Nilinaw ng Energy Regulatory Commission (ERC) na wala na sa kanilang kamay ang desisyon sa kinakaharap na power outage sa Occidental Mindoro.
Ayon kay ERC Chairperson, Atty. Agnes Devanadera, ang Occidental Mindoro Consolidated Power Corporation (OMCPC) at Occidental Mindoro Electric Cooperative (OMECO) ang dapat mag-usap.
Ito’y dahil ang OMCPC at OMECO ang mayroong agreement pagdating sa pagsusupply ng kuryente sa lalawigan.
Naghahanda na sina President-elect Ferdinand “Bongbong” Marcos Jr. at kanyang pamilya at nasa proseso na ng paglipat sa Malakanyang upang maging first family.
Sa kanyang Youtube vlog, aminado si Marcos na bukod sa kanyang sarili, ang kanyang asawang si Liza at mga anak na sina Sandro, Simon at Vinny ay pawang nag-a-adjust sa kanilang mga paparating na bagong buhay bilang miyembro ng presidential family.
Kailangan anyang pansamantalang isuko ni Liza ang kanyang posisyon sa Law firm nitong M and Associates, na kanyang itinatag.
Inihahanda na rin ng panganay na anak nina Marcos na si Sandro ang kanyang bagong opisina para sa kanyang trabaho bilang kinatawan ng unang distrito ng Ilocos Norte.
Inamin din ni PBBM na panay reklamo na sina Simon at Vinny dahil sa biglaang pagdami ng kanilang security detail bagay na hindi naman anya maiiwasan kapag naging anak ng Pangulo.
Samantala, pinasalamatan naman ni PBBM si Pangulong Rodrigo Duterte sa opisyal na pagtatapos ng termino nito sa Huwebes, Hunyo 30.
Matapos ang halos sampung taong tigil-operasyon, muling umarangkada ang byaheng san Pablo, Laguna at Lucena, Quezon ng Philippine National Railways.
Kahapon pinasinayaan ang pagbabalik-operasyon ng San Pablo-Lucena line sa pangunguna ni Pangulong Rodrigo Duterte.
Ayon sa Department of Transportation, ang muling pagbubukas ng linya ay mahalaga sa pagpapanumbalik ng linya ng PNR-Bicol, na nag-uugnay sa Metro Manila sa mga lalawigan sa Timog-Katagalugan, Camarines Sur, Albay hanggang Sorsogon.
Nasa 3,600 pasahero ang kayang serbisyuhan ng San Pablo-Lucena Line mula Laguna at Quezon provinces.
Aabutin na lamang ng kalahating oras ang biyahe mula Lucena hanggang San Pablo pabalik kung sasakay ng tren, mula sa dating isang oras na biyahe sa kalsada.
Ang 44 kilometer commuter line ay mayroon ding dalawang pangunahing istasyon at apat na flag stop.
Magugunitang inihinto noong October 2013 ang nasabing linya makaraang bumagsak ang sumusuportang istruktura nito.
Muling nagpadala ng mga fighter jet ang Taiwan upang bugawin ang nasa 20 Chinese aircraft sa air defense zone nito.
Ito na ang ikalawang sunod na beses na sumiklab ang tensyon sa pagitan ng Taiwan at China ngayong linggo.
Kabilang sa mga pinadala ng China sa Taiwanese airspace ang ilang J-17 fighter aircraft mga fighter-bomber.
Ayon sa Taiwanese Defense Ministry, lumapit din ang mga Chinese aircraft sa Bashi channel, na nagsisilbing boundary ng Taiwan at Pilipinas sa pacific ocean.
Agad namang ikinasa ng Taiwan ang mga missile nito pero mabilis na nakaalis ang mga Chinese aircraft.
Una nang nagbabala ang Chinese Defense Ministry na hahantong sa digmaan kung ipipilit ng Taiwan na humiwalay sa China.
Magkakaalaman na mamaya kung mapipili si Kai Sotto sa 2022 NBA draft.
Isasagawa ang draft sa Barclays Center sa Brooklyn, New York City kung saan 58 ang magiging pick.
Magugunting sumabak ang 7-foot-3 center sa iba’t-ibang workout ng ilang team sa NBA upang maging unang homegrown Filipino player na target makapasok sa pinaka-sikat na basketball league.
Nagkaroon ng workout ang 20 anyos na Gilas mainstay kasama ang New York Knicks, Orlando Magic, Cleveland Cavaliers, Chicago Bulls, Sacramento Kings, Los Angeles Clippers, Atlanta Hawks at Indiana Pacers.
