June 2026

Pinagtibay ng PNP-IAS o Philippine National Police – Internal Affairs Service ang resulta ng imbestigasyon ng Department of Justice (DOJ) sa kasong pagpatay kay Albuera Leyte Mayor Rolando Espinosa sa loob ng kanyang piitan sa Leyte Provincial Jail.

Ayon kay PNP-IAS Inspector General, Atty. Alfegar Trianbulo, nagsabwatan sina Superintendent Marvin Marcos at labing walong (18) pulis na kasamahan nito para patayin si Espinosa.

Naisumite na anya ng PNP-IAS sa tanggapan ni PNP Chief Director General Ronald Dela Rosa ang resulta ng kanilang imbestigasyon.

Nakapaloob rin dito ang rekomendasyon ng PNP-IAS sa magiging estado o magiging parusa sa grupo ni Marcos.

Tumanggi si Triambulo na banggitin kung ano ang kanilang rekomendasyon para kina Marcos dahil nasa kamay na anya ni Dela Rosa ang pagpapasya.

Una nang sinabi ni Dela Rosa na may masisibak sa serbisyo sa grupo ni Marcos na kasalukuyang nakakulong sa CIDG Region 8 sa Leyte.

By Len Aguirre

Nagbabadyang manumbalik ang port congestion na naranasan noong 2014 at 2015.

Ayon kay Abe Rebong, Vice President ng ABC o Aduana Business Club, halos syamnaput syam (99) na porsyento na ng Manila South Harbor ang na-okupa ng mga walang lamang containers.

Ang pagtambak ng mga walang container vans sa Manila South Harbor ay bunga ‘di umano ng mga long holidays mula noong Mahal na Araw at nang ganapin ang ASEAN Summit.

Nagbabala si Rebong na maaaring tumaas ang halaga ng bilihin kung magkakaroon uli ng port congestion dahil maiipit ang mga imports at magkukulang ang suplay.

Maliban dito, nakakadagdag rin anya sa siksikan ng walang lamang containers ang TABS o Terminal Appointment Booking System kung saan idinadaan sa online ang pagpapa-schedule ng cargo pickups, export deliveries at pagbabalik ng mga lamang containers.

Iginiit ni Rebong na dapat itgil muna ang implementasyon ng TABS dahil wala namng batas o Executive Order (EO) na susuporta sa legalidad nito.

By Len Aguirre

Nakatakda nang manungkulan bilang bagong kalihim ng Department of Interior and Local Government (DILG) si Armed Forces of the Philippines o AFP Chief of Staff General Eduardo Año sa susunod na buwan.

Mismong si Defense Secretary Delfin Lorenzana ang naghayag na ipinag-utos ng Pangulong Rodrigo Duterte na isagawa na ang turn over ceremony sa AFP sa June 2.

Ayon kay Lorenzana, hiniling pa nya sa Pangulo na palawigin pa ang serbisyo ni Año sa militar subalit hindi ito pinagbigyan.

Sa Oktubre pa sana ng taong ito nakatakdang magretiro si Año subalit napa-aga ito matapos italaga ng Pangulo sa DILG.

Samantala, base sa mga usap-usapan sa hanay ng militar, posibleng si Lt. General Leonardo Guerrero ng Eastern Mindanao Command na nakabase sa Davao ang ‘di umano’y napipisil na pumalit kay Año bilang hepe ng AFP.

By Len Aguirre

Limamput isang (51) milyong dolyar na foreign portfolio investment o kilala rin sa tawag na hot money ang pumasok sa bansa nitong Abril.

Kabaliktaran ito ng paglabas naman ng 460 million dollars nitong Marso, 409 million dollars noong Pebrero at 354 million dollars noong Mayo ng 2016.

Ayon sa BSP o Bangko Sentral ng Pilipinas, pagpapakita ito ng mas tumitibay na kumpiyansa ng mga negosyante sa potensyal ng pag-unlad ng bansa.

Maaaring reaksyon rin umano ito ng mga investors sa pahayag ng World Bank na patuloy na mangunguna ang ekonomiya ng Pilipinas sa rehiyon ng Asya.

By Len Aguirre

Dumistansya ang kampo ni Janet Lim Napoles sa nilulutong impeachment case laban kay Ombudsman Conchita Carpio Morales.

Ayon kay Atty. Stephen David, abogado ni Napoles, kahit kailan ay hindi sila nakipag-ugnayan at wala silang koneksyon sa Volunteers Against Crime and Corruption o VACC na syang nagsusulong ng impeachment case laban kay Morales.

Sinabi ni David na abala sila ngayon sa mga kaso ni Napoles sa Sandiganbayan at sa isinusulong nila na maging state witness ito sa mga pork barrel cases.

By Len Aguirre | With Report from Jill Resontoc

Muling tiniyak ng Pangulong Rodrigo Duterte na uubusin nya ang mga drug addicts sa bansa sa susunod na tatlong (3) taon.

Binigyang diin ng Pangulo na hindi patitinag ang kanyang administrasyon sa patuloy na pagtuligsa sa kanyang giyera kontra droga.

Binale wala ng Pangulo ang mga banta ng human rights advocates na pagpapakulong at pagsasampa ng kaso sa kanya sa International Court.

PAKINGGAN: Bahagi ng pahayag ni Pangulong Rodrigo Duterte.

By Len Aguirre | With Report from Aileen Taliping