June 2026

Maging ang PNP o Philippine National Police ay binigyan ng kapangyarihan ni Pangulong Rodrigo Duterte na manghuli sa mga lalabag sa Nationwide Smoking Ban.

Kabilang sa dagdag na responsibilidad ng mga pulis na tutukan ang mga establisyemento at mga retailer o mas kilala na takatak boys na magbebenta ng sigarilyo sa mga menor de edad.

Bukod sa pulisya, binibigyang direktiba din ang Task Force Smoke Free ng bawat munisipalidad at siyudad na ipatupad ang Executive Order Number 26 na nagbabawal sa paninigarilyo sa mga pampublikong lugar.

Ang sinumang lalabag sa nasabing E.O. ay pagmumultahin ng limang libong piso o pagkakakulong ng hindi hihigit sa tatlumpung araw.

By: Meann Tanbio

Inaasahang bibisita kay detained Senator Leila de Lima ang tinaguriang “Magnificient 7″ ng Kamara sa PNP Custodial Center sa susunod na linggo.

Ito ang kinumpirma ni Ferdie Maglalang, media relations officer ni De Lima.

Kabilang sa mga miyembro ng “Magnificient 7″ sina Albay Rep. Edcel Lagman, Akbayan Rep. Tom Villarin, Magdalo Rep. Gary Alejano, Northern Samar Rep. Raul Daza, Ifugao Rep. Teddy Baguilat jr., Caloocan Rep. Edgar Erice at Capiz Rep. Emmanuel Billones.

Bukod sa mga nabanggit na mambabatas, isa pang high profile personality ang bibisita kay De Lima sa Miyerkules.

Gayunman, tumanggi si Maglalang na pangalanan ang naturang high profile personality.

By: Meann Tanbio

Patay ang 10 bandido habang walo ang sugatan sa nangyaring sagupaan sa Sultan Kudarat.

Ayon kay 33rd infantry battalion commander Lt. Col. Harold Cabunoc, isisilbi sana ng mga pulis at sundalo ang warrant of arrest laban sa ilang bandido sa Sitio Mantisao sa Bual Village nang pagbabarilin sila ng mga armadong kalalakihan.

Isang bandido ang naaresto na kinilalang si Abdul Magid Logioman alyas “Black Moro”, 41 anyos.

Sugatan naman ang sundalong si Sgt. David Desidario ng division reconnaissance company.

Una rito, humiling sa militar ang mga residente ng Barangay Chua na magsagawa ng law enforcement operation sa kanilang lugar dahil sa pananakot na ginagawa ng mga bandido roon.

By: Meann Tanbio / Jonathan Andal

Mahigpit na babantayan ng Department of Agriculture ang aangkating bigas ng NFA o National Food Authority ngayong taon.

Tiniyak ito ni Agriculture Secretary Manny Piñol matapos ipag-utos ng inter-agency NFA council na lagdaan ni NFA Administrator Jason Aquino ang mga natitirang import permit para sa MAV o Minimum Access Volume Scheme.

Iginiit ni Piñol na kapag labis ang naangkat na bigas, posibleng bumaba ang presyo ng bigas na  makabubuti sa mga mamimili, pero posibleng maapektuhan naman ang mga lokal na magsasaka.

Sinabi pa ng kalihim na batay sa pagtaya ng International Rice Research Institute, posibleng kulangin ang supply ng bigas ng 800,000 metriko tonelada hanggang 1.2 milyong metriko toneladang bigas.

By: Meann Tanbio

Pinag-aaralan ni Justice Secretary Vitaliano Aguirre ang posibilidad na gawing testigo si Marine Lt. Col. Ferdinand Marcelino sa kasong illegal drug trading na kinakaharap ni Senador Leila de Lima.

Ayon kay Aguirre, dito malalaman kung bakit siya binisita ni De Lima nang makulong ito sa PNP Custodial Center sa Camp Crame at kung bakit nang magsagawa paggalugad sa New bilibid Prison ay naitsapuwera  ang PDEA at sinolo ito Ng NBI at Bureau of Corrections.

Ang reaksyon ni Aguirre ay batay na rin sa sinabi ni Marcelino sa kanyang affidavit noon na habang siya ay nakadetine sa PNP Custodial Center, binisita siya ni De Lima at pinag-usapan nila ang tungkol sa sinalakay na shabu laboratory sa Camiling, Tarlac nuong 2014.

Naungkat umano ni Marcelino ang posibilidad na napasok na ng sindikato ng iligal na droga ang pambansang liderato, at sumagot naman aniya si De Lima at sinabing nakatitiyak siya na hindi sangkot sa iligal na droga si dating Pangulong Noynoy Aquino.

Ikinagulat ni Marcelino ang pagkakabanggit ni De Lima sa dating Pangulo, gayong hindi naman niya nasambit ang pangalan ng dating punong ehekutibo.

Sa ngayon, ayon kay Aguirre, bibigyan niya ng pagkakataon na makapag-usap sina Marcelino at ang kanyang abugado na si Public Attorney’s Office Chief Atty. Percida Acosta.

By: Meann Tanbio / Bert Mozo