Drew Nacino

Asahan pa ang patuloy na pagtaas ng presyo ng tinapay dahil sa hindi maawat na pagmahal ng harina sa gitna ng lumulobong presyo ng wheat o trigo sa international market.

Ito ang ibinabala ng Philippine Association of Flour Millers (PAFMIL) kahit nananatiling sapat ang supply ng harina ngayong taon.

Ayon kay Ric Pinca, Executive Director ng PAFMIL, giyera sa pagitan ng Ukraine at Russia, export ban ng India at tagtuyot sa U.S. ang naging ugat upang tumaas ang presyo ng trigo mula sa mga naturang bansa na pangunahing wheat exporter.

Nahaharap na anya ang mundo sa “food crisis” at kahit napakaraming wheat supply, mahigit kalahati naman nito ang hindi pa na-e-export.

Tatlumpung porsyento ng wheat supply sa mundo ay mula ukraine at russia pero dahil sa digmaan, 20 million metric tons ng trigo ang hinarang sa Odessa port, Ukraine.

Sa pagtaya ng PAFMIL, sumirit na sa 500 dollars per metric ton ang global price ng trigo mula sa 300 dollars per metric ton noong Disyembre.

Hinimok ng Confederation of Truckers Association of the Philippines (CTAP) ang pamahalaan na alisin na ang mga “Unnecessary charges” o singil sa truckers.

Ito’y upang mabawasan ang kanilang pasanin lalo’t posibleng humantong sila sa pansamantalang tigil-operasyon sa gitna ng walang prenong pagtaas ng presyo ng krudo.

Ayon kay CTAP President Maria Zapata, lumalaki na ang kanilang gastos dahil sa krudo kaya’t may ilang truckers na napipilitang magpahinga muna o pansamantalang tumigil sa operasyon.

Maaari naman anyang maibsan ng pamahalaan ang pasanin ng mga trucker sa pamamagitan ng pagtanggal sa mga ilang singil, tulad ng truck accreditation mula sa government agencies at passing fees.

Ipinunto ni Zapata na mababawasan ng P70,000 pesos ang gastos ng kada buwan ng isang unit kung mawawala ang mga nasabing singil.

Pinangalanan naman ni President-Elect Bongbong Marcos bilang Chairperson-designate ng Land Transportation Franchising and Regulatory Board ang beteranang mamamahayag na si Atty. Cheloy garafil.

Si Garafil, ang kasalukuyang service director ng Committee on Rules ng Kamara, naging prosecutor para sa Department of Justice at State Solicitor ng Office of the Solicitor General.

Mahigit isang dekada ring nagtrabaho si Garafil bilang media practitioner sa iba’t-ibang Media Organizations, tulad ng associated press at malaya.

Pasok din sa transport cluster ni Marcos si Christopher “Chet” Pastrana, na magiging general manager-designate ng Philippine Ports Authority.

Taglay ni Pastrana, na isang matagumpay na negosyante sa larangan ng transportasyon, ang deka-dekada na nitong karanasan sa iba’t-ibang aspeto ng aviation, logistics at public maritime transport.

Siya rin ang chairman ng archipelago Philippines Ferries Corporation, na nag-o-operate ng fastcat ferries.

Samantala, itinalaga rin bilang DOTr undersecretary for rails si dating LRTA Deputy Administrator Cesar Chavez.

Isang linggo bago matapos ang termino ni Pangulong Rodrigo Duterte, sinibak na ng palasyo sa pwesto si Agrarian Reform Acting Secretary Bernie Cruz.

Sa June 20 memorandum ng Malakanyang, itinalaga si DAR Undersecretary David Erro bilang officer-in-charge ng ahensya hanggang June 30.

Matatandaang itinalaga si Cruz bilang acting DAR secretary noong November 2021 makaraang magbitiw si Secretary John Castriciones sa kanyang pwesto matapos kumandidato sa pagka-senador.

Alinsunod sa batas, ang appointment ni Usec. Cruz ay dapat umanong dumaan sa Commission on Appointments.

Nag-adjourn ang Kongreso ngayong Hunyo, kaya’t ang appointment ni Cruz ay itinuturing na bypassed, na nag-udyok sa Office of the President na magtalaga ng isang o.i.c.

Kinalampag ni Senador Grace Poe ang gobyerno sa makupad na pag-i-imprenta at pamamahagi ng mga national identification card na inabot ng 6 na buwan hanggang 1 taon.

Ipinanawagan na ni Poe sa pamahalaan, partikular sa Philippine Statistics Authority (PSA) na solusyonan na ang pagkaantala sa pag-iimprenta at pamamahagi ng Philsys I.D.

Napadali na rin sana ang pakikipag-transaksyon ng publiko sa pamahalaan at pribadong sektor kung nasa kanila na ang national id.

