Patay ang Assistant Prosecutor ng Quezon City matapos tambangan ng mga hindi nakilalang salarin, kahapon.
Kinilala ang biktimang si Assistant City Prosecutor at Chief Inquest Prosecutor Rogelio Velasco na pinagbabaril habang lulan ng kanyang pulang Toyota Innova na may plakang ZNV-449 sa Barangay Holy Spirit, Quezon City.
Ayon kay Quezon City Police District Director, Chief Supt. Joselito Esquivel, kasama ni Velasco ang kanyang anak na babae nang maganap ang insidente mag-a-ala 5:00 ng hapon.
Tatlo anyang lalaki ang bumaba sa isang puting Toyota Innova at pinaulanan ng bala ang windshield ng sasakyan ng mga biktima.
Naisugod pa si Velasco sa East Avenue Medical Center subalit binawian ng buhay makalipas ang isang oras.
Inaalam na ng Q.C.P.D. kung may kaugnayan ang krimen sa trabaho ni Velasco.