Handa na ang House Prosecution Panel sa Day 5 ng ikalawang linggo ng impeachment trial ni Vice President Sara Duterte, kung saan magiging sentro pa rin sa paglilitis ang Article IV ng Articles of Impeachment na tumatalakay sa umano’y grave threats o pagbabanta sa buhay nina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Nakatakdang humarap sa impeachment trial ngayong araw ang Office of the Vice President o OVP Chief of Staff na si Atty. Zuleika Lopez, na ipinatawag makaraang ipa-subpoena ng House Prosecution.
Binigyang-diin ng prosecutors ang kahalagahan ng mga testimonya ni Lopez sa paglilinaw ng mga “video threat” ni VP Sara, kung saan naging kontrobersyal ang kaniyang pahayag noong November 2024.
Bukod pa rito, magpapatuloy rin ang cross-examination ng defense team kay National Bureau of Investigation o NBI Regional Director Atty. Jeremy Lotoc matapos pansamantalang ipatigil dahil sa haba ng pagtatanong at kakulangan ng oras.
Inaasahang mas titindi pa ang pagtatalo ng magkabilang panig habang inilalatag ang mga ebidensiya at testimonya.
Patuloy namang inaabangan ang posibleng personal na pagdalo ng Bise Presidente ngayong araw o sa mga susunod na araw ng paglilitis, habang nagpapatuloy ang isa sa pinakamahahalagang legal at pampulitikang proseso sa bansa. | via Geli Mendez/DWIZ Patrol
