Drew Nacino

Iprinoklama na ang mga nanalong kandidato sa lungsod ng Maynila.

Kabilang si nagwagi si Mayor-Elect Honey Lacuna at kanyang bise alkalde na si Yul Servo Nieto.

Napaluha ang mayor-elect nang lumapit sa amang naka wheel chair at itinuring na malaking karangalan ang pagiging kauna-unahang babaeng alkalde ng lungsod sa nakalipas na 450 taon.

Nagpasalamat naman si mayora kay Mayor Francisco “Isko Moreno” Domagoso sa tiwala nito sa kanyang kakayahan at isang malaking hamon anya na pantayan ang mga sinimulan ng kasalukuyang alkalde.

Bagaman ikinalungkot nina Lacuna at Nieto ang pagkatalo ni Domagoso sa presidential race, mananatili naman anila sa puso ng mga Manilenyo si Yorme.

Iprinoklama na rin ng Board of Canvassers ng Zamboanga City ang bago at mas batang alkalde ng lungsod at iba pang local officials, tatlong araw matapos ang halalan.

Wagi ang 38 anyos na si Councilor John Dalipe laban sa beteranong pulitikong si Celso Lobregat, na muling natalo sa mayoral race kasama ang apat na iba pa.

Iprinoklama namang kinatawan ng unang distrito si Khymer Olaso habang nahalal bilang kinatawan sa ikalawang distrito ang nakatatandang kapatid ni Dalipe na si Manuel Jose.

Kapwa nagmula rin sa isang political clan ang magkapatid na Dalipe na anak ni dating Zamboanga City Mayor Manuel Dalipe.

Nasa 100 miyembro ng mga grupong Katoliko ang nagtipon sa Intramuros, Maynila kahapon upang ipanalangin ang resulta ng halalan at paghilom sa bansa.

Nakasuot ng puti ang mga grupo na kinabibilangan ng mga misyonero, madre at kabataan bitbit ang kandila habang nananalangin.

Nilinaw naman ni Peter Legaspi, isa sa mga organizer ng tinaguriang “Jericho Prayer Walk” na walang halong pulitika ang isinagawa nilang aktibidad.

Nagkaroon anya ng matinding pagkakawatak-watak sa bansa mula sa panahon ng kampanya, kaya’t layunin nilang makapaghatid ng mensahe ng pag-asa sa mga Pilipino na tumingin sa Diyos at hindi sa mga namumuno sa gobyerno.

Bahagi rin ang pananalangin para sa COMELEC na nasa gitna ng bilangan, sa pamahalaan, sa simbahan at sa sambayanan.

Isiniwalat ni National Security Adviser Hermogenes Esperon, Jr. na mahigit 20,000 beses tinangkang i-hack ang system bago at sa mismong araw ng May 9 National at Local Elections.

Gayunman, inihayag ni Esperon, Co-Chairman ng National Cybersecurity Inter-Agency Committee, na nagawa itong pigilan dahil sa pagiging pre-emptive ng pamahalaan.

Pinuri naman ni Esperon ang Commission on Elections at ang mga ahensyang nagbigay ng seguridad sa halalan tulad ng Armed Forces of the Philippines, Philippine National Police at Department of Information and Communications Technology.

Patas, tapat at naging maayos anya ang isinagawang botohan habang naging episyente rin ang automated election system at napakabilis ng transmission ng mga resulta ng local elections.

Sisimulan na ng Kongreso sa Mayo 24 ang canvassing ng mga boto ng mga kandidato sa pagka-pangulo at pangalawang pangulo sa katatapos lang na May 9 Elections.

Uupo ang Senado at Kamara bilang National Board of Canvassers (NBOC-Congress) para sa isasagawang canvassing ng mga Certificate of Canvass mula sa iba’t ibang lugar sa bansa.

Orihinal na itinakda ang canvassing ng Kongreso sa Mayo 23.

Gayunman, nilinaw ni Senate President Vicente “Tito” Sotto III na sa araw pa lamang na ito magbubukas ang kanilang sesyon at dito pa lang nila papangalanan ang pitong magiging kinatawan para sa NBOC-Congress.

May mga trabaho pa rin anya silang kailangang tapusin gaya ng pagpapatibay sa mga nakabinbing panukala sa ikatlo at huling pagbasa.

Sa panig naman ng mababang kapulungan ng Kongreso, kumpiyansa si House Speaker Lord Alan Velasco na magiging mabilis ang canvassing dahil computerized na ang proseso hindi tulad noon na mano-mano.

Umabot sa 109 ang bagong kaso ng COVID-19 kahapon.

Ito na sa ngayon ang pinaka-mababang single-day tally na naitala ng Department of Health simula noong April 25, 2020.

Lumagpak din sa 3,328 ang active cases na pinaka-mababa naman simula noong April 5, 2020.

Ito naman ang ika-pitong sunod na linggong walang naitalang bagong nasawi.

Sa mga naitalang bagong kaso kahapon, 52 ay mula sa NCR.

Naniniwala ang isang political analyst at miyembro ng OCTA Research na nakatulong ang suporta ni Pangulong Rodrigo Duterte upang manguna si Robin Padilla sa senatorial race.

Aminado si OCTA Research Fellow at Political Analyst, Professor Ranjit Rye na ikinagulat nila ang pagiging numero uno ni Robin sa mga senatorial candidate.

Ayon kay Rye, pinag-aaralan nila sa kanilang mga survey ang mga kandidato pero hindi lumabas ang aktor.

Batay anya sa kanilang mga naunang survey ay sina Antique Rep. Loren Legarda o broadcast journalist Raffy Tulfo bilang top pick sa senatorial race.

Binigyang-diin naman ni Rye na ilan sa mga dahilan ng pamamayagpag ni “Binoy” ay ang kasikatan nito at malakas na suporta ng administrasyon at iba pang kandidato at respeto mula sa Muslim Community.