Mahigit 5000 Overseas Filipino Workers mula sa Saudi Arabia ang nakatakdang dumating sa bansa sa susunod na buwan.
Ayon kay OWWA Administrator Hans Cacdac, ang mga uuwing OFW’S ay nag-avail ng 90-day amnesty program ng Saudi Arabia na matatapos sa Hunyo 29.
Sinabi ni Cacdac na 1000 OFWS ang unang batch na makakauwi ng Pilipinas habang 2000 pa ang inaasahang makatatanggap ng exit visa.
Mayroon aniyang tsansang pumili ang mga OFW ng livelihood programs sa negosyo o trabaho sa pamamagitan ng Comprehensive Assistance Program ng administrasyong Duterte.
Maliban dito, makatatanggap rin sila ng livelihood starter kit na nagkakahalaga ng P10,000 hanggang P20,000 sa ilalim ng “Balik-Pinas, Balik-Hanapbuhay” program ng National Reintegration Center.
By: Meann Tanbio
Umakyat ng 11.8% ang personal remittances ng mga Overseas Filipino Workers sa unang quarter ng taon.
Ito ang masayang ibinalita ng Malacanang , batay sa impormasyong ipinarating ng Bangko Sentral ng Pilipinas .
Sinabi ni Presidential Spokesman Ernesto Abella, ang mataas na remittances ay nagpalago sa year-on-year-growth ng 11.8% sa personal remittances na nagkakahalaga ng $2.9 Billion noong March 2017.
Sinabi ni Abella na katumbas ito ng 8.1% increase sa total personal remittances sa unang quarter ng 2017 na nagkakahalaga ng $7.7 Billion Pesos.
Pinasalamatan ng Palasyo ang mga OFWS sa tulong na naibigay sa bayan at tiniyak ni Abella na susuklian ng Duterte administration ang sakripisyo ng mga ito.
By: Aileen Taliping
Nakatakdang manumpa bukas ng hapon ang mga bagong abugado sa Special En Banc session ng Korte Suprema sa Mall of Asia Arena.
Batay sa inilabas na advisory ng Supreme Court Public Information Office, kinakailangang kunin ng mga bagong nakapasang abugado ang kanilang clearance sa Office of the Bar Confidant.
Magsisimula ang Special En Banc Session ng Alas 3:00 ng hapon at ang mga mahuhuli ng dating ay hindi na papapasukin kayat dapat na isaalang-alang ang posibleng traffic papunta sa SM Mall of Asia.
Kabuuang 3747 ang nakapasa sa bar examinations noong nakalipas na taon o 59% mula sa 6344 na kumuha ng eksaminasyon.
By: Aileen Taliping
Ipaparating kay DSWD Secretary Judy Taguiwalo ang umano’y pagmamaltrato sa mga matatandaang inaalagaan sa mga Home for the Aged sa bansa.
Sinabi ni Direk Haydee Sison sa kanyang programa sa DWIZ na ipaparinig niya mismo kay Secretary Taguiwalo ang ibinunyag ng isang lolo na dating nasa home for the aged kung paano tinatrato ang mga matatandang inaalagaan ng mga home cares.
Sinabi ni Direk Haydee na dapat mapagtuunan din ito ng DSWD at maimbestigahan para mabatid kung nangyayari pa rin ang ganitong practice sa mga panahong ito.
Kabilang sa mga ginagawa umano sa mga kawawang matatanda ay pagsakal ng tuwalya kapag nagrereklamo ang mga ito, inilalagay sa isang isolation room, hindi pagagamitin ng wheelchair at pagpapagamit ng oxygen na walang laman.
By: Aileen Taliping
Ibinunyag ng dating residente ng isang kilalang home for the aged ang mga pagmamaltratong ginagawa sa mga matatandang kasamahan.
Sinabi sa DWIZ ng dating residente na may mga staff na malupit sa mga matatandang inaalagaan sa loob ng home for the aged.
Kabilang aniya dito ang pananakal ng tuwalya sa mga matatanda kapag may konting reklamo at tinanggalan ng wheelchair .
Gustuhin man aniya nilang magsumbong sa management ay hindi nila magawa dahil walang magamit na wheelchair.
Bukod dito, sinabi ng lolong dating residente na pinapagamit ang mga pasyente ng oxygen subalit wala namang laman at bula lang ang lumalabas.
Kapag gusto aniyang parusahan ang mga matatanda ay inilalagay sa isolation room.
By: Aileen Taliping
Mistulang inasar ni Pangulong Rodrigo Duterte ang Commission on Human Rights dahil sa patuloy na pagiging kritiko sa anti-drug campaign ng gobyerno.
Sinabi ng Pangulo na nakukumbinsi na siya para maniwala na naka-droga ang mga taga-human rights dahil sa taliwas na paniwala ng mga ito sa drug war.
Ayon kay Pangulong Duterte, nakakatawang ipinagtatanggol ng CHR ang mga drug addicts na mga kriminal sa halip na damayan ang mga naging biktima ng mga ito.
Bukod pa rito aniya ang mungkahi na maglagay siya ng istasyon ng shabu para ibigay ng libre sa mga Pilipino.
Sinabi ni Pangulong Duterte na hindi siya magagalit basta magsabi lang ng totoo ang mga taga-CHR kung gumagamit din ba ang mga ito ng illegal na droga .
By: Aileen Taliping
Hinimok ni Senate President Koko Pimentel ang mga kapwa Senador na sumunod sa Nationwide Smoking Ban na iniutos ng Malacanang.
Sinabi ni Pimentel na hindi exempted ang mga Senador sa smoking ban at batid niyang maraming Senador ang naninigarilyo sa loob ng kanilang tanggapan.
Hihingi rin ng clarification ang Senate President partikular sa usapin ng smoking areas dahil hindi niya sigurado kung angkop ang mga smoking areas sa Senado sa itinakda ng Executive Order ni Pangulong Rodrigo Duterte.
Kapag aniya ayaw sumunod ang mga kasamahan sa Senado ay mapipilitan siyang magpatupad ng smoking ban sa Senado.
By: Aileen Taliping
Kinalampag ng Commission on Audit ang Presidential Commission on Good Government (PCGG) kaugnay sa mga nawawalang mamahaling paintings ng pamilya Marcos, pati na ang mga nasisirang iba pa na nakatambak lamang sa Metropolitan Museum.
Batay sa 2016 COIA Report, walang mga hakbang na ginagawa ang PCGG para ma-preserve at maprotektahan ang mga mamahaling paintings ng mga Marcoses.
Ayon sa COA, dapat nasa Malacanang’s antique houses ang mga paintings at hindi pinabayaang nakatiwangwang at nagagasgas ang mga ito.
Inirekomenda ng COA sa PCGG na makipag-ugnayan sa Metropolitan Museum para imbestigahan ang nawawalang anim na mamahaling paintings at ibalik ang mga ito.
By: Aileen Taliping
Bukas si Senador Richard Gordon sa muling pagbubukas ng imbestigasyon hinggil sa Pork Barrel Fund Scam.
Gayuman, sinabi ni Gordon na uusad lamang ang re-investigation sa PDAF Scam kung mayroong mga bagong ilalatag na mga ebidensya.
Lumabas ang posibilidad na magkaroon ng re-investigation sa naturang anomalya matapos ipawalang sala ng Court of Appeals si Pork Barrel Scam Queen Janet Lim Napoles sa kasong serious illegal detention na inihain laban sa kanya ni Benhur Luy.
Si Gordon ang tumatayong chairman ng Senate Blue Ribbon Committee.
By: Meann Tanbio