Kinatigan ng Court of Appeals o CA ang naunang ruling ng Office of the Ombudsman nang ibasura nito ang reklamong disgraceful and immoral conduct na isinampa laban sa isang babaeng military officer.
Ito’y matapos ibasura ni Associate Justice Pedro Corales ng CA 8th Division ang inihaing petition for certiorari ng isang Wennie Paredes dahil sa teknikalidad.
Paliwanag ng CA, mali ang legal remedy na ginamit ng petitioner dahil ang tamang paraan sa pagkwestyon sa mga kautusan ng Ombudsman ay petition for review at hindi ang petition for certiorari sa ilalim ng Rule 65 ng Rules of Court.
Nag-ugat ang kaso sa nabasurang reklamo na inihain noong December 2013 ni Paredes sa Ombudsman for Military and Other Law Enforcement Offices o MOLEO laban sa isang Capt. Girlie Nabunat ng Judge Advocate General Office na di umano’y mayroong extra marital affair sa kanyang mister na si Philppine Air Force Tsgt. Rodiciendo Paredes, Jr. na nakadestino rin sa Judge Advocate General Office.
By Meann Tanbio | With Report from Bert Mozo