Drew Nacino

Patay si dating Budget Secretary at Camarines Sur 1^st District Rep. Rolando “Nonoy” Andaya Junior matapos umanong magbaril sa ulo kahapon ng umaga.

Kinumpirma ng magkapatid na Ranton at Katrina Andaya ang pagkamatay ng kanilang ama pero tumangging magbigay ng pahayag ang mga ito at umapela ng pang-unawa sa gitna ng kanilang pagdadalamhati.

Isang putok ng baril ang narinig sa kwarto ng 53 anyos na biyudo sa bahay nito Saint Jude Orchard Subdivision sa Concepcion Grande, Naga City.

Ayon kay Capt. Antonio Per, Jr. Acting Commander ng Naga City Police – Station 2, natagpuan ang dating kongresista ng personal assistant nitong si John Mark Patrick Senar, na duguang nakahandusay dakong ala-7 ng umaga.

Inaalam na ng pulisya kung nagpatiwakal si Andaya o nagkaroon ng foul play lalo’t noong isang taon ay tinangka itong tambangan sa bayan ng pili subalit nakaligtas.

Nobyembre naman nang nagbalak si Andaya na kumandidato muli bilang kongresista pero umatras at sa halip ay tumakbo sa pagka-gobernador pero natalo kay Luigi Villafuerte na anak ng kanyang matinding katunggaling si Congressman Lray Villafuerte.

Bukod sa pagiging kongresista, nagsilbi si Andaya bilang Budget Secretary mula 2006 hanggang 2010 sa ilalim ni dating Pangulong Gloria Macapagal-Arroyo.

Nabiyudo si Andaya matapos pumanaw noong 2020 ang kanyang maybahay na si dating Congresswoman Marissa Mercado-Andaya dahil sa cancer. —sa ulat ni Melvin Machado (Ronda Patrol – CamSur)

Tuluyan nang nagtapos ang Libreng Sakay ng MRT-3, kahapon matapos ang tatlong buwan.

Ilang pasahero naman ang nagpasalamat sa pamunuan ng MRT-3, kabilang ang isang masayang commuter na nag-iwan ng liham sa isa sa mga tren.

Sa mensahe ng naturang mananakay, pinasalamatan nito ang mga nasa likod ng libreng sakay ng MRT-3 at iba pang transport vehicles, kabilan ang mga bumibyahe sa Novaliches, Quezon City.

Sinagot naman ito ng MRT-3 management sa pagsasabing makatitiyak ang publiko sa mas maayos na serbisyo.

Bukod sa free ride, nagtapos na rin ang libreng antigen service ng MRT-3 para sa mga commuter.

Tiniyak ni Pangulong Ferdinand “Bongbong” Marcos Junior na kanyang aayusin ang public health system ng bansa, sa gitna ng kinakaharap na COVID-19 pandemic.

Ayon kay Pangulong Marcos, kabilang ang pandemya sa pinaka-malaking hamong kinaharap hindi lamang ng Pilipinas, kundi ng buong mundo.

Pinapurihan naman ni PBBM ang mga Pinoy Healthcare Worker na buhay ang isinasakripisyo at nakikipagsapalaran sa ibayong dagata para sa magandang kinabukasan.

Sa kabila nito, maka-aasa anya ang mga healthcare worker at mamamayan na tutugunan ang mga kakulangan sa public health system.

Halos 30 indibidwal na dumalo sa inagurasyon ni Pangulong Ferdinand “Bongbong” Marcos Junior sa National Museum sa Lungsod ng Maynila ang na-hilo at high blood.

Ayon sa Department of Health (DOH), dinala sa tent ng medical team sa museyo ang mga pasyenteng pawang edad 40 hanggang 55.

Siyam pang indibidwal na dumalo rin sa naturang aktibidad ang nagpa-check ng kanilang blood pressure.

Bago magsimula ang inagurasyon ay naging maulan pero kalauna’y tumindi naman ang sikat ng araw, bago mag-tanghali.

Nagpaabot ng pagbati si Chinese President Xi Jinping kay Pangulong Ferdinand “Bongbong” Marcos Junior matapos ang inagurasyon nito kahapon.

Nagpadala ng congratulatory message si Xi sa pamamagitan ng Chinese Embassy, kung saan nagbalik-tanaw siya sa mga mahalagang napagkasunduan nila ni Marcos sa pagpapanatili bilang “mabuting magkapitbahay at magkaibigan” ng Pilipinas at Tsina.

Ayon sa embahada, handa si Xi na makipagtulungan kay Pangulong Marcos sa paglalatag ng landas para sa pagpapa-unlad ng bilateral ties ng dalawang bansa.

Magugunitang nag-usap ang dalawang leader sa pamamagitan ng telepono matapos ang pagkapanalo ni PBBM sa Presidential Elections noong Mayo.

Kahapon naman ay personal na dumalo sa inagurasyon si Chinese Vice President Wang Qishan bilang special representative ni Xi.