Drew Nacino

Lumampas na sa 5% benchmark ng World Health Organization ang Covid-19 positivity rate sa National Capital Region.

Inihayag ni OCTA Research Fellow, Dr. Guido David na umabot na sa 5.5% ang covid-19 positivity rate sa Metro Manila, hanggang kahapon.

Ayon kay David, bukod sa NCR, nakitaan din ng pagtaas ng infections sa Western Visayas at iba pang lalawigan pero hindi pa naman ito dapat ika-alarma ng publiko.

Mula June 15 hanggang 21, umakyat sa 238 ang daily covid-19 cases sa Metro Manila mula sa 135 habang sumampa sa 76% ang one-week growth rate.

Nananatili sa 1.68 o nasa below 7, ang average daily attack rate sa NCR, o ang average number ng mga bagong kaso sa kada 100,000 individuals.

Samantala, lumundag naman sa 2% ang reproduction rate kumpara sa inirerekomenda ng mga eksperto na less than one.

Umani ng batikos ang pag-block ng National Telecommunications Commission (NTC) sa 2 news websites at 26 na iba pa, bilang bahagi ng kampanya ng gobyerno kontra-terorismo.

Alinsunod ito sa hiling ni National Security Adviser Hermogenes Esperon sa NTC na i-takedown ang 26 na websites dahil “may kaugnayan at sinusuportahan” umano ng mga ito ang mga rebeldeng komunista.

Gayunman, nadamay ang ilang alternative media sites, tulad ng Bulatlat at Pinoyweekly, na kapwa lehitimong organisasyon ng mga mamamahayag na hindi designated bilang terorista ng anti-terrorism council.

Kinundena naman ng Bulatlat at Pinoyweekly ang nasabing hakbang ng gobyerno na anila’y paglabag sa rights to freedom of the press, speech at expression.

Pinalagan din ng National Union of Journalists of the Philippines ang nangyaring atake, lalo’t arbitrary” umano ang pagkakadagdag ng Bulatlat, Pinoyweekly at iba pa sa listahan ng NTC Dahil umano sa “pagsuporta” sa CPP-NPA-NDFP.

Tinatayang 2 milyong doses ng Sputnik V COVID-19 vaccine ang nakatakdang i-donate ng pilipinas sa myanmar sa katapusan ng Hunyo o unang linggo ng Hulyo.

Ayon kay National Vaccination Operations Center Chairperson at DOH Undersecretary Myrna Cabotaje, nakikipag-ugnayan na sila sa gobyerno ng myanmar para sa pag-de-deliver ng mga bakuna.

Idodonate anya ang mga bakuna sa pamamagitan Myanmar Red Cross.

Tiniyak naman ni Cabotaje na kahit mag-donate ang Pilipinas ay sapat pa rin ang mga bakunang maiiwan sa bansa hanggang sa katapusan ng taon.

Magugunitang inihayag ni National Task Force Against COVID-19 adviser, Dr. Ted Herbosa na nasa tatlong milyong vaccine doses ang i-dodonate sa ilang bansa sa Southeast Asia gaya ng Laos, Cambodia at Myanmar.

Nakatakda nang buksan ng MMDA sa publiko ang free solar charging station nito para sa mga electric bike at electric scooter.

Simula sa Hunyo 27 ay magagamit na nang libre ang kanilang solar charging station sa bagong gusali nito sa Barangay Ugong, Pasig City, simula ala-6 ng umaga hanggang ala-7 ng gabi.

Ayon kay MMDA Chairman Romando Artes, inilunsad ang naturang proyekto upang maibsan ang pasanin ng publiko mula sa mataas na presyo ng mga produktong petrolyo.

Dahil sa charging station, ma-e-engganyo anya ang publiko na gumamit ng ibang uri ng transportasyon at makatitipid sila sa gastos sa krudo.

Plano rin ng MMDA na magtayo ng mga kahalintulad na charging station sa headquarters nila sa Orense, Makati City upang ma-accommodate ang mga dumaraan sa Edsa.

Kinakailangan lamang magdala ng mga gagamit nito ng sarili nilang charging cords at cables.

Tatagal naman ng anim hanggang walong oras ang pag-charge sa e-bike depende sa baterya nito.

Dapat nang bilisan at ayusin ang pamamahagi ng pantawid-pasada o tulong pinansyal sa mga tsuper ng pampublikong sasakyan na apektado ng walang prenong pagtaas ng presyo ng oil products.

Ito ang panawagan nina Senator Sherwin Gatchalian, Chairman ng Senate Committee on Energy at Senator Imee Marcos sa Land Transportation Franchising and Regulatory Board (LTFRB).

Ayon kina Marcos at Gatchalian, available ang pondo para sa pantawid pasada dahil ipinasok ito sa national budget ngayong taon, pero laging may mga tsuper na umaangal na hindi nila natatanggap ang ayuda o kaya ay napakabagal ang distribusyon.

Hindi anila sumasabay sa napakabilis na pagtaas ng presyo ng langis ang pamamahagi ng ayuda, maging ang pagbabayad sa mga kinuhang tsuper sa ilalim ng Service Contracting Program.

Inihayag ni Gatchalian na noong marso pa inireklamo ng mga tsuper ng jeep ang makupad na pamamahagi ng ayuda, habang iginiit ni Marcos na paulit-ulit na ang reklamo sa magulo o kawalan ng LTFRB ng maayos na listahan ng mga benepisyaryo ng pantawid pasada.

