Drew Nacino

Ipinauubaya na sa susunod na administrasyon ang desisyon kung ipagpapatuloy o bubuwagin na ang Inter-Agency Council for Traffic o I-ACT.

Ayon kay I-ACT Chief Charlie Del Rosario, naka-depende rin sa susunod na transportation secretary ang magiging pasya.

Maaari rin naman anyang i-abolish o buwagin ng susunod na administrasyon ang nasabing council at magtatag ng bagong task force for traffic.

Samantala, tiniyak ni Del Rosario na itutuloy nila ang pagsugpo sa mga colorum vehicle kahit pa may limitadong bilang ng public utility vehicles na nag-o-operate dahil sa mataas na presyo ng langis.

Posibleng pumalo sa “peak” na hanggang 2,000 ang magiging daily Covid-19 cases sa Metro Manila sa katapusan ng Hulyo.

Ito ang ibinabala ni Health Undersecretary Maria Rosario Vergeire makaraang makapagtala ng kabuuang 3,198 new cases sa bansa simula June 14 hanggang 20 o average na 456 cases per day.

Ayon kay Vergeire, nasa 300 cases per day na ang naitatala sa ngayon.

Napansin anya ang pagtaas ng mga kaso sa buong Luzon at Visayas, pero nananatiling less than 80 ang average daily cases habang mababa ang trend sa Mindanao, na less than 40 ang average.

Umakyat din sa 3.1% ang national positivity rate na kahalintulad noong unang bahagi ng Marso.

Lumampas na sa epidemic threshold para sa dengue ang mga naitalang kaso ng naturang sakit sa 14 na rehiyon sa bansa.

Inihayag ni Health Undersecretary Maria Rosario Vergeire na aabot na sa 39,705 dengue cases ang naitala simula noong January 1 hanggang June 4.

31% itong mataas kumpara sa mga kasong naitala sa kaparehong panahon noong 2021.

Karamihan aniya sa mga kaso ay nagmula sa Central Visayas, Central Luzon at Zamboanga Peninsula.

Kabilang na rito ang 9,814 dengue cases na naitala lamang sa pagitan ng Mayo a – 8 hanggang Hunyo a – 4 sa Central Luzon, Central Visayas at Calabarzon.

Samantala, umakyat na sa 202 ang death toll sa nabanggit na sakit simula Enero.

Aprubado na ng National Capital Region Tripartite Wages and Productivity Board (NCR–TWPB) ang dagdag na P1,000 sa buwanang sahod ng mga kasambahay sa Metro Manila.

Ayon kay Department of Labor and Employment Director Rolly Francia, dahil sa wage increase, magiging P6,000 na ang sahod kada buwan ng mga kasambahay sa National Capital Region.

Nasa 200,000 kasambahay sa Metro Manila ang makikinabang sa dagdag-sweldo bunsod na rin ng pagtaas ng presyo ng mga bilihin.

Sa kabila nito, aminado naman si Labor Secretary Silvestro Bello III na hindi sapat ang P1,000 pisong dagdag-sahod.

Samantala, isasailalim pa sa pagsusuri ng National Wages and Productivity Commission na magpupulong ngayong araw ang naturang desisyon ng NCR-TWPB.

Binulabog din ng mga ipo-ipo o waterspout ang ilang residente sa mga lalawigan ng Cebu at Bohol matapos ang malakas na pag-ulan sa mga naturang lugar, kahapon.

Namataan ang unang ipo-ipo sa baybayin ng bayan ng San Francisco sa Camotes Islands, Cebu pero nilinaw ng Pagasa na alanganing buhawi o ipo-ipo ito dahil hindi umikot ang hangin bagkus isa lamang itong makapal na cumulonimbus cloud.

Isa ring ipo-ipo ang namataan sa Argao, Cebu maging sa Tagbilaran City at Bayan ng Dauis, Bohol dakong alas-diyes ng umaga.

Bukod dito, sumulpot din ang isa pang ipo-ipo sa bahagi ng Panglao Island.

Wala namang nasaktan dahil hindi naman nagtagal ang mga nasabing ipo-ipo.

Kasabay ng malakas na buhos na ulan kahapon, binayo rin ng malakas na hangin ang Lungsod ng Maynila, kahapon.

Dakong ala-5 ng hapon nang mapansin ang isang mala-buhawing hangin malapit sa isang mall sa Tayuman street, Sta. Cruz.

Ayon sa Manila Municipal Disaster Risk Reduction and Management Office, nagtumbahan ang ilang puno at nagliparan ang mga plastic barrier sa lakas ng hangin.

Naantala rin ang operasyon sa isang construction site makaraang gumalaw ang isang backhoe at magbagsakan ang mga barikada.

Wala namang nasugatan habang inalis na ng MDRRMO Ang mga nagtumbahan at nagkalat na sanga ng puno.

Lumagpak sa pinakababang halaga sa halos dalawang dekada ang piso matapos magsara ang palitan sa dolyar sa P54.47, kahapon.

Ito na ang pinakamababang halaga ng piso kontra dolyar simula November 21, 2005 kung saan umabot ito sa P54.74 kada U.S dollar.

Ang datos na ito ay pabor para sa mga overseas Filipinos na nagpapadala ng dolyar sa kanilang pamilya, na nangangahulugan din ng mas malaking halaga nang ipinapalit sa piso.

Sa gitna ito ng inaasahang pagtaas ng Bangko Sentral ng Pilipinas sa kanilang interest rates laban sa inflation gamit ang 50-basis-point hike.

Magugunitang umabot sa “all-time high” ang utang ng gobyerno ng Pilipinas sa P12.76 trillion noong Abril, bagay na naapektuhan na noon ng paghina ng piso kontra dolyar.

Idineklara ng Malakanyang bilang special non-working day ang Hunyo a – 24 sa lungsod ng Maynila bilang pagdiriwang ng 451st founding anniversary ng Kabisera ng bansa, bukas.

Inanunsyo ng Palasyo ang deklarasyon sa pamamagitan ng Proclamation 1400 na nilagdaan ni Executive Secretary Salvador Medialdea, sa ngalan ni Pangulong Rodrigo Duterte, kahapon.

Hunyo a–24 taong 1571 nang itatag ang Lungsod ng Maynila ng mananakop na Español na si Miguel Lopez de Legazpi, na kauna-unahang gobernador-heneral o adelantado ng Pilipinas.