Nagpapatuloy ang search and rescue operations ng Japan Coast Guard sa mga nawawalang tripolante ng lumubog na cargo vessel sa Japan.
Ang Gulf Livestock 1 ay mayroong lulang 5,800 baka mula New Zealand at nakatakda sanang dalhin patungong China.
Ayon sa nag-iisang Pinoy na nailigtas ng mga awtoridad sa Japan na si Eduardo Sareno, huminto ang isa sa mga makina ng barko dahil sa napakalas na alon sa East China Sea.
Nakarinig umano siya ng anunsyo na kailangan nang magsuot ng life vest kaya’t doon na siya nagpasyang tumalon sa dagat at 24 oras siyang nagpalutang-lutang bago tuluyang nailigtas.
Gayunman, pinaghahanap pa rin ang 42 tripolante ng barko na kinabibilangan ng 38 Pilipino, 2 Australian at 2 Kiwi o taga New Zealand.
