Dalawa na ang naitatalang nasawi sa pananalasa ng bagyong Karen sa lalawigan ng Catanduanes na ngayo’y nasa Signal Number 3.
Batay sa ulat ng Provincial Disaster Risk Reduction and Management Office, nagmula ang mga biktima sa Batan ng Bato sa naturang lalawigan.
Alas otso ng umaga nang matagpuan ang unang biktima na tinatayang nasa 40 hanggang 50 taong gulang na lalaki sa dalampasigan ng barangay Pananaogan.
Habang pagkalunod naman ang naging sanhi ng kamatayan ng ikalawang biktima na kinilalang si Felicito Tesorero, 77 anyos.
Isa naman ang naitalang nawawala at kinilalang si Rene Matangob makaraang tumaob ang sinasakyang bangka sa barangay Sogod bunsod ng pagragasa ng tubig.
By: Jaymark Dagala
