Drew Nacino

Itatalaga ni Presumptive President Ferdinand “Bongbong” Marcos bilang kalihim ng Department of Education si Presumptive Vice President Sara Duterte-Carpio.

Ito ang ibinunyag ni Marcos matapos ilatag ang ilan sa mga plano nito sa sandaling opisyal nang maupo bilang pangulo ng bansa.

Sa kanyang talumpati kagabi, inihayag ni BBM Na inuuna nilang pag-usapan ang ilan sa mga critical areas sa susunod na taon kabilang ang ekonomiya, edukasyon at imprastraktura.

Kapag nagkataon si Davao City Mayor Inday Sara ang magiging kauna-unahang appointee sa ilalim ng Marcos administration.

Maka-ilang beses inihayag ng alkalde na sa oras na manalong bise presidente ay makikipag-usap siya sa Kongreso upang isulong ang mandatory military service sa lahat ng tutungtong ng edad na disi otso.

Nagpaabot na ng pagbati si U.S. Secretary of State Antony Blinken kay president-elect Ferdinand “Bongbong” Marcos, Jr.

Tiniyak ni Blinken ang mas matatag na ugnayan ng Amerika at Pilipinas sa ilalim ng pamumuno ng bagong administrasyon ni Marcos.

Ayon sa kalihim, mahalaga ang papel ng Pilipinas sa pagtataguyod ng matatag na Indo-Pacific Region.

Umaasa anya ang Estados Unidos na mas magiging malalim at mayabong ang ugnayan nito sa itinuturing nilang pinaka-matandang kaalyado sa Asya, sa ilalim ng pamumuno ng bagong pangulo.

Apat na araw matapos ang eleksyon, daan-daang residente sa bayan ng Tubaran, Lanao del Sur ang nag-picket at nag-barikada sa labas ng munisipyo, simula pa noong Martes.

Ito’y upang pigilan ang pagbiyahe ng unused ballots, vote-counting machines at iba pang election paraphernalia hangga’t hindi nareresolba ang kontrobersya sa last-minute reclustering ng tatlong voting centers.

Dahil sa standoff, naunsyami ang balloting para sa labindalawa sa dalawampu’t isang barangay na katumbas ng animnalibong botante.

Sa dalawampu’t isa, siyam lamang ang nakaboto, ito ang mga barangay Alog, Dinaigan, Gaput, Madaya, Tubaran Proper, Beta, Pagalamatan, Campo, Buribid at Polo.

Ipino-protesta ng mga residente ang biglaang pagdaragdag ng isa pang clustered voting center mula sa dating tatlo.

Malayo anila sa kanilang lugar ang ika-apat na voting center na matatagpuan din sa barangay kung saan mayroon silang rido.

Ipinag-utos umano ng Comelec ang reclustering ng voting centers kaya’t nagsuspetsa ang mga residente, partikular ang mga supporter ni incumbent mayor Yassin Papandayan na tumatakbo para sa ikatlong termino.

Kabilang ang Tubaran sa mga lugar sa Lanao del Sur na nagdeklara ng failure of elections.

Tiniyak ng Comelec na walang botanteng madi-dis-enfranchise sa mga lugar na nagdeklara ng “failure of elections” bunsod ng iba’t ibang kadahilanan, tulad ng mga naitalang election-related violence.

Ayon kay Comelec Acting Spokesman Atty. John Rex Laudiangco, isa sa pangunahing layunin ng special elections sa mga lugar na nabigong magdaos ng halalan ay tiyaking maibigay sa mga botante ang karapatan nilang  makaboto at hindi sila ma-disenfrachise.

Gayunman, kailangan pang mabatid kung maka-aapekto ang mga boto sa resulta ng isasagawang special elections sa local na posisyon dahil naka-depende ito sa kabuuang bilang ng registered voters at estado ng canvassing.

Isasagawa ang special elections sa mga bayan ng Butig, Binidayan at Tubaran pero hindi nagtakda ang Comelec ng eksaktong petsa.

Sinibak na sa pwesto ang dalawang pulis sa Cotabato City makaraang mag-viral ang video ng kanilang pagpunit ng mga shaded na balota matapos ang Halalan 2022 dahilan upang maghinalang maraming dinaraya.

Ayon kay PNP Public Information Office Chief, Brig. Gen. Roderick Augustus Alba, kasalukuyang nasa holding center ang 2 pulis upang hindi maimpluwensyahan ang isinasagawang imbestigasyon.

Inihayag ito ni Alba matapos sabihin ni Comelec Commissioner George Garcia na “unfair” na sisihin ang PNP Kaugnay ng viral video habang iniimbestigahan ang isyu.

Tiniyak naman ng Police Regional Office – Bangsamoro Autonomous Region na masusi nilang iniimbestigahan at bina-validate ang kumakalat na video sa social media.

Una nang inihayag ni Comelec Acting Spokesman John Rex Laudiangco na posibleng pagkakamali lang ito sa panig ng mga pulis pero duda pa sa ideyang isang uri ito ng pandaraya.

Aabot sa record-high na 550,000 Overseas Filipino Voters ang bumoto sa Halalan 2022.

Ito na sa ngayon ang pinaka-mataas na bilang ng mga lumahok sa Overseas Absentee Voting sa mga nakalipas na eleksyon.

Ayon kay Department of Foreign Affairs-Overseas Voting Secretariat, Director Zoilo Velasco, ang nasabing bilang ay 33 percent ng 1.7 million registered overseas voters.

Mataas anya ang voter turnout ngayong Halalan 2022 kumpara sa 2016 Elections kaya’t tagumpay ang Overseas Absentee Voting noong Abril 10 hanggang Mayo 9.

Aabot lamang sa 432,000 ang lumahok sa Overseas Absentee Voting noong 2016 Polls o 31.45% ng 1.38 million registered overseas voters noong panahong iyon, batay sa datos ng DFA.

Kabilang sa may pinakamataas na bilang ng mga botante ay mula sa Hong Kong, Singapore, Dubai at Abu Dhabi sa UAE, Riyadh sa Saudi Arabia at San Francisco, USA.