Nagsagawa ng magkatuwang na operasyon ng pagsagip at paglikas ang mga tauhan ng Sta. Cruz Municipal Police Station, Philippine Coast Guard (PCG), at Municipal Disaster Risk Reduction and Management Office (MDRRMO) matapos bumaha sa Sitio Pasig, Barangay Gama, nitong Sabado, Agosto 29, 2026.
Bandang ika-2:00 ng hapon nang magsimula ang rescue at evacuation operation na pinangunahan ni Police Major Pablo G. Aggabao, Acting Chief of Police (ACOP) ng Sta. Cruz MPS. Agad na rumesponde ang mga awtoridad matapos mabalitaang lubog na sa baha ang ilang bahagi ng nasabing sitio.
Sa pagdating ng mga rescue team, kaagad nilang tinulungan at ligtas na inilikas ang mga naapektuhang residente mula sa mga bahay na nasalanta ng pagbaha. Isinakay ang mga ito sa mga sasakyan at dinala sa itinalagang evacuation center upang matiyak ang kanilang kaligtasan at proteksyon laban sa patuloy na pagtaas ng tubig baha.
Ayon sa ulat, maayos at mapayapa ang isinagawang operasyon sa kabila ng mahirap na kalagayan. Nagtulong-tulong ang mga kawani ng pulisya, coast guard, at disaster response team upang masigurong walang maiiwan sa mga residenteng nangangailangan ng agarang tulong.
Binigyang-diin ng Sta. Cruz MPS ang kahalagahan ng inter-ahensyang koordinasyon upang mabilis at epektibong maipatupad ang mga hakbang sa pagsagip, lalo na sa oras ng kalamidad. Pinuri rin nila ang kooperasyon ng mga residente na nakinig at sumunod sa mga tagubilin ng mga awtoridad.
Patuloy na nakatutok ang Sta. Cruz Municipal Police Station at ang iba pang ahensya ng pamahalaan sa kalagayan ng mga naapektuhang pamilya. Nananatili silang handang tumugon sa anumang pangangailangan ng komunidad, lalo na sa panahon ng sakuna at emergency.
“Ang kaligtasan ng bawat mamamayan ang aming prayoridad. Patuloy kaming maglilingkod at magpoprotekta sa aming kapwa,” pahayag ni PMAJ Aggabao. | via Jennifer Go (DWIZ Correspondent)
