Hiniling nina Kabayan Partylist Representatives Ron Salo at Ciriaco Calalang kay Pangulong Rodrigo Duterte na sertipikahan bilang ‘urgent’ ang mungkahing ilipat ang sentro ng kapangyarihan mula sa Maynila patungong Davao City.
Ito ay ayon sa sulat na ipinadala nina Salo at Calalang sa Pangulo na may petsang Enero 23, na suportahan ang House Bill 6968 at gawing prayoridad ng kasalukuyang administrasyon.
Layunin umano nito na ganap nang mabasag ang ideya ng imperyalistang Maynila at para maikalat na ang kaunlaran sa iba pang bahagi ng bansa partikular na sa Mindanao.
Sakaling makalusot, itatayo sa Davao City ang national government center kung saan doon na ililipat ang mga mahahalagang tanggapan tulad Presidential at ang Vice Presidential palace.
Gayundin ang iba pang mga gusali ng Senado, Kamara, Korte Suprema, mga constitutional at national office ng mga ahensya ng pamahalaan, katulad sa mga bansang Amerika at China na magkahiwalay ang political at financial capital.
Maliban dito, sinabi pa ng dalawang mambabatas na isa din ito sa nakikita nilang solusyon upang mapaluwag na ng tuluyan ang Metro Manila mula sa matinding trapiko at mapapalakas din nito ang nationalism o pagbubuklod ng iba’t-ibang rehiyon bilang iisang bansa.