June 2026

Pinag-aaralan ni Justice Secretary Vitaliano Aguirre ang posibilidad na gawing testigo si Marine Lt. Col. Ferdinand Marcelino sa kasong illegal drug trading na kinakaharap ni Senador Leila De Lima.

Ayon kay Aguirre, dito malalaman kung bakit siya binisita ni De Lima nang makulong ito sa Philippine National Police o PNP Custodial Center sa Camp Crame at kung bakit nang magsagawa paggalugad sa New Bilibid Prison ay naitsapuwera  ang PDEA at sinolo ito ng National Bureau of Investigation (NBI) at Bureau of Corrections (BuCor).

Ang reaksyon ni Aguirre ay batay na rin sa sinabi ni Marcelino sa kanyang affidavit noon na habang siya ay naka-detain sa PNP Custodial Center, binisita siya ni De Lima at pinag-usapan nila ang tungkol sa sinalakay na shabu laboratory sa Camiling, Tarlac noong 2014.

Naungkat umano ni Marcelino ang posibilidad na napasok na ng sindikato ng iligal na droga ang pambansang liderato, at sumagot naman aniya si De Lima at sinabing nakatitiyak siya na hindi sangkot sa iligal na droga si dating Pangulong Noynoy Aquino.

Ikinagulat ni Marcelino ang pagkakabanggit ni De Lima sa dating pangulo, gayong hindi naman niya nasambit ang pangalan ng dating Punong Ehekutibo.

Sa ngayon, ayon kay Aguirre, bibigyan niya ng pagkakataon na makapag-usap sina Marcelino at ang kanyang abugado na si Public Attorney’s Office o PAO Chief Atty. Percida Acosta.

By Meann Tanbio | With Report from Bert Mozo

Nilinaw ng Pangulong Rodrigo Duterte na hindi sa kanya galing ang desisyon na tuluyan nang tanggihan ang dalawandaang (200) dolyar na financial aid mula sa European Union (EU).

Ayon sa Pangulo, ito ay batay sa rekomendasyon mismo ni Finance Secretary Carlos Dominguez.

Ipinaliwanag ng Pangulo na kapalit umano ng naturang tulong ng EU ay dapat umanong i-promote ng Pilipinas ang human rights law at order sa bansa.

Matatandaang ikinagalit ng Pangulong Duterte ang ginawang panghihimasok ng EU sa mga panloob na usapin ng bansa at ang pagbatikos sa kampanya ng pamahalaan kontra iligal na droga.

Maliit lang umano ang mawawala sa bansa matapos tanggihan ang foreign aid ng EU

Napakaliit lamang ng tinatayang 16 billion pesos na mawawala sa bansa matapos magpasya si Pangulong Rodrigo Duterte na tanggihan ang ibinibigay na foreign aid ng EU o European Union.

Ayon kay Senador Cynthia Villar, mahirap tanggapin ang binibigay na ayuda kung hindi kayang matugunan ng Pilipinas ang ipapataw na kondisyon ng EU.

Sinabi pa ni Villar na mahirap din kung ang mga naturang kondisyon ay may layuning impluwensyahan ang Pilipinas.

By Ralph Obina / Meann Tanbio | With Report from Cely Bueno

Nagbanta ng giyera ang China laban sa Pilipinas.

Ito ang inamin ngayon ng Pangulong Rodrigo Duterte nang iginiit niya noon ang karapatan ng Pilipinas sa mga pinag-aagawang teritoryo sa West Philippine Sea.

Iginiit ng Pangulo na mali ang paratang nina Supreme Court Chief Justice Antonio Carpio at dating Foreign Affairs Secretary Albert Del Rosario na wala siyang ginawa upang ipaglaban ang arbitral ruling na pumapabor sa claim ng Pilipinas.

Sinabi ng Pangulo na harap-harapan niyang sinabi kay Chinese President Xi Jinping na atin ang West Philippine Sea at saksi dito sina National Security Adviser Hermogenes Esperon at Defense Secretary Delfin Lorenzana.

Gayunman, tumugon naman ang Presidente ng China at sinabing nais nilang mapanatili ang magandang ugnayan ng dalawang bansa ngunit mapipilitan aniya silang makipagdigma kung ipipilit ng Pilipinas ang gusto nito.

By Ralph Obina