ito matapos ang kanilang pagbibilang.

Umaasa naman ang PPCRV na madaragdagan ang mga kailangang i-revalidate habang patuloy ang encoding lalo kung maraming clerical error.

Magpapatuloy ang encoding ng nasabing poll watchdog hangga’t may dumarating pang mga ER at may mga volunteer pang nais mag-encode.

Idineploy na ng Philippine Coast Guard ang BRP Teresa Magbanua para sa unang misyon nito sa Makassar, Indonesia.

Ang nasabing multi-role response vessel ay lalahok sa Regional Marine Pollution Exercise 2022 simula Mayo a – 22 hanggang a – 29.

Bukod sa PCG, kalahok din sa nabanggit na aktibidad ang kanilang counterpart mula Indonesia at Japan.

Ayon kay PCG Commandant, Admiral Artemio Abu, ide-deploy din ng PCG ang BRP Gabriela Silang, BRP Malapascua at BRP Cape Engaño.

Layunin ng naturang aktibidad na paigtingin ang kakayahan ng Pilipinas, Indonesia at Japan sa pag-responde tuwing may insidente sa karagatan tulad ng oil spill, sunog at iba pa.

Ang BRP Teresa Magbanua ang pinaka-moderno at bagong barko ng Philippine Coast Guard na binili sa Japan sa halagang P7.2-B.