June 2026

Sasampahan ni Pangulong Rodrigo Duterte ng kasong multiple syndicated estafa ang TV network na ABS-CBN.

Ayon sa Pangulo, ito’y dahil sa kabiguan ng ABS-CBN na i-ere ang kanyang campaign advertisement noong nakaraang taon.

Nauna nang nagbanta ang Pangulo na haharangin ang renewal ng franchise ng ABS-CBN na mag-e-expire sa taong 2020.

“Na yung franchise ninyo, kumpiyansa kayo because ang franchise is renewable this year. If you are in operation for 25 years maganda ang record mo no need for another franchise, but I’m telling you now, I will be filing charges of multiple syndicated estafa”, ani Pangulong Duterte.

Diretsahan ding binanatan ni Pangulong Duterte si ABS-CBN Corporation chairman Gabby Lopez.

Binanggit ng Pangulo na nagbayad siya sa ABS-CBN ng halos tatlong milyong piso (P3-M) para mai-ere ang kanyang campaign ad, subalit hindi naman ito nangyari at hindi pa ibinalik ang kanyang pera.

“Gabby Lopez, I paid ABS-CBN P2,000,800, I was only able to gather money during the last trips of my candidacy noong tumaas na ang rating ko because historically triple triple triple lang ako. Then, suddenly two weeks nag akyat ako ng 36%. Ultimo yung pera nagmaka-awa ako sainyo kasi wala akong pera, wala akong historical propaganda sa TV, sabi pwede ba ito isingit ninyo? Tinanggap ninyo ang pera ko…pagkatapos ng election kinalimutan ninyo eh, hindi naman ninyo isinauli yung pera. You did it to me, kay Romulo, kay Cayetano, kay Chiz Escudero, at marami pa”, bahagi ng naging pahayag ni Pangulong Duterte.

By Meann Tanbio

Kabilang ang isang Filipino pilot sa dalawang (2) nasawi sa pagbagsak ng isang maliit na eroplano sa New Jersey.

Kinilala ang nasawing biktima na si Jeffrey Alino, 36 anyos habang inaalam pa ang pagkakakilanlan ng isa pang kasamahan nito na nasawi sa aksidente.

Lumalabas sa inisyal na imbestigasyon na sinusubukang lumapag nina Alino sa Teterboro Airport ngunit bumagsak ito sa isang parking lot sa ‘di kalayuan ng paliparan.

Aabot sa tatlong (3) gusali at labing tatlong (13) sasakyan ang napinsala sa naturang plane crash ngunit wala namang naitalang nasugatan sa insidente.

Hindi pa batid sa ngayon ang sanhi ng pagbagsak ng eroplano.

By Ralph Obina

Narekober ng mga kawani ng MIAA o Manila International Airport Authority ang isang sports utility vehicle na na-carnap noong June 2015.

Ayon kay MIAA General Manager Ed Monreal, ang Hyundai Tucson na may plakang ay TPO 443 ay inabandona sa parking area ng NAIA Terminal 2, dalawamput dalawang (22) araw na ang nakalipas.

Matapos ang imbestigasyon ay natuntun ng mga otoridad na ang may – ari nito ay ang car dealer na si Mario Manyakap.

Ang naturang sasakyan ay inarkilahan umano ng isang babaeng Taiwanese noong Hunyo 2015, subalit hindi na ito isinauli.

Sa ngayon ay patuloy na iniimbestigahan ng Pasay City Anti – Carnapping Unit ang insidente at inaalam ang pagkakakilanlan ng Taiwanese national.

By Katrina Valle | With Report from Raoul Esperas

Naniniwala si Senate President Koko Pimentel na hindi pa desperado ang Pilipinas para mamalimos sa ibang bansa.

Ito ay matapos magpasya ang Pangulong Rodrigo Duterte na hindi na tatanggap ang Pilipinas ng tulong pinansyal mula sa European Union o EU.

Sinabi ni Pimentel ang tulong na mayroong kalakip na kundisyon ay katumbas na rin ng pakikialam sa soberanya ng bansa.

Samantala, nasasayangan naman si Senadora Grace Poe sa pagkakansela sa foreign aid dahil nakalaan sana ito development projects sa Muslim Mindanao na makatutulong sa mas mabilis na pagsusulong ng kapayapaan.

Nationwide smoking ban isang welcome development – Pimentel

Welcome development para kay Senate President Koko Pimentel ang paglagda ng Pangulong Rodrigo Duterte sa kautusang nagbabawal sa paninigarilyo sa pampublikong lugar.

Kasunod nito ay maganda aniyang mabuksan na rin ang talakayan sa posibleng pag amyenda sa sin tax sa sigarilyo.

Una nang isinulong ng ilang grupo na gawing limang daang piso (P500.00) ang presyo ng kada kaha ng sigarilyo.

By Katrina Valle | With Report from Cely Bueno

Nagsuot ng kulay pulang arm band ang mga immigration officer sa lahat ng points of entry and exit ng bansa, araw ng Biyernes.

Ayon sa Immigration Officers Association of the Philippines (IOAP) at Buklod ng mga Kawani ng Commission on Immigration and Deportation (BUKLOD-CID), ito ay upang maipaalala lang sa Pangulong Rodrigo Duterte ang kanilang kalunos – lunos na sitwasyon.

Sinabi ng grupo sa kanilang open letter na maliban sa nananatiling mababa ang kanilang sahod, umaasa pa rin silang maipagkaloob na sa kanila ang kanilang overtime pay.

Sa kabila nito, nilinaw ng grupo na hindi sila nagpo – protesta at kanila pa rin itutuloy ang trabaho.

By Katrina Valle | With Report from Raoul Esperas