Ipinunto ng dalawang senador na dapat na itong isaayos ngayong ikinukunsidera na ang ikatlong bigayan ng pantawid pasada. —sa ulat ni Cely Ortega-Bueno (Patrol 19)

Hinimok ni Senator Francis Tolentino ang Department of Budget and Management (DBM) na palakasin ang mga local government units (LGU) alinsunod sa Supreme Court Mandanas ruling.

Ayon kay Tolentino, layunin ng hakbang na maiwasan ang epekto ng nagbabadyang global recession dulot ng giyera sa pagitan ng Russia at Ukraine.

Sa pamamagitan ito ng pag aalok sa mga LGU ng funded allocation na tutugon sa pangangailangan ng kanilang nasasakupan, lalo ngayong patuloy ang paghina ng  purchasing power ng mga ordinaryong mamamayan.

Nagbigay anya ng guidelines ang outgoing DBM Officials kung paano gagastusin ang karagdagang alokasyon sa mga LGU sa ilalim ng Mandanas ruling.

Malaking halaga ang maibibigay na dagdag na pondo sa mga LGU kung saan dapat nila itong gamitin sa tunay na pangangailangan sa kanilang constituents upang maiwasan ang epekto ng napipintong recession.

Iginiit ng senador na maaaring gamitin ang  karagdagang alokasyon sa pamamagitan ng pagtatayo ng karagdagang warehouses, milling stations at cold storage facilities para sa mga lokal na magsasaka at mangingisda. —sa ulat ni Cely Ortega-Bueno (Patrol 19)

Isusulong ni Senator-Elect Raffy Tulfo ang paglalaan ng mas malaking pondo para sa modernisasyon ng mga korte.

Ayon kay Tulfo, kailangan ng digitization, computerization, mas mabilis na komunikasyon at mas maraming pasilidad para sa hudikatura.

Ito, anya, ay upang maraming korte ang makapagsagawa ng paglilitis online o sa pamamagitan ng video conferencing.

Tinukoy din ng bagong-halal na senador ang pangangailan para sa Court on Wheels upang mapabilis ang mga paglilitis at mapalaya agad ang mga nabibilanggo na maaaring inosente sa kaso. —sa ulat ni Cely Ortega-Bueno (Patrol 19)

Tinapos na ng Boracay Inter-Agency Task Force (BIATF) Sa pangunguna ng Department of Environment and Natural Resources ang rehabilitasyon at pamamahala sa isla ng Boracay, sa Malay, Aklan.

Ito’y makaraan ang apat na taong malawakang rehabilitasyon sa pinaka-sikat na tourist destination sa bansa.

Itinurn-over na rin ni DENR Acting Secretary at BIATF Chairman Jim Sampulna ang pamamahala ng isla sa Malay Municipal at Aklan government.

Aminado si Sampulna na malaking hamon para sa nasabing lgu ang pagpapanatili ng kalinisan sa isla, kabilang ang pagdi-disiplina sa mga residente nito at turista.

Una nang binuo ang BIATF, kung saan vice-chair ang Department of Tourism at Interior and Local Government, ni Pangulong Rodrigo Duterte sa pamamagitan ng executive order 53 noong May 8, 2018.

Magtatapos sana ang termino ng task force noong 2020, pero pinalawig ito ni Pangulong Duterte hanggang May 8, 2021 sa paglabas ng EO 115 noong May 11, 2020 at muling pinalawig hanggang June 30, 2022 sa bisa ng EO 148.

Nakatakda nang ipamahagi ng Department of Agrarian Reform ang natitirang mahigit 300 ektaryang yulo estate sa lalawigan ng Masbate.

Ito’y matapos ang oath-taking ng isandaan siyamnapung Agrarian Reform Beneficiaries (ARB), kabilang ang tatlong dating miyembro ng New People’s Army.

Ayon kay Provincial Agrarian Reform Program Officer 2 Herald Tambal, nanumpa ang mga A.R.B. kay Judge Rolando Sandigan ng Municipal Trial Court-Masbate City, na sinundan ng paglagda sa application to purchase and farmer’s undertaking.

Ang lupain ay bahagi ng 1,372 hectares na landholding na dating pag-aari ni Luis Yulo sa barangay Matagbac sa bayan ng Milagros.

Taong 1993 nang unang ipamahagi ang nasa isanlibong ektaryang lupain ng Yulo estate sa 357 agrarian reform beneficiaries.

Tiniyak ng Department of Health na magiging ligtas ang pagbabalik ng face-to-face classes sa kabila ng muling pagtaas ng Covid-19 cases.

Ipinaliwanag ni Health Undersecretary Maria Rosario Vergeire na hindi naman nila papayagan ang pagbabalik ng klase kung may peligrong hatid ang paglobo na naman ng covid-19 cases sa mga kabataan.

Ayon kay Vergeire, naka-depende ang pagbabalik ng in-person classes sa alert level system.

Hangga’t nasa alert level 1 anya ang Metro Manila at iba pang lugar ay magbabalik sa paaralan ang mga estudyante subalit kung aakyat sa level 3 ay tiyak na maaantala ito.

Una nang pinalawig ng pamahalaan ang alert level 1 sa National Capital Region hanggang June 30 na pinakamababang covid-19 alert level.

Samantala, hinimok ng health official ang mga magulang na pabakunahan ang kanilang mga anak laban sa virus bilang proteksyon sa oras na magbalik sa mga paaralan.