Kasabay ng patuloy na paghikayat ng gobyerno sa publiko na kumuha ng national id, iginiit ng senador na dapat namang tiyakin ng PSA ang wastong datos sa card at kung may kinakailangang baguhin ay dapat silang maging maagap.

Mayroong ligal na batayan sa ilalim ng Anti-Terror Act ang pag-block ng National Telecommunications Commission (NTC) sa mahigit 20 websites.

Ito, ayon kay Senator Panfilo Lacson, ay kung ang mga ipina-block na website ay may kinalaman sa pagpopondo sa aktibidad ng NDF-CPP-NPA.

Sa ilalim anya ng Anti-Terror Law, ang NDF-CPP-NPA ay itinalaga bilang teroristang grupo.

Gayunman, inihayag ng senador na karapatan ng mga na-agrabyado sa naturang hakbang na kwestyunin ito sa Korte dahil may kaugnayan ito sa interpretasyon ng batas.

Si Lacson ay isa sa mga author at nag-sponsor ng Anti-Terror Act sa mataas na kapulungan ng Kongreso.

Lumundag pa sa 5,523 ang aktibong kaso ng Covid-19 sa bansa.

Ito’y makaraang makapagtala ang Department of Health ng karagdagang 716 covid cases, kahapon na pinaka-mataas na single-day tally simula noong Marso.

Dahil dito ay lumobo na sa kabuuang 3,698,509 ang caseload.

Nadagdagan naman ng 295 ang recoveries kaya’t umakyat na sa 3,632,491 ang gumaling habang mayroong 11 nadagdag sa death toll kaya’t umabot na sa 60,495 ang namatay.

Nangunguna pa rin ang Metro Manila sa mga rehiyong may pinaka-maraming bagong covid-19 cases sa nakalipas na 2 buwan, na 3,002; sinundan ito ng Calabarzon, 989; Western Visayas, 510; Central Luzon, 432 at Central Visayas, 248.

Nanindigan ang Department of the Interior and Local Government (DILG) sa naging pasya ng National Security Council at National Telecommunications Commission na i-block ang websites ng affiliated groups at front organizations ng NDF-CPP-NPA.

Inihayag ni DILG Undersecretary at NTF-ELCAC Spokesman Jonathan Malaya na ang ligal na basehan para higpitan ang mga nasabing website ay alinsunod sa R.A. 11479 o “Anti-Terrorism Act of 2020” partikular na ang first paragraph ng section 2.

Sa ilalim ng Section 2, declaration of policy, tungkulin ng estado na protektahan ang buhay, karapatan at ari-arian laban sa terorismo at kundenahin ito bilang peligroso sa national security ng bansa at mga mamamayan.

Maaari naman anyang magbigay ng argumento ang mga apektado at sabihing isa lamang uri ng pagsikil sa kalayaan sa pagpapahayag ang pag-block sa websites.

Gayunman, iginiit ni Malaya na hindi ito maaaring idahilan sapagkat hindi naman “absolute” ang freedom of speech.

Pag-aaralan ng Pilipinas ang posibleng pagbabakuna sa mga kabataang 5 taon pababa kontra Covid-19.

Ayon kay National Vaccination Operations Center Chairperson Myrna Cabotaje, naka-depende ang mga pag-aaral sa resulta ng pagsasaliksik sa ibayong dagat at kung may ilang bakuna na pwede sa mga edad 5 pababa.

Aalamin din anya kung sino na ang mga mayroong emergency use authorization at ano ang i-re-rekomenda ng Health Technology Assessment Council.

Inihayag din ni Cabotaje na ang vaccine program ng bansa ay naka-latag na para sa susunod na administrasyon.

Gayunman, mayroon anyang pangangailangan na itaguyod ang pagtuturok ng booster at ng primary series.

Kamakailan lamang, sinimulan na ng Pilipinas ang  booster dose vaccination para sa immunocompromised na edad na 12 hanggang 17.

31 katao, kabilang ang 4 na tripulanteng Filipino na sakay ng isang korean vessel na Momyo ang ligtas matapos lumubog sa gitna ng karagatang pasipiko ang naturang barko.

Kinilala ang mga pinoy na sina Mark Anthony Camense, Jovencio Mariano, Jocel Asturias at Marelio Bautista.

Ayon kina Camense, pauwi na sila galing sa pangingisda sa pagitan ng Solomon islands at Papua New Guinea nang salpukin ang kanilang barko ng Taiwanese vessel na Viva Fafa noong Hunyo a – 8.

Mabuti na lamang anila at nailigtas sila ng mga crew ng Taiwanese vessel.

Kasama ng mga pinoy sa nasabing trahedya ang ilang Indonesian, Korean at Vietnamese.

Kasalukuyang nasa Taiwan ang 4 na tripulanteng pinoy upang asikasuhin ang kanilang mga papeles pauwi habang nagsasagawa na ng imbestigasyon.