Namemeligrong kapusin ang supply ng raw sugar sa bansa.
Ibinabala ito ng Sugar Regulatory Administration (SRA) makaraang mapilitan na ang mga manufacturer na kumuha ng local supply, na limitado lamang sa merkado.
Ayon kay SRA Administrator Hermenegildo Serafica, ang mga manufacturer na noon pa hindi bumibili ay bumibili na ngayon ng raw sugar upang iproseso bilang refined sugar para sa kanilang consumption.
Isinisi naman ni Serafica sa United Sugar Producers Federation sa pangunguna ng pangulo nitong si Manuel Lamata ang pagtaas ng presyo ng asukal sa mga nakalipas na buwan, dahil sa pagharang grupo sa importasyon ng refined sugar.
Sa datos ng SRA, nasa P49 hanggang P71 na ang kada kilo ng retail price ng raw sugar sa mga supermarket ngayong buwan mula sa dating P41 hanggang P56 sa kaparehong panahon ngayong taon.
Nasa P58 hangang P70 naman ang presyo nito sa mga palengke kumpara sa P43 hanggang P48 kada kilo noong isang taon.
Pasok pa rin sa benchmark ng World Health Organization ang kasalukuyang Covid-19 positivity rate sa bansa.
Inihayag ito ng Department of Health makaraang makapagtala ng positivity rate na 3.7% na nasa treshold pa rin ng WHO na 5%.
Ito, ayon sa DOH, ay batay sa datos ng Epidemiology Bureau at covid-19 surveillance unit, hanggang noong June 21.
Gayunman, nasa 5.2% ang positivity rate sa Metro Manila ngayong linggo kumpara sa 3.2% noong nakaraang linggo habang tumaas din ang positivity rate sa ibang rehiyon.
Taliwas naman ito sa projection ng independent pandemic monitor na OCTA Research Group na 5.5% ang positivity rate sa National Capital Region.
Samantala, nilinaw ng kagawaran na ang positivity rate ay hindi batayan upang i-assess ang kasalukuyang covid-19 situation.
Tinanggap na ni Dating Philippine Airlines President at cHief Operating Officer Jaime Bautista ang alok na maging transportation secretary sa ilalim ng administrasyon ni President-Elect Bongbong Marcos.
Ito ang kinumpirma ni Incoming Executive Secretary, Atty. Vic Rodriguez makaraang pangalanan ni Marcos si Bautista bilang susunod na kalihim ng naturang kagawaran, kahapon.
Papalitan ni Bautista si Arthur Tugade bilang DOTr secretary simula sa Hunyo a – 30.
Si Bautista, na isang certified public accountant, ay nanungkulan sa pal sa loob ng 25 taon bilang pangulo bago nag-retiro noong 2019.
Kabilang anya sa mga marching order sa kanya ni PBBM ay mag-develop ng premier airport na pasok sa international standards.
Ipinag-utos na ni Pangulong Rodrigo Duterte ang pagbuwag sa government-run firm First Cavite Industrial Estate, incorporated (FCIEI) alinsunod sa Memorandum Order 62.
Ito’y makaraang makumpleto na ng nasabing kumpanya ang misyon nito sa ilalim ng National Development Company (ndc).
Itinatag ang (FCIEI) upang i-develop ang NDC Property sa Dasmariñas City, Cavite bilang isang industrial estate at economic zone habang ibinenta na sa locators ang lahat ng saleable lots sa loob ng estate simula noong 1995.
Ang nasabing estate, na itinayo noong 1990, ay joint project ng NDC, Marubeni Corporation at Japan International Development Organization na layuning serbisyuhan ang lahat ng basic needs ng anumang manufacturing concern ng light-to-medium scale industry.
Posibleng sumampa sa 7,500 ang aktibong kaso ng Covid-19 sa bansa sa ikalawang bahagi ng Hulyo.
Batay ito sa projection ng Department of Health, kung patuloy na mababawasan ang mga sumusunod sa minimum health protocols at mananatiling kaunti ang nagpapaturok ng booster.
Ayon kay DOH Undersecretary Maria Rosario Vergeire, maaaring dumami ang ma-o-ospital sa ikalawa hanggang ikatlong linggo ng hulyo dahil sa bumababang immunity.
Sa mahigit 70 milyong naka-kumpleto na ng bakuna, nasa 15 milyon pa lamang sa mga ito ang naturukan na ng unang booster.