Drew Nacino

Minamadali na ng Department of the Interior and Local Government (DILG) ang pag-iisyu ng permit para sa Telecommunication Towers mula sa Local Government Units.

Ito, ayon kay DILG secretary Benhur Abalos, ay upang mapabilis ang interconnectivity.

Bagaman kinikilala ang ilang alalahanin ng mga saklaw na LGU hinggil sa aplikasyon sa pagtatayo ng mga tower, inihayag ni Abalos na kailangang suriin ng LGU ang kanilang mga rason kung balido ang mga ito.

Hinimok din ng kalihim ang Local Government Unit na magkaroon ng digitalized system sa pag-issue ng mga permit gaya ng barangay clearance at business permits.

Sa datos ng kagawaran, aabot sa 2,086 ang naka-tenggang permits sa 341 lungsod at bayan para sa mga TelCo Tower.

Nagsimula na kahapon si Vice President Sara Duterte sa kanyang panunungkulan bilang kalihim ng Department of Education.

Kabilang sa mga naging unang hakbang ni Duterte ang pagtatalaga sa kanyang predecessor na si dating DepEd secretary Leonor “Liling” Briones, bilang kanyang consultant.

Pinapurihan naman ng bagong kalihim ang mga tauhan ng ahensya sa pamumuno ni Briones sa patuloy na pagtitiyak sa kalidad na edukasyon sa mga mag-aaral.

Kinilala rin ng Pangalawang-Pangulo ang dedikasyon ni Briones bilang isang public servant at ambag nito sa full implementation ng Senior High School Program.

Gayunman, aminado si Duterte na hindi madali ang mga kahaharapin niyang hamon sa kagawaran.

Umakyat pa sa 10,094 ang aktibong kaso ng COVID-19 sa bansa, ang pinaka-mataas na bilang ng active cases simula Abril ngayong taon.

Ito’y makaraang makapagtala ng karagdagang 7,398 COVID-19 cases simula June 27 hanggang July 3, 2022 o may daily average na 1,057 cases.

Kumpara ito sa average na 662 cases na naitala mula June 20 hanggang 26.

Sa datos ng Department of Health, aabot sa 1,188 additional COVID-19 cases ang naitala kahapon kaya’t lumobo na sa 3,709,386 ang total case load.

Nasa 3,638,690 naman ang recoveries habang nananatili sa 60,602 ang death toll.

Batay din sa datos, 497 severe at critical cases ang kasalukuyang naka-admit sa mga ospital.

Metro manila pa rin ang may pinaka-maraming kaso sa nakalipas na dalawang linggo na 5,783; sinundan ng CALABARZON, 2,263; Western Visayas, 1,014; Central Luzon, 813 at Central Visayas, 575.

Isa pang mamamahayag ang napabilang sa bagong gabinete ni President Ferdinand “Bongbong” Marcos Jr.

Ito’y sa katauhan ni DWIZ Anchor at dating ACT-CIS Partylist Rep. Niña Taduran, bilang Undersecretary ng Department of Social and Welfare Development (DSWD).

Ipinakilala si Taduran sa isang event sa isang five star hotel bilang DSWD Undersecretary.

Makakasama ni Taduran ang kapwa broadcaster na si Erwin Tulfo, na itinalag naman bilang Kalihim ng nasabing kagawaran.

Sa gitna nang hindi maawat na dagdag-presyo ng oil products, sinalubong naman ang mga consumer ng price rollback sa cooking gas.

Epektibo alas-12 kaninang hating gabi nagpatupad ang Petron ng tapyas 40 sentimos sa kada kilo ng LPG habang 22 sentimos sa auto-LPG.

36 pesos naman ang matatapyas sa kada kilo ng LPG ng solane kaninang ala-6 ng umaga.

Ang price adjustments ay bunsod ng paggalaw ng presyo sa